ຂປລ
ມູນຄ່າການຄ້າ ສອງຝ່າຍ ລະຫວ່າງ ສປ ຈີນ-ສສ ຫວຽດນາມ ບັນລຸ ຫລາຍກວ່າ 200 ຕື້ໂດລາ ສະຫະລັດ ເປັນເວລາ 4 ປີ ຕິດຕໍ່ກັນ.
ຂປລ.ວິທະຍຸສາກົນແຫ່ງ ສປ ຈີນ, ວັນທີ 10 ເມສານີ້, ທ່ານ ນາງ ເຮີຢົງຊຽນ, ໂຄສົກ ກະຊວງ ການຄ້າຈີນ ໄດ້ຢືນຢັນ ໃນກອງປະຊຸມ ຖະແຫລງຂ່າວ ປະຈຳ ຂອງກະຊວງ ການຄ້າຈີນວ່າ: ມູນຄ່າການຄ້າ ສອງຝ່າຍ ລະຫວ່າງ ສປ ຈີນ-ສສ ຫວຽດນາມ ບັນລຸ ຫລາຍກວ່າ 200 ຕື້ໂດລາ ສະຫະລັດ ເປັນເວລາ 4 ປີ ຕິດຕໍ່ກັນ. ເມື່ອຮອດປີ 2024, ບັນລຸເຖິງ 260,65 ຕື້ໂດລາ ສະຫະລັດ, ເພີ່ມຂຶ້ນ 13,5% ເມື່ອທຽບໃສ່ປີ 2023. ທ່ານ ນາງ ເຮີຢົງຊຽນ ກ່າວຕື່ມວ່າ: ການຮ່ວມມື ດ້ານເສດຖະກິດ ການຄ້າ ລະຫວ່າງ ສປ ຈີນ-ສສ ຫວຽດນາມ ໄດ້ຮັບການພັດທະນາ ຢ່າງໝັ້ນທ່ຽງ, ເລີ່ມແຕ່ປີ 2004 ເປັນຕົ້ນມາ, ສປ ຈີນ ແມ່ນຄູ່ການຄ້າໃຫຍ່ ອັນດັບທີ 1 ຂອງ ສສ ຫວຽດນາມ, ເລີ່ມແຕ່ປີ 2016 ເປັນຕົ້ນມາ, ສສ ຫວຽດນາມ ແມ່ນຄູ່ການຄ້າໃຫຍ່ ອັນດັບທີ 1 ໃນອາຊຽນ ຂອງ ສປ ຈີນ. ຂະນະທີ່ ສປ ຈີນ ຍິນດີ ຮ່ວມກັບ ສສ ຫວຽດນາມ, ຕັ້ງໜ້າ ຈັດຕັ້ງປະຕິບັດ ຄວາມເຫັນ ທີ່ເປັນເອກະພາບ ສຳຄັນຕ່າງໆ ຂອງຜູ້ນຳສູງສຸດ ຂອງສອງພັກ ສອງລັດ ຈີນ-ຫວຽດນາມ ກ່ຽວກັບ ການລົງເລິກ ຄູ່ຮ່ວມຊາຕາກຳ ຈີນ-ຫວຽດນາມ ຢ່າງຕໍ່ເນື່ອງ, ຊຸກຍູ້ໃຫ້ການຮ່ວມມື ດ້ານເສດຖະກິດ ການຄ້າ ລະຫວ່າງ ສອງປະເທດ ໄດ້ຮັບການຍົກສູງ ຄຸນນະພາບ ແລະ ຍົກລະດັບສູງຂຶ້ນ ເພື່ອນຳເອົາ ຄວາມສຸກ ໃຫ້ແກ່ ປະຊາຊົນສອງຊາດ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
