ຂປລ. ກອງປະຊຸມ ອົງການໄອຍະການ ລາວ-ກໍາປູເຈຍ ຄັ້ງທີ I  ວ່າດ້ວຍການຮ່ວມມື ໃນການຕ້ານອາຊະຍາກໍາຂ້າມຊາດ ໂດຍສະເພາະ ການຄ້າຂາຍຢາເສບຕິດ ຈັດຂຶ້ນໃນວັນທີ 15 ກໍລະກົດ 2025  ໂດຍການເປັນປະທານຮ່ວມຂອງ ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ທ່ານ ນາງ ເຈຍ ລຽງ ຫົວໜ້າອົງການໄອຍະການສູງສຸດ ປະຈໍາສານສູງສຸດ ແຫ່ງ ຣາຊະອານາຈັກ ກໍາປູເຈຍ, ມີພະນັກງານຂັ້ນສູງ ອົງການໄອຍະການ ຂອງສອງປະເທດເຂົ້າຮ່ວມ.

ທ່ານ ໄຊຊະນະ ໂຄດພູທອນ ​ໄດ້ກ່າວວ່າ: ກອງປະຊຸມຄັ້ງນີ້, ເປັນກອງປະຊຸມທີ່ມີຄວາມໝາຍຄວາມສໍາຄັນ ແລະ ເປັນກອງປະຊຸມຄັ້ງທໍາອິດຂອງສອງອົງການ ໃນການຍົກສູງການຮ່ວມມືກັນ ຕ້ານອາຊະຍາກໍາຂ້າມຊາດ ກໍຄື ວຽກງານໄອຍະການ, ທັງເປັນການປະກອບສ່ວນສໍາຄັນ ເຂົ້າໃນການສືບຕໍ່ຮັດແໜ້ນສາຍພົວພັນມິດຕະພາບ, ຄວາມສາມັກຄີອັນເປັນມູນເຊື້ອ ທີ່ມີມາແຕ່ດົນນານ ແລະ ການເປັນຄູ່ຮ່ວມມືຍຸດທະສາດຮອບດ້ານ ແລະ ໜັ້ນຄົງຍາວນານ ລະຫ່ວາງ ລາວ ແລະ ກໍາປູເຈຍ ​ໂດຍສະເພາະ ການພົວພັນຮ່ວມມື ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການສູງສຸດ ແຫ່ງ ຣາຊະອານາຈັກ ກໍາປູເຈຍ ເຂົ້າສູ່ວຽກງານຕົວຈິງ ຢ່າງມີປະສິດທິຜົນ ແລະ ການມາຢ້ຽມຢາມຂອງຄະນະຜູ້ແທນຂັ້ນສູງ ອົງການໄອຍະການສູງສຸດ ແຫ່ງ ຣາຊະອານາຈັກ ກໍາປູເຈຍ ໃນຄັ້ງນີ້, ເປັນການປະຕິບັດ ຕາມບົດບັນທຶກຄວາມເຂົ້າໃຈ ທີ່ໄດ້ລົງນາມຮ່ວມກັນໃນປີ 2024 ຢູ່ທີຣາຊະອານາຈັກກໍາປູເຈຍ ແລະ ທັງເປັນການເພີ່ມທະວີການພົວພັນ ແລະ ການຮ່ວມມືຂອງສອງປະເທດ ລາວ-ກໍາປູເຈຍ ແລະ ສອງອົງການໄອຍະການສູງສຸດຂອງສອງປະເທດ ເຂົ້າສູ່ວຽກງານຕົວຈິງ ເຊິ່ງເຫັນໄດ້ວ່າ ການພົວພັນຮ່ວມມືຂອງສອງອົງການ ນັບມື້ກ້າວສູ່ບາດກ້າວໃໜ່ ແລະ ສະໜິດແໜ້ນ.

