ຂປລ
ປັດຈຸບັນນີ້, ເຫັນວ່າສະພາບອາກາດແມ່ນໄດ້ເລີ່ມຮ້ອນອົບເອົ້າ ເຮັດໃຫ້ການຊົມໃຊ້ນໍ້າເຂົ້າໃນການດຳລົງຊີວິດປະຈຳວັນເພີ່ມຂຶ້ນ ໂດຍສະເພາະແມ່ນແຕ່ງຢູ່ຄົວກິນ, ການອາບ, ຫົດຕົ້ນໄມ້, ດອກໄມ້ຕາມແຄມຮົ້ວເຮືອນ ແລະ ອື່ນໆ ເຊິ່ງທັງໝົດເຫລົ່ານີ້ສ່ວນຫລາຍແມ່ນຊົມໃຊ້ນ້ຳປະປາເປັນຕົ້ນຕໍ.
*ປັດຈຸບັນນີ້, ເຫັນວ່າສະພາບອາກາດແມ່ນໄດ້ເລີ່ມຮ້ອນອົບເອົ້າ ເຮັດໃຫ້ການຊົມໃຊ້ນໍ້າເຂົ້າໃນການດຳລົງຊີວິດປະຈຳວັນເພີ່ມຂຶ້ນ ໂດຍສະເພາະແມ່ນແຕ່ງຢູ່ຄົວກິນ, ການອາບ, ຫົດຕົ້ນໄມ້, ດອກໄມ້ຕາມແຄມຮົ້ວເຮືອນ ແລະ ອື່ນໆ ເຊິ່ງທັງໝົດເຫລົ່ານີ້ສ່ວນຫລາຍແມ່ນຊົມໃຊ້ນ້ຳປະປາເປັນຕົ້ນຕໍ. ດັ່ງນັ້ນ, ພວກເຮົາຈ່ົງຊ່ວຍກັນປະຢັດ ແລະ ຊົມໃຊ້ນ້ຳໃຫ້ມີປະໂຫຍດເພ່ືອຈະໄດ້ມີນ້ຳໃຊ້ຢ່າງຍືນຍົງຕະຫລອດໄປ. ນ້ຳແມ່ນມີຄວາມສຳຄັນຈຳເປັນຕໍ່ຊີວິດ. ພວກເຮົາຕ້ອງການນໍ້າ, ສັດ ແລະ ພືດພວກເຂົາກໍ່ຕ້ອງການນ້ຳ ເພື່ອການດຳລົງຊີວິດເຊັ່ນດຽວກັນ. ໃນຊຸມຊົນຕ່າງໆທີ່ມີນ້ຳໃຊ້ບໍ່ພຽງພໍ, ບັນຫາທາງສຸຂະພາບຫລາຍຢ່າງກໍ່ຈະເກີດຂຶ້ນ. ເມື່ອບໍ່ມີນ້ຳ, ຄົນເຮົາກໍ່ບໍ່ສາມາດປູກພືດເປັນອາຫານໄດ້ຢ່າງພຽງພໍທີ່ຈະກິນ ເຊິ່ງພາໃຫ້ເກີດພາວະຂາດສານອາຫານ ແລະ ບັນຫາສຸຂະພາບ ຫລາຍຢ່າງກໍ່ຈະເກີດຕາມມາ.
