ຂປລ.ສະຫະກອນ ຮ່ວມ​ໃຈ​ພັດທະນາກະສິກໍາ ​ແມ່ນ​ກຸ່ມ ທີ່​ຜະລິດ​ ແລະ ຈໍາໜ່າຍ ແນວພັນ ເຂົ້າຫອມທ່າດອກຄຳ 1, ຫອມທ່າດອກຄຳ 8, ຫອມທ່າດອກຄຳ 15, ທ່າດອກຄຳ 8 ແລະ ຫອມເຊບັ້ງໄຟ 4 ຢູ່ບ້ານຕຶງ ເມືອງເຊບັ້ງໄຟ ເຊິ່ງເປັນທີ່ນິຍົມຂອງຊາວນາ ແລະ ທ້ອງຕະຫລາດ ​ເນື່ອງ​ຈາກ​ວ່າ ​ເຂົ້າ​ມີ​ຄຸນ​ນະພາ​ບດີ, ກິນ​ແຊບ ​ແລະ​ ປະຊາຊົນສ່ວນ​ຫລາຍ​ ກໍ​ໄດ້​ມາ​ຊື່​ເພື່ອ​ໄປ​​ເປັນ​ແນວ​ພັນ ​ໃນ​ການ​ຜະລິດ​ເຂົ້າແຕ່​ລະໆດູ​ການ.

ທ່ານ ຂັນ​ຄໍາ ​ເຂັມ​ພາ​ວັນ ປະທານ​ສະຫະກອນ ຮ່ວມ​ໃຈ​ພັດທະນາ ກະສິກໍາ​ໃຫ້​ຮູ້​ວ່າ: ກຸ່ມຜະລິດ ​ແລະ ຈໍາໜ່າຍ ແນວພັນເຂົ້າຢູ່ບ້ານຕຶງ ເມືອງເຊບັ້ງໄຟ ໄດ້ສ້າງຕັ້ງຂຶ້ນໃນ 26ກໍລະກົດ 2012 ມີສະມາຊິກເຂົ້າຮ່ວມເບື້ອງຕົ້ນ ທັງໝົດ 22 ຄອບຄົວ, ມີເນື້ອທີ່ນາ 30,96​ເຮັກຕາ, ກຸ່ມພວກເຮົາໄດ້ຮັບທຶນສະໜັບສະໜູນ ດ້ານປັດ​ໄຈການຜະລິດ ແລະ ອຸປະກອນກົນຈັກກະສິກຳ ຈຳນວນ 10 ກວ່າລາຍການ ເຊັ່ນ: ເຄື່ອງຂັດເມັດ, ເຄື່ອງອົບແຫ້ງ, ຈັກປັ່ນເຂົ້າ, ລົດດຳນາຢ່າງຕາມ ແລະ ອື່ນ, ພ້ອມທັງໄດ້ຮັບການຝຶກອົບຮົມ ດ້ານເຕັກນິກ ການປູກເຂົ້າສິນຄ້າ, ການຜະລິດເຂົ້າແນວພັນ, ເຕັກນິກການບໍລິຫານກຸ່ມ, ຈາກໂຄງການຜະລິດກະສິກຳ ເປັນສິນຄ້າຂອງລັດຖະບານ, ໂດຍແມ່ນຂະແໜງການກະສິກຳ ແລະ ປ່າໄມ້ໄດ້ຊຸກຍູ້ - ສົ່ງເສີມນໍາພາຈັດຕັ້ງປະຕິບັດ ເຊິ່ງເຮັດໃຫ້ກຸ່ມການຜະລິດເຂົ້າ ຂອງພວກເຮົາໄດ້ມີການຫັນປ່ຽນ, ຈາກທີ່ເຄີຍຜະລິດແບບທຳມະຊາດ, ນຳໃຊ້ແນວພັນເຂົ້າພື້ນບ້ານ ທີ່ຊາວນາເກັບຮັກສາເອງ ເອົາມາປູກເຊິ່ງຜົນຜະລິດ, ຄຸນນະພາບເຂົ້າບໍ່ດີເປັນເຂົ້າແຂງ, ​ແຕ່ຜ່ານການຝຶກອົບຮົມ ດ້ານເຕັກນິກຕ່າງໆ, ຊາວນາກຸ່ມບ້ານຕຶງສາມາດຜະລິດເຂົ້າແນວພັນ ທີ່ມີຄຸນນະພາບດີຕອບສະໜອງ ໃຫ້ແກ່ສັງຄົມຢ່າງຕໍ່ເນື່ອງ, ເຮັດໃຫ້ກຸ່ມພວກເຮົາໄດ້ເຕີບໃຫຍ່ ຂະຫາຍຕົວຢ່າງຕັ້ງໜ້າ, ເນື້ອທີ່ການຜະລິດເພີ່ມຂື້ນ, ນາປີ,ນາແຊງຈາກ 42,19 ເຮັກຕາ, ໃນປີ 2012ມາເປັນ 56,2 ເຮັກຕາ ໃນປີ 2021, ສະມັດຕະພາບ 3-4 ໂຕນຕໍ່ເຮັກຕາ, ຂາຍເປັນແນວພັນ 10-15 ໂຕນຕໍ່ປີ, ເຫລືອນັ້ນແມ່ນຂາຍ ເປັນເຂົ້າສິນຄ້າ ທີ່ຄຸນນະພາບດີ, ການຜະລິດແນວພັນ ເຂົ້າຂອງກຸ່ມ ປະກອບມີ 5 ແນວພັນຄື: ແນວພັນເຂົ້າຫອມທ່າດອກຄຳ 1, ເຂົ້າຫອມທ່າດອກຄຳ 8, ເຂົ້າຫອມທ່າດອກຄຳ 15, ເຂົ້າທ່າດອກຄຳ 8 ແລະ ເຂົ້າຫອມເຊບັ້ງໄຟ 4ເຊິ່ງເປັນທີ່ຍິຍົມຂອງຊາວນາ ແລະ ຕະຫລາດຕ້ອງການ, ຜ່ານການຜະລິດແນວພັນເຂົ້າ ແລະ ການຈຳໜ່າຍແນວພັນເຂົ້າ, ກຸ່ມບ້ານຕຶງພວກເຮົາໄດ້ມີເງິນທ້ອນສະສົມ 800 ກວ່າລ້ານກີບ, ສະມາຊິກພາຍໃນກຸ່ມ ມີລາຍຮັບເພີ່ມຂຶ້ນເລື້ອຍໆ. ຕົກມາໃນກາງປີ 2021 ​ຂະແໜງການກະສິກຳ ແລະ ປ່າໄມ້ ໄດ້ນຳເອົາໂຄງການ​ສົ່ງ​ເສີມ​​ລະ​ບົບ​ຕ່ອງ​ໂສ້ ​ການຜະ​ລິດ​ກະ​ສິ​ກຳ​ເປັນ​ສິນ​ຄ້າ ທີ່​ເປັນ​ມິດ​ຕໍ່​ສິ່ງ​ແວດ​ລ້ອມແລະ ໄດ້ສືບຕໍ່ຊຸກຍູ້ສົ່ງເສີມກຸ່ມ ຜະລິດແນວພັນເຂົ້າຂອງພວກເຮົາ, ດ້ວຍການຝຶກອົບຮົມ ສ້າງຄວາມເຂັ້ມແຂງໃຫ້ແກ່ກຸ່ມ, ປັບປຸງກຳລັງການຜະລິດ, ປັບປຸງເຕັກນິກການຜະລິດ, ປັງປຸງກົງຈັກການຈັດຕັ້ງຂອງກຸ່ມ, ເຮັດໃຫ້ກຸ່ມພວກເຮົາມີຄວາມເຂັ້ມແຂງ, ມີຜົນຜະລິດເພີ່ມຂຶ້ນໃນແຕ່ລະປີ ເຊິ່ງສາມາດຜະລິດ ເຂົ້າແນວພັນ ໄດ້ປະມານ 10-15 ໂຕນຕໍ່ປີ ແລະ ເຂົ້າເປັນສິນຄ້າປະມານ 50-60 ໂຕນຕໍ່ປີ,ໄດ້ຈໍາໜ່າຍພາຍໃນແຂວງ ແລະ ຂາຍໄປຕ່າງແຂວງຈໍານວນໜຶ່ງ, ສ້າງກຳໄລສຸດທິໃຫ້ແກ່ ບັນດາສະມາຊິກ ພາຍໃນກຸ່ມໄດ້ 10 ລ້ານ ຫາ 20 ລ້ານກີບຕໍ່ຄອບຄົວຕໍ່ປີ.