ປັດຈຸບັນ, ບັນ​ຫາອາຊະຍາກໍາຂ້າມຊາດ ໂດຍສະເພາະ ອາຊະຍາກໍາຢາເສບຕິດ ໄດ້ກາຍເປັນບັນຫາລວມຂອງໂລກ, ເປັນໄພຂົ່ມຂູ່ຕໍ່ຄວາມໜັ້ນຄົງ ຂອງບັນດາປະເທດ ໃນພາກພື້ນ ແລະ ໃນໂລກ. ໃນແຕ່ລະປີ ບັນຫາອາຊະຍາກໍາຢາເສບຕິດ ບໍ່ພຽງແຕ່ສ້າງຄວາມເສຍຫາຍແກ່ຊີວິດ ແລະ ຊັບສິນຂອງປະຊາຊົນ ຢ່າງມະຫາສານເທົ່ານັ້ນ ແຕ່ຍັງເປັນອຸປະສັກຕໍ່ ການພັດທະນາເສດຖະກິດ-ສັງຄົມ ຂອງບັນດາປະຊາຊາດ ແລະ ການຮ່ວມມືໃນພາກພື້ນອີກດ້ວຍ. ຢາເສບຕິດເປັນບັນຫາໃຫຍ່ລະດັບໂລກ ທີ່ບັນດາປະເທດ ຕ່າງກໍໃຫ້ຄວາມສໍາຄັນ ແລະ ເອົາໃຈໃສ່ຮ່ວມມືກັນຕ້ານ, ສະກັດກັ້ນ, ຄວບຄຸມ ແລະ ແກ້ໄຂບັນຫາ, ອົງການສະຫະປະຊາຊາດ ໄດ້ກໍານົດ ການກະທໍາຜິດກ່ຽວກັບຢາເສບຕິດເປັນໜຶ່ງ ໃນບັນດາອາຊະຍາກໍາສາກົນ; ອາຊະຍາກໍາຂ້າມຊາດ ໂດຍສະເພາະ ອາຊະຍາກໍາຢາເສບຕິດ ຈຶ່ງເປັນບັນຫາຮີບດ່ວນ ແລະ ບໍ່ມີປະເທດໄດໜຶ່ງສາມາດຮັບມືໄດ້ໂດຍລໍາພັງ. ສະນັ້ນ, ເພື່ອຕ້ານກັບບັນຫາດັ່ງກ່າວໄດ້ຢ່າງມີປະສິດທິຜົນ ແລະ ທັນການ, ຮຽກຮ້ອງໃຫ້ບັນດາປະເທດຕ່າງໆ ຕ້ອງໄດ້ເພີ່ມທະວີການຮ່ວມມືກັນຢ່າງ ຮອບດ້ານ ລວມທັງການປະສານງານ, ການແລກປ່ຽນຂໍ້ມູນຂ່າວສານ ແລະ ການສົ່ງເສີມຄວາມສາມາດຂອງພະນັກງານ ໂດຍຜ່ານການຈັດຕັ້ງປະຕິບັດ ບັນດານິຕິກໍາ ຂອງສາກົນ ແລະ ພາກພື້ນ.

