*ໄລຍະແຕ່ປີ 1961 - 1973, ແມ່ນໄລຍະແຫ່ງການຕໍ່ສູ້ປົກປັກຮັກສາ 2 ແຂວງເຕົ້າໂຮມ ແລະ ຕີເອົາຊະນະຍຸດທະສາດສົງຄາມພິເສດ, ສົງຄາມພິເສດເພີ່ມທະວີ ຂອງພວກລ່າເມືອງຂຶ້ນແບບໃໝ່. ໂດຍສືບຕໍ່ມູນເຊື້ອຂອງກໍາລັງສັນຕິລາດ ໃນການຈັດຕັ້ງເອົາກໍາລັງ ລົງຮາກຖານປຸກລຸກຂົນຂວາຍປະຊາຊົນເຂົ້າໃນການກໍ່ສ້າງ 2 ແຂວງ ເຕົ້າໂຮມ ແລະ ເຫດການປະຫວັດສາດມະຫັດສະຈັນນໍາເອົາຜູ້ນໍາຂອງຝ່າຍແນວລາວຮັກຊາດທີ່ຖືກຄຸມຂັງຢູ່ຄຸກໂພນເຄັງອອກໄປສູ່ເຂດທີ່ໝັ້ນຢ່າງປອດໄພ.

     ກໍາລັງປ້ອງກັນຄວາມສະຫງົບ ປະຊາຊົນ ໄດ້ປະກອບສ່ວນຢ່າງຕັ້ງໜ້າເຂົ້າໃນການຕີເອົາຊະນະສັດຕູຢູ່ທຸກໆສະໜາມຮົບໃນທົ່ວປະເທດເຊັ່ນ: ປີ 1961-1962 ກໍາລັງປ້ອງກັນຄວາມສະຫງົບຮ່ວມກັບກອງທັບບຸກໂຈມຕີສັດຕູຢູ່ສາລາພູຄູນ, ທາງເລກ 8, 9, 12 ແລະ  ປົດປ່ອຍຫລວງນໍ້າທາ ບັງຄັບໃຫ້ພວກມັນຕ້ອງຍອມເຊັນສັນຍາເຊີແນວກ່ຽວກັບລາວ ແລະ ປະຕິບັດການຮ່ວມລາວຄັ້ງທີ II ສ້າງຕັ້ງລັດຖະບານປະສົມ 3 ຝ່າຍ. ປີ 1968- 1973 ກໍາລັງປ້ອງກັນຄວາມສະຫງົບຮ່ວມກັບກອງທັບບຸກໂຈມຕີ ສັດຕູຢູ່ບັ້ນຮົບນ້ໍາບາກ, ບັ້ນຮົບກູ້ກຽດ, ບັ້ນຮົບລາມເຊີນ 719 ແລະ ບັ້ນຮົບອື່ນໆ ເຮັດໃຫ້ຍຸດທະສາດສົງຄາມພິເສດ ແລະ ສົງຄາມພິເສດ ເພີ່ມທະວີຂອງພວກຈັກກະພັດລ່າເມືອງຂຶ້ນແບບໃໝ່ປະລາໄຊຢ່າງຮາບຄາບ, ບັງຄັບໃຫ້ພວກມັນຕ້ອງຍອມເຊັນສັນຍາວຽງຈັນ ວັນທີ 21 ກຸມພາ 1973 ກ່ຽວກັບລາວ, ຍອມຈັດຕັ້ງລັດຖະບານປະສົມ ແລະ ຄະນະມົນຕີປະສົມການເມືອງແຫ່ງຊາດ, ຮັບຮູ້ 2 ຕົວເມືອງເປັນກາງ (ນະຄອນຫລວງວຽງຈັນ ແລະ ຫລວງພະບາງ), ສ້າງຄວາມປອງດອງຊາດຄັ້ງທີ III. ໄລຍະແຕ່ປີ 1973-1975, ແມ່ນໄລຍະແຫ່ງການຕໍ່ສູ້ກະກຽມ ແລະ ດໍາເນີນການຍາດເອົາໄຊຊະນະຢ່າງສົມບູນ, ສ້າງຕັ້ງລະບອບໃໝ່ ສປປ ລາວ. ກໍາລັງປ້ອງກັນຄວາມສະຫງົບໄດ້ຮັບການປັບປຸງ, ກໍ່ສ້າງກໍາລັງມີຈໍານວນພົນ 1.000 ສະຫາຍ, ໂດຍເລືອກເອົາທະຫານມາຝຶກອົບຮົມໄລຍະສັ້ນວຽກງານວິຊາສະເພາະຕໍາຫລວດ ແລ້ວສົ່ງເຂົ້າປະສົມກັບຕໍາຫລວດຂອງຝ່າຍວຽງຈັນ ຢູ່ 2 ນະຄອນເປັນກາງ (ວຽງຈັນ ແລະ ຫລວງພະບາງ). ພາຍໃຕ້ການນໍາພາຂອງພັກກໍາລັງປ້ອງກັນຄວາມສະຫງົບ ໄດ້ພ້ອມກັບກໍາລັງປະຕິວັດທີ່ຮັກຊາດໃນທົ່ວປະເທດລຸກຮືຂຶ້ນໂຄ່ນລົ້ມລະບອບສັກດີນາທີ່ຄົງຕົວຢູ່ປະເທດເຮົາມາໄດ້ຫລາຍຮ້ອຍປີ ແລະ ສະຖາປະນາ ສປປ ລາວ ໃນວັນທີ 2 ທັນວາ 1975.