ທ່ານ ຂັນ​ຄໍາ ​ເວົ້າ​ຕື່ມ​ວ່າ: ໃນປີ 2024 ເນື້ອທີ່ການປູກເຂົ້າຂອງກຸ່ມຫລຸດລົງ ຍ້ອນໂຄງການຊົນລະປະທານ ບ້ານນາພອກປິດນຳ້ເພື່ອກໍ່ສ້າງ ແລະ ປັບປຸງຄອງ, ສະມາຊິກ ຈຳນວນໜຶ່ງ ບໍ່ເຮັດນາແຊງ ເນື້ອທີ່ຜະລິດແນວພັນເຂົ້າ ປະຕິບັດໄດ້ 11,5 ​ເຮັກຕາ, ຜົນຜະລິດໄດ້ 58ໂຕນ, ມູນຄ່າລວມ 464 ລ້າ​ນກວ່າກີບ, ໃນນັ້ນ; ຄັດຂາຍເປັນແນວພັນ ເຂົ້າລຸ້ນ3ຈຳນວນ 10, 35 ໂຕນ,ລາຄາ 15.000 ກີບຕໍ່ກິໂລ, ເປັນເງິນ 155ລ້ານ​ກວ່າກີບ, ຂາຍເປັນເຂົ້າສິນຄ້າຈໍານວນ 47,65 ໂຕນ, ລາຄາ 6.500 ກີບຕໍ່ກິໂລ, ເປັນເງິນ 309ລ້ານ​ກວ່າກີບ ແລະ ມີເງິນ ແຮຄັງໃນບັນຊີ ຈຳນວນ 95 ລ້ານ​ກວ່າກີບ. ສັງລວມແລ້ວການພັດທະນາ ກຳລັງການຜະລິດ ຂອງ ກຸ່ມຜະລິດແນວພັນເຂົ້າ ກ້າວສູ້ການເປັນສະຫະກອນ ຮ່ວມໃຈ ພັດທະນາກະສິກຳ” ຢູ່ບ້ານຕຶງ ເມືອງເຊບັ້ງໄຟ ແມ່ນນັບມື້ເຕີບໃຫຍ່ ຂະຫາຍຕົວດີຂຶ້ນຢ່າງຕໍ່ເນື່ອງ ເມື່ອທຽບໃສ່ກ່ອນການສ້າງຕັ້ງກຸ່ມ, ໂດຍສະເພາະ ເຕັກນິກການຜະລິດ,​ ຄຸນນະພາບ ຂອງເຂົ້າ ແລະ ສະມັດຕະພາບຂອງຜົນຜະລິດ ມີການປ່ຽນແປງສູງຂຶ້ນ, ເສດ​ຖະ​ກິດຄອບຄົວແລະ ຊີ​ວິດ​ການ​ເປັນ​ຢູ່ ຂອງ​ບັນ​ດາ​ສະ​ມາ​ຊິກພາຍໃນ​ກຸ່ມ ມີ​ການ​ປ່​ຽນ​ແປງ​ທີ່​ດີ​ຂຶ້ນ, ມີເງິນຝາກປະຈຳເດືອນ ຢູ່ໃນກອງທຶນເງິນຝາກ ຂອງກຸ່ມຢ່າງຕໍ່ເນື່ອງ.

          ​ເອົາ​ເປັນ​ວ່າ​ຖ້າ​ທ່ານ​​ໃດ​ຢາກ​ໄດ້ ​ແນວ​ພັນ​ເຂົ້າ​ຄຸນ​ນະພາ​ບດີ ກໍ​ສາມາດ​ເຂົ້າ​ມາ​ຊື່​ໄດ້​ຢູ່​ສູນ ຕັ້ງ​ຢູ່​ບ້ານ​ຕຶງ ​ເມືອງ​ເຊ​ບັ້ງ​ໄຟ ​ແຂວງ​ຄໍາ​ມ່ວນ ຫລື ຕິດຕໍ່​ໄດ້​ທີ​ເບີ 02095280645.
​ໂດຍ:ມາລີ​ດາ

KPL