ສໍາລັບຢູ່ ສປປ ລາວ ກໍໄດ້ຮັບຜົນກະທົບຈາກບັນຫາອາຊະຍາກໍາຂ້າມຊາດ, ບັນຫາຢາເສບຕິດຢ່າງຫລີກລ່ຽງບໍ່ໄດ້ ຍ້ອນສະພາບຈຸດພິເສດທີ່ຕັ້ງພູມສັນຖານ ຂອງປະເທດ ຕັ້ງຢູ່ອະນຸພາກພື້ນລຸ່ມແມ່ນໍ້າຂອງ ມີຊາຍແດນຕິດກັບ 5 ປະເທດ. ໃນນັ້ນ, ມີບາງຂອບເຂດຊາຍແດນ ມີຄວາມຫລໍ່ແຫລມຫລາຍ ໃນບັນຫາອາຊະຍາກໍາຂ້າມຊາດ, ການຄ້າຂາຍຢາເສບຕິດ. ອີກຢ່າງໜຶ່ງ ສປປ ລາວ ​ໄດ້ເປີດກວ້າງການພົວພັນ ແລະ ການຮ່ວມມືກັບບັນດາປະເທດໃນພາກພື້ນ ແລະ ສາກົນ ຕາມທິດເຊື່ອມໂຍງ ແລະ ເຊື່ອມຈອດກັບບັນດາປະເທດ​ໃກ້ຄຽງ ເປັນເງື່ອນໄຂໃຫ້ ສປປ ລາວ ກາຍເປັນທາງຜ່ານໃນການຂົນສົ່ງສານເຄມີຕັ້ງຕົ້ນ ທີ່ເປັນສ່ວນປະສົມ ໃນການຜະລິດຢາເສບຕິດ ປະເພດຕ່າງໆ ເຊັ່ນ: ຢາບ້າ, ເຮໂລອິນ, ຝິ່ນ, ກັນຊາ, ຢາໄອສ, ແປ້ງຝຸ່ນ ລວມທັງຜະລິດຕະພັນສິ່ງເສບຕິດອື່ນໆ ເພື່ອນໍາໄປຜະລິດເປັນຢາເສບຕິດຢູ່ບາງປະເທດ​ໃກ້ຄຽງ ແລະ ຢູ່ບາງບໍລິເວນຂອງປະເທດ ເຊິ່ງ ສປປ ລາວ ກໍາລັງຖືກຂົ່ມຂູ່ຈາກບັນຫາຢາເສບຕິດ ແລະ ໄດ້ແຜ່ລະບາດຢ່າງຫລວງຫລາຍ ນັບແຕ່ຕົວເມືອງຮອດຊົນນະບົດຫ່າງໄກສອກຫລີກ, ເຂົ້າເຖິງທຸກຊັ້ນຄົນ, ທຸກສາຂາອາຊີບ ໃນທົ່ວສັງຄົມນັບແຕ່ເຍົາວະຊົນ, ຊາວໜຸ່ມ, ແມ່ຍິງ, ນັກຮຽນ-ນັກສຶກສາ, ພໍ່ຄ້າຊາວຂາຍ, ຜູ້ໃຊ້ແຮງງານ, ຜູ້ອອກແຮງງານ. ບັນຫາດັ່ງກ່າວ, ຫາກບໍ່ຮີບຮ້ອນແກ້ໄຂດ້ວຍມາດຕະການທີ່ສອດຄ່ອງ ຈະກາຍເປັນໜໍ່ແໜງ ແລະ ສາເຫດທີ່ພາໃຫ້ເກີດບັນຫາ ອາຊະຍາກໍາປະເພດຕ່າງໆ  ທີ່ເອີ້ນວ່າປະກົດການຫໍ້ຍທໍ້ໃນສັງຄົມ, ທັງຈະສົ່ງຜົນກະທົບທາງກົງ ແລະ ທາງອ້ອມຕໍ່ຄວາມສະຫງົບ ທາງດ້ານການເມືອງ, ກົດໜ່ວງການພັດທະນາ ເສດຖະກິດ-ສັງຄົມຂອງຊາດ ແລະ ຄວາມເປັນລະບຽບຮຽບຮ້ອຍຂອງສັງຄົມ. ນອກນັ້ນ, ບັນຫາຢາເສບຕິດ ຍັງສົ່ງຜົນກະທົບຕໍ່ສຸ ຂະພາບ ແລະ ຊີວິດຂອງຊາວໜຸ່ມຮຸ່ນສືບທອດ ທີ່ເປັນກໍາລັງແຮງສໍາຄັນ ໃນການປົກປັກຮັກສາ ແລະ ພັດທະນາປະເທດຊາດ ໃນປັດຈຸບັນ ແລະ ອະນາຄົດ.

ຕາມການຕິດຕາມກວດກາ ຂອງອົງການໄອຍະການຂັ້ນຕ່າງໆ ເຫັນວ່າ ປີ 2024 ມີຄໍາຕັດສິນຄະດີຢາເສບຕິດ ທັງໜົດ 5.012 ເລື່ອງ ແລະ 5 ເດືອນ ຕົ້ນປີ 2025 ມີ 1.422 ເລື່ອງ. ໂດຍເຫັນໄດ້ໄພອັນຕະລາຍດັ່ງກ່າວ, ສປປ ລາວ ໄດ້ສຸມໃສ່ວຽກງານຕ້ານອາຊະຍາກໍາຢາເສບຕິດ ໂດຍວາງມາດຕະ ການ, ກໍານົດບາງນະໂຍບາຍ, ກົດໝາຍ, ສົນທິສັນຍາ, ຍຸດທະສາດສະເພາະໜ້າ ແລະ ຍາວນານ ລວມທັງການກໍານົດເປັນວາລະແຫ່ງຊາດ ກ່ຽວກັບການແກ້ໄຂ ບັນຫາຢາເສບຕິດຂອງລັດຖະບານ. ສ່ວນອົງ ການໄອຍະການປະຊາຊົນສູງສຸດ ກໍໄດ້ອອກເປັນຄໍາສັ່ງ, ຄໍາແນະນໍາກ່ຽວກັບ ການແກ້ໄຂບັນຫາຢາເສບຕິດ ເພື່ອຕອບສະໜອງນະໂຍບາຍ ວາລະແຫ່ງຊາດ ຂອງລັດຖະບານທີ່ວາງອອກໃຫ້ປະກົດຜົນເປັນຈິງ.

ພາບ: ອ່າຍຄຳ

KPL