     ໄລຍະແຕ່ປີ 1975-1986, ແມ່ນໄລຍະແຫ່ງການປົກປັກຮັກສາ ແລະ ບູລະນະປະເທດຊາດ. ປະເທດຊາດຫາກໍໄດ້ຮັບການປົດປ່ອຍສະພາບເສດຖະກິດ, ວັດທະນະທໍາ - ສັງຄົມຍັງມີຄວາມຫຍຸ້ງຍາກ; ບັນດາອິດທິກໍາລັງປໍລະປັກໄດ້ຕັ້ງໜ້າເຄື່ອນໄຫວມ້າງເພທໍາ ລາຍລະບອບໃໝ່ຂອງພວກເຮົາຢ່າງຮອບດ້ານ. ຕໍ່ໜ້າສະພາບການດັ່ງກ່າວ ສູນກາງພັກປະຊາຊົນ ປະຕິວັດລາວ ໄດ້ເນັ້ນວ່າ: ວຽກງານປ້ອງກັນຊາດ - ປ້ອງກັນຄວາມສະຫງົບ ຍັງແມ່ນໜ້າທີ່ແຖວໜ້າ ແລະ ສໍາຄັນອັນດັບໜຶ່ງ. ປະຕິບັດຕາມທິດດັ່ງກ່າວ ກໍາລັງປ້ອງກັນຄວາມສະຫງົບ ໄດ້ສົມທົບແໜ້ນກັບກອງທັບ ແລະ ປະຊາຊົນລາວບັນດາເຜົ່າຕໍ່ສູ້ສະກັດກັ້ນ ແລະ ແກ້ໄຂສະພາບຄວາມບໍ່ສະຫງົບຢູ່ບາງຕົວເມືອງໃຫຍ່ ແລະ ບາງບໍລິເວນ; ຄຽງບ່າຄຽງໄຫລ່ກັບກອງທັບ ແລະ ປະຊາຊົນລາວ ຕີເອົາຊະນະການແຊກແຊງ, ເກາະຜິດ, ບຽດຢຶດດິນແດນຂອງພວກປະຕິການຂວາຈັດ, ເປັນເຈົ້າການປ້ອງກັນຜູ້ນຳ ແລະ ອົງການນໍາຂອງພັກ-ລັດໃຫ້ມີຄວາມປອດໄພ.

    ປີ 1976 ກໍາລັງປ້ອງກັນຄວາມສະຫງົບໄດ້ສືບຮູ້, ສະກັດກັ້ນການລັກພາຕົວເຈົ້າຊີວິດ ສີສະຫວ່າງວັດທະນາ ໂຕນໄປຕ່າງປະເທດ; ການລັກພາຕົວ ທ່ານ ອາສະໂອະ ທູດການຄ້າຍີ່ປຸ່ນ ແລະ ແກ້ໄຂນັກໂທດ 339 ຄົນ ໂຕນຄຸກຊໍາເຄ້ ຊຶ່ງສາມາດຈັບໄດ້ຄືນ 312 ຄົນ. ພ້ອມກັນນັ້ນ, ກຳລັງປ້ອງກັນຄວາມສະຫງົບ ຍັງເປັນກໍາລັງຫລັກແຫລ່ງຕ້ົນຕໍໃນການແກ້ໄຂປະກົດການຫຍໍ້ທໍ້ ແລະ ສິ່ງເສດເຫລືອຂອງສັງຄົມເກົ່າປະໄວ້, ເຮັດໃຫ້ສັງຄົມມີຄວາມເປັນລະບຽບຮຽບຮ້ອຍດີ, ອັນພົ້ນເດັ່ນແມ່ນການດັດສ້າງຂ້າຣາຊະການ, ທະຫານ, ຕໍາຫລວດ ຂອງຝ່າຍລາຊະອານາຈັກ ແລະ ພວກນັກເລງອັນຕະພານທີ່ສັງຄົມເກົ່າປະໄວ້.

