ຂປລ
ສະຫະພາບ ເອີຣົບ ແລະ ປະເທດ ສະມາຊິກຂອງຕົນ ມີອະທິປະໄຕ ແລະ ສິດທິ ໃນການກຳນົດ ກົດລະບຽບ ການເຄື່ອນໄຫວ ດ້ານເສດຖະກິດ ຢູ່ພາຍໃນຂອງຕົນ.
ຂປລ.ວິທະຍຸສາກົນແຫ່ງ ສປ ຈີນ, ພາຍຫລັງ ທ່ານ ໂດນັນ ທຣຳ, ປະທານາທິບໍດີ ສ.ອາເມລິກາ ປະກາດ ຈະເກັບພາສີ ແບບຕອບໂຕ້ ຕໍ່ມາດຕະການ ຕິດຕາມຄຸ້ມຄອງ ດ້ານດິຈີຕອນ ຂອງປະເທດອື່ນແລ້ວ, ວັນທີ 26 ສິງຫານີ້, ເຈົ້າໜ້າທີ່ ສະຫະພາບ ເອີຣົບ ກ່າວວ່າ: ສະຫະພາບ ເອີຣົບ ແລະ ປະເທດ ສະມາຊິກຂອງຕົນ ມີອະທິປະໄຕ ແລະ ສິດທິ ໃນການກຳນົດ ກົດລະບຽບ ການເຄື່ອນໄຫວ ດ້ານເສດຖະກິດ ຢູ່ພາຍໃນຂອງຕົນ. ທ່ານ ນາງ ພໍລລາ ປິນໂຮ ຫົວໜ້າໂຄສົກ ຂອງຄະນະກຳມາທິການ ສະຫະພາບ ເອີຣົບ ກ່າວວ່າ: “ການວາງກົດລະບຽບ ຕໍ່ການເຄື່ອນໄຫວ ດ້ານເສດຖະກິດ ພາຍໃນ ເປັນອະທິປະໄຕ ແລະ ສິດທິ ຂອງສະຫະພາບ ເອີຣົບ ແລະ ປະເທດ ສະມາຊິກຂອງຕົນ.” ບັນຫາດັ່ງກ່າວ ບໍ່ນອນຢູ່ ໃນຂອບສັນຍາ ການຄ້າ ລະຫວ່າງ ສະຫະພາບ ເອີຣົບ-ສ.ອາເມລິກາ ແລະ ເປັນສອງບັນຫາ ທີ່ມີຄວາມແຕກຕ່າງກັນ. ທ່ານ ໂດນັນ ທຣຳ ໄດ້ເຜີຍແຜ່ ຂໍ້ຄວາມຜ່ານສື່ສັງຄົມອອນລາຍ ໂດຍກ່າວເຕືອນວ່າ: ທຸກປະເທດ ທີ່ເກັບພາສີ ດິຈີຕອນ, ສ້າງກົດໝາຍ ດ້ານດິຈີຕອນ, ວາງກົດລະບຽບ ດ້ານດິຈີຕອນ ຫລື ດຳເນີນການຕິດຕາມ ຄຸ້ມຄອງ ດ້ານດິຈີຕອນ, ເວັ້ນແຕ່ ປະເທດເຫລົ່ານີ້ ຍົກເລີກມາດຕະການ ເລືອກປະຕິບັດ ຕໍ່ວິສາຫະກິດ ອາເມລິກາ ເທົ່ານັ້ນ, ຖ້າບໍ່ດັ່ງນັ້ນ, ຈະເກັບພາສີ ນຳເຂົ້າສູງພິເສດ ຕໍ່ສິນຄ້າທີ່ສົ່ງເຂົ້າໄປ ສ.ອາເມລິກາ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