ດັ່ງທີ່ພວກເຮົາຮູ້ ນ້ຳສຳຄັນຫລາຍຕໍ່ທຸກສິ່ງທີ່ມີຊີວິດກໍ່ຄືການດຳລົງຊີວິດຂອງຄົນເຮົາ ເຊິ່ງມີຄຳເວົ້າໜຶ່ງທີ່ເຄີຍໄດ້ຍິນ ແລະ ເຄີຍເວົ້າກັນມາຕະຫລອດວ່າ: “ຂາດນ້ຳຄືຂາດໃຈ”. ປັດຈຸບັນນີ້, ຢູ່ປະເທດເຮົາຢູ່ທຸກພາກທຸກມຸນລ້ວນແລ້ວແຕ່ເລ່ີມມີອາກາດຮ້ອນອົບເອົ້າອັນໄດ້ເຮັດໃຫ້ການຊົມໃຊ້ນ້ຳເຂົ້າໃນການດຳລົງຊີວິດແມ່ນເພີ່ມຂຶ້ນ ຖ້າທຽບໃສ່ໄລຍະລະດູຝົນ ແລະ ອາກາດໜາວ. ການໃຊ້ນ້ຳປະປາແຕ່ງຢູ່ຄົວກິນໃນແຕ່ລະມື້ມັນເປັນເລື່ອງປົກກະຕິຂອງແຕ່ລະຄອບຄົວຢູ່ແລ້ວ, ແຕ່ອັນທີ່ໃຊ້ນ້ຳເພີ່ມຂຶ້ນນັ້ນແມ່ນການໃຊ້ນ້ຳອາບ, ຫົດຕົ້ນໄມ້, ດອກໄມ້, ຜັກຢູ່ຕາມແຄມຮົ້ວແຄມເຮືອນ ແລະ ອື່ນໆ (ໃນເມືອງ).
ສຳລັບຢູ່ຊົນນະບົດ ໂດຍສ່ວນໃຫຍ່ແມ່ນລັດຖະບານກໍ່ໄດ້ສຸມທຶນຮອນເຂົ້າໃນການກໍ່ສ້າງລະບົບນ້ຳລິນ ເພື່ອໃຫ້ປະຊາຊົນໄດ້ຊົມໃຊ້ນ້ຳສະອາດເຂົ້າໃນການດຳລົງຊີວິດປະຈຳວັນ ອັນໄດ້ຫລຸດຜ່ອນການແບກຫາບນ້ຳຈາກຫ້ວຍຮ່ອງມາໃຊ້ຄືເມື່ອກ່ອນຢ່າງສິ້ນເຊີງ. ແນວໃດກໍ່ດີມີຫລາຍບ້ານພາຍຫລັງລັດ ຖະບານໄດ້ກໍ່ສ້າງລະບົບນ້ຳລິນໃຫ້ແລ້ວ ກໍ່ໄດ້ພ້ອມກັນປຸກລະດົມຊ່ວຍກັນປົກປັກຮັກສາ ເພື່ອໃຫ້ເຄື່ອງໃຊ້ສ່ວນລວມໄດ້ຊົມໃຊ້ຢ່າງຍາວນານ ໂດຍສະເພາະແມ່ນປົກປັກຮັກສາປ່າໄມ້ຍອດຫ້ວຍ, ສາຍສົ່ງນ້ຳ, ອ່າງເກັບນ້ຳ, ກ໋ອກນ້ຳອື່ນໆ ອັນເຮັດໃຫ້ນ້ຳຫ້ວຍທີ່ຖືກສ້າງເປັນອ່າງນ້ຳລິນບໍ່ບົກແຫ້ງຈັກເທື່ອ.
ຂະນະທີ່ຍັງມີບາງບ້ານການປົກປັກຮັກສາສິ່ງຂອງສ່ວນລວມຍັງຖືເບົາ ບໍ່ພ້ອມກັນເອົາໃຈໃສ່ຮັກສາປ່າໄມ້ຍອດຫ້ວຍ ເຮັດໃຫ້ໄລຍະລະດູແລ້ງນີ້ ມີນ້ຳໄຫລມາໜ້ອຍ, ບໍ່ມີການສ້ອມແປງຄືນຫລັງເປ່ເພ, ການຊົມໃຊ້ນ້ຳກໍ່ບໍ່ປະຢັດເປີດນ້ຳຖິ້ມລ້າໆ. ພ້ອມນີ້, ກໍ່ບໍ່ມີການປຸກລະດົມລູກຫລານປະປ່ອຍໃຫ້ຫລິ້ນນ້ຳຕາມລຳພັງໃຈຢູ່ຕາມກ໋ອກນ້ຳເຮັດໃຫ້ ນ້ຳບໍ່ພຽງພໍຊົມໃຊ້. ແນວໃດກໍ່ດີເພື່ອໃຫ້ທົ່ວສັງຄົມໄດ້ໃຊ້ນ້ຳຢ່າງທົ່ວເຖິງກັນ ສັງຄົມຈົ່ງພ້ອມກັນໃຊ້ນ້ຳຢ່າງປະຢັດ ແລະ ຮູ້ຈັກການນຳໃຊ້ນ້ຳທີ່ເໝາະສົມ. ການປະຢັດນ້ຳກໍ່ແມ່ນການປະຢັດເງິນຂອງພວກເຮົາເຊັ່ນດຽວກັນ.
