*ອີງຕາມການໃຫ້ຮູ້ຂອງທ່ານ ແກ້ວ ລີບຸດດາຄໍາ ອະດີດເຈົ້າເມືອງ ບົວລະພາ (ເຊິ່ງເປັນເມືອງທີ່ໄດ້ຮັບນາມມະຍົດເປັນເມືອງວິລະຊົນ) ປັດຈຸບັນທ່ານຍັງປະຕິບັດໜ້າທ່ີເປັນປະທານສະຫະພັນນັກຮົບເກົ່າ ເມືອງບົວລະພາ ແຂວງຄຳມ່ວນ ໄດ້ສະແດງຄວາມຮູ້ສຶກຕໍ່ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ (22 ມີນາ 1955-22 ມີນາ 2025) ຜ່ານສື່ມວນຊົນວ່າ: ໃນນາມເປັນອະດີດການນໍາຂັ້ນເມືອງຮູ້ສຶກເປັນກຽດ, ມີຄວາມພາກພູມໃຈເປັນຢ່າງຍິ່ງທີ່ເຫັນໄດ້ວ່າພັກປະຊາຊົນ ປະຕິວັດລາວ ມີຄວາມໝັ້ນຄົງ, ເຕີບໃຫຍຂະຫຍາຍຕົວ, ເຂັ້ມແຂງ, ໜັກແໜ້ນ, ພັກປະຊາຊົນປະຕິວັດລາວ ໄດ້ນຳພາປວງຊົນລາວບັນດາເຜົ່າບູລະນະ, ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ນັບມື້ນັບຈະເລີນຮຸ່ງເຮືອງ. 

    ທ່ານ ແກ້ວ ລີບຸດດາຄໍາ ກ່າວວ່າ: ພັກປະຊາຊົນ ປະຕິວັດລາວ ໄດ້ກຳເນີດເຕີບໃຫຍ່ເນື້ອແທ້ຂອງພັກ ແມ່ນເພື່ອອຸດົມການ ແລະ ເປົ້າໝາຍ ເພື່ອນຳພາປະເທດຊາດກ້າວໄປສູ່ຄວາມຈະເລີນສີວິໄລ, ຕະຫລອດໄລຍະ 70 ປີຜ່ານມາ ເຫັນວ່າພັກເຮົາມີຜົນງານອັນໂດດເດັ່ນ ໃນການນຳພາທົ່ວປວງຊົນລາວທັງຊາດ ປຸກລະດົມປະຊາຊົນບັນດາເຜົ່າໃຫ້ເປັນຈິດໜຶ່ງໃຈດຽວ ແລະ ນຳພາຕໍ່ສູ້ຕ້ານພວກຈັກກະພັດລ່າເມືອງຂຶ້ນ ເພື່ອນຳເອົາຄວາມເປັນເອກະລາດແຫ່ງຊາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ສິດເປັນເຈົ້າມາໃຫ້ປະຊາຊົນ, ຍ້ອນມີພັກນໍາພາທີ່ສະຫລາດສ່ອງໃສ, ເດັດຂາດ, ມີອຸດົມການ ແລະ ເປົ້າໝາຍອັນຖືກຕ້ອງ ຈຶ່ງເຮັດໃຫ້ປະເທດຊາດສາມາດປົດປ່ອຍ ແລະ ປະກາດເອກະລາດຂຶ້ນໃນວັນທີ 02 ທັນວາ 1975. ພາຍຫລັງປົດປ່ອຍຊາດ ພັກເຮົາກໍ່ໄດ້ນໍາພາຊວງຊົນລາວ ປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ໝັ້ນຄົງ ແລະ ສີວິໄລ ໂດຍການພັດທະນາພື້ນຖານໂຄງລ່າງ ແລະ ພື້ນຖານເສດຖະກິດໃຫ້ເຕີບໃຫຍ່ຂະຫຍາຍຕົວ. ສຳລັບຢູ່ເມືອງບົວລະພາ ມາຮອດປັດຈຸບັນແມ່ນມີການພັດທະນາໃນທຸກດ້ານ, ລະຫວ່າງບ້ານຕໍ່ບ້ານແມ່ນມີເສັ້ນທາງເຂົ້າເຖິງ, ປະຊາຊົນໄດ້ຊົມໃຊ້ໄຟຟ້າເກືອບ 100%, ມີລະບົບໂທລະຄົມນໍາໃຊ້ໄດ້ຢ່າງກວ້າງຂວາງ, ມີລະບົບຊົນລະປະທານຕອບສະໜອງໃຫ້ແກ່ການຜະລິດຂອງພໍ່ແມ່ປະຊາຊົນ ທັງລະດູຝົນ ແລະ ລະດູແລ້ງ ຈໍາ ນວນໜຶ່ງ, ທາງດ້ານລະບົບການເມືອງແມ່ນມີຄວາມສະຫງົບ ເປັນ ເງື່ອນໄຂເຮັດໃຫ້ປະຊາຊົນສາມາດ ທຳມາຫາກິນ, ຄ້າຂາຍ-ແລກປ່ຽນ ສິນຄ້າ ໄດ້ຢ່າງສະດວກ, ດ້ານລະ ບົບການສຶກສາ, ສາທາລະນະສຸກ ໄດ້ມີການຂະຫຍາຍຢ່າງທົ່ວເຖິງ ນັ້ນສະແດງເຖິງພັກເຮົາມີແນວທາງນະໂຍບາຍທີ່ຖືກຕ້ອງ ແລະ ການຕັດສິນໃຈເຮັດແທ້ທຳຈິງ ຂອງການນຳໃນແຕ່ລະຂັ້ນ, ແຕ່ລະ ຍຸກສະໄໝເຮັດໃຫ້ບ້ານເມືອງ ໄດ້ຮັບການພັດທະນາ ແລະ ເຕີບໃຫຍ່ເຂັ້ມແຂງ. 

     ໃນໂອກາດວັນສ້າງຕັ້ງພັກ ປປ ລາວ ຄົບຮອບ 70 ປີ ນີ້, ທ່ານ ລີ ແກ້ວບຸດດາຄໍາ ຍັງໄດ້ສະແດງຄວາມຊົມເຊີຍ ແລະ ຮູ້ບຸນຄຸນມາຍັງການນຳພັກ-ລັດ ແຕ່ລະຍຸກສະໄໝ ແລະ ການນຳແຕ່ລະຂັ້ນ ທີ່ໄດ້ນໍາພາປວງຊົນລາວປົດປ່ອຍຊາດ, ປະກາດເອກະລາດ, ອະທິປະໄຕ ແລະ ນໍາພາປະຕິບັດໜ້າທີ່ປົກປັກ ຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນກ້າວໜ້າ, ປະຊາຊົນມີຄວາມຜາສຸກ, ສັງຄົມມີຄວາມສະຫງົບ ແລະ ສີວິໄລ.

ໂດຍ: ນັກຂ່າວຄຳມ່ວນ

KPL