ຂປລ
ທ່ານ ຊາບາສ ຊາຣີຟ ນາຍົກລັດຖະມົນຕີ ປາກິດສະຖານ ໄດ້ພົບປະກັບ ທ່ານ ວາງຢີ້ ກຳມະການ ກົມການເມືອງ ສູນກາງພັກ ກອມມູນິດຈີນ, ລັດຖະມົນຕີ ກະຊວງການຕ່າງປະເທດຈີນ ຢູ່ນະຄອນຫລວງ ອິສະລາມາບັດ ຂອງປາກິດສະຖານ.
ຂປລ.ວິທະຍຸສາກົນແຫ່ງ ສປ ຈີນ, ທ່ານ ຊາບາສ ຊາຣີຟ ນາຍົກລັດຖະມົນຕີ ປາກິດສະຖານ ໄດ້ພົບປະກັບ ທ່ານ ວາງຢີ້ ກຳມະການ ກົມການເມືອງ ສູນກາງພັກ ກອມມູນິດຈີນ, ລັດຖະມົນຕີ ກະຊວງການຕ່າງປະເທດຈີນ ຢູ່ນະຄອນຫລວງ ອິສະລາມາບັດ ຂອງປາກິດສະຖານ. ທ່ານ ຊາບາສ ຊາຣີຟ ໄດ້ກ່າວວ່າ: ປາກິດສະຖານ ຄອງຄອຍ ຮ່ວມກັບ ສປ ຈີນ ຊຸກຍູ້ການພັດທະນາ ແລວເສດຖະກິດ ຈີນ-ປາກິດສະຖານ ໃນສະບັບ “2.0 ລະດັບໃໝ່”, ລົງເລິກການຮ່ວມມື ໃນຂົງເຂດຕ່າງໆເຊັ່ນ: ກະສິກຳ, ຂຸດຄົ້ນບໍ່ແຮ່, ຊັບພະຍາກອນ ພະລັງງານ, ການບິນອາວະກາດ, ເຕັກໂນໂລຊີ ຂໍ້ມູນຂ່າວສານ ແລະ ພື້ນຖານໂຄງລ່າງ. ປາກິດສະຖານສະໜັບສະໜູນ ຂໍ້ລິເລີ່ມ ທົ່ວໂລກ 3 ຂໍ້ຂອງ ທ່ານ ສີຈິ້ນຜິງ ປະທານປະເທດຈີນ ຢ່າງເດັດດ່ຽວ, ຍຶດໝັ້ນລັດທິຫລາຍຝ່າຍ ແລະ ພະຍາຍາມ ສ້າງປະຊາຄົມ ຮ່ວມຊາຕາກຳ ປາກິດສະຖານ-ສປ ຈີນ. ທ່ານ ວາງຢີ້ ກ່າວວ່າ: ສປ ຈີນ ແລະ ປາກິດສະຖານ ພວມສ້າງປະຊາຄົມ ຮ່ວມຊາຕາກຳ ທີ່ແໜ້ນແຟ້ນກວ່າເກົ່າ ເພື່ອໃຫ້ອະນາຄົດ ແລະ ຊາຕາກຳ ຂອງທັງສອງຝ່າຍ ເຊື່ອມໂຍງເຂົ້າກັນ ຂຶ້ນຕື່ມ, ພັດທະນາ ແລະ ຈະເລີນຮຸ່ງເຮືອງຮ່ວມກັນ ແລະ ກ້າວໄປສູ່ ຍຸກທັນສະໄໝ ໄປດ້ວຍກັນ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