ພາກສ່ວນກ່ຽວຂ້ອງ ໂດຍສະເພາະແມ່ນລັດວິສາຫະກິດນ້ຳປະປາ ໄດ້ແນະນຳວິທີປະຢັດນ້ຳ ເປັນຕົ້ນແມ່ນເວລາອາບນ້ຳ ຄວນອາບນ້ຳດ້ວຍຝັກບົວ ເຊິ່ງສາມາດປະຢັດນໍ້າໄດ້ຫລາຍກວ່າໃຊ້ໂອຕັກນ້ຳອາບ ໂດຍໃຊ້ນ້ຳບໍ່ເກີນ 20 ລິດ/ຄ້ັງ/ ຄົນ. ໃນນ້ັນ, ເວລາຖູສະບູຄວນປິດກ໋ອກນ້ຳໄວ້, ອາບນ້ຳໃນອ່າງຈະສິ້ນເປືອງນ້ຳຫລາຍເຖິງ 110-200 ລິດ. ພ້ອມນີ້, ກໍ່ເປັນເຈົ້າການມີສະຕິໃນການນຳໃຊ້ນ້ຳຄື: ໝັ່ນສຳຫລວດລະບົບນ້ຳປະປາເປັນຕົ້ນໃຫ້ກວດກາກ໋ອກນ້ຳ, ສາຍທໍ່ ແລະ ສຸຂະພັນຕ່າງໆ ໃຫ້ຢູ່ໃນສະພາບທີ່ໃຊ້ງານໄດ້ດີ, ບໍ່ມີການຮົ່ວໄຫລ, ສ່ວນວິທີກວດແມ່ນປິດກ໋ອກນ້ຳໃນເຮືອນທັງໝົດ, ເບິ່ງດາວສີແດງຢູ່ໃນກົງເຕີນ້ຳປິ່ນບໍ, ເບິ່ງໂຕເລກໃນກົງເຕີນ້ຳສັງເກດວ່າໂຕເລກນ້ຳສີແດງປິ່ນບໍ? ຖ້າປິ່ນສະແດງວ່າມີນ້ຳຮົ່ວ ແລະ ສິ່ງສຳຄັນຮີບຮ້ອນກວດກາທໍ່ແຕກຮົ່ວໃນພື້ນທີ່ດິນເມື່ອຜິດສັງເກດ, ຖ້າເຫັນວ່ານ້ຳບ່ໍໄຫລແຮງ, ຜິດປົກກະຕິ, ພື້ນທີ່ດິນຍຸບລົງຕ່ຳກວ່າບ່ອນອື່ນ ແລະ ປຽກ ຫລື ຈົນເປັນບວມນ້ຳຕະຫລອດເວລາ ແລະ ຄ່ານໍ້າສູງຜິດປົກກະຕິໃຫ້ສົງໄສເລີຍວ່າມີທໍ່ນ້ຳແຕກຮົ່ວພາຍໃນບໍລິເວນບ້ານ. ສະນັ້ນ, ໃຫ້ຮີບຮ້ອນກວດກາ ແລະ ສ້ອມແປງທັນທີ ຫລື ສາມາດໂທແຈ້ງພະນັກງານນ້ຳປະປາສາຍດ່ວນໂດຍບໍ່ເສຍຄ່າ 1169 ບໍລິ ການຕະຫລອດ 24 ຊົ່ວໂມງ.
ໂດຍ: ຢ່າຕົ່ງ
KPL