     ໄລຍະດໍາເນີນແນວທາງປ່ຽນແປງໃໝ່, ນັບແຕ່ປີ 1986 ເປັນ ຕົ້ນມາ ໂດຍສະເພາະແມ່ນກອງປະຊຸມໃຫຍ່ ຄັ້ງທີ IV ຂອງພັກໄດ້ວາງທິດທາງໜ້າທີ່ຄື: ປັບປຸງວຽກງານປ້ອງກັນຄວາມສະຫງົບຮອບດ້ານຢູ່ພື້ນຖານ; ຈັດຕັ້ງແນວຮົບປ້ອງກັນຊາດ-ປ້ອງກັນຄວາມສະຫງົບຢູ່ທ້ອງຖິ່ນຢ່າງແໜ້ນໜາ; ຕັ້ງໜ້າປັບປຸງ, ຍົກສູງຄຸນນະພາບຂອງບັນດາກຳລັງທະຫານ ແລະ ກຳລັງປ້ອງກັນຄວາມສະຫງົບ, ເດັດດ່ຽວທັບມ້າງທຸກການເຄື່ອນໄຫວມ້າງເພທຳລາຍຂອງສັດຕູ ແລະ ປົກປັກຮັກສາປະເທດຊາດໄວ້ໃຫ້ໝັ້ນຄົງ. ປະທານ ໄກສອນ ພົມວິຫານ ໄດ້ໂອ້ລົມ ແລະ ໄດ້ເນັ້ນໜັກ 3 ໜ້າທີ່ຄື: ໜຶ່ງ: ຕໍາຫລວດຕ້ອງຮູ້ເຮັດວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດ. ສອງ: ຕໍາຫລວດຕ້ອງຢູ່ເຮັດວຽກງານສືບຂ່າວກໍາສະພາບການ. ສາມ: ຕໍາຫລວດຕ້ອງຮູ້ກົດໝາຍພາຍໃນ ແລະ ຕ່າງປະເທດ. ປະຕິບັດຕາມມະຕິ IV ຂອງພັກ ແລະ ຄໍາເຫັນໂອ້ລົມ ຂອງປະທານ ໄກສອນ ພົມວິຫານ ກໍາລັງປ້ອງກັນຄວາມສະຫງົບ ໄດ້ສົມທົບແໜ້ນກັບກອງທັບປະຊາຊົນລາວ ຕີເອົາຊະນະການບຽດຢຶດຂອງພວກປະຕິການຂວາຈັດຢູ່ສະໜາມຮົບບ່ໍແຕນ ແຂວງໄຊຍະບູລີ; ທັບມ້າງກົນອຸບາຍຫັນປ່ຽນໂດຍສັນຕິຂອງສັດຕູ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ຂອງສັງຄົມ, ອັນພົ້ນເດັ່ນແມ່ນການແກ້ໄຂແນວຄິດລະແວງສົງໄສ ແລະ ທັດສະນະຜິດເຂວກ່ຽກັບສັງຄົມນິຍົມ, ແນວຄິດຫລາຍ ພັກຫລາຍເຄົ້າ, ປະຊາທິປະໄຕເສລີ ແລະ ບັນຫາອື່ນໆ. ກໍາລັງປ້ອງກັນຄວາມສະຫງົບໄດ້ສືບຕໍ່ຫັນເອົາກໍາລັງລົງກ່ໍສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ປັບປຸງກໍ່ສ້າງກໍາລັງ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ ຢູ່ ຮາກຖານໃຫ້ເຂັ້ມແຂງຕາມ 4 ເນື້ອ ໃນ 4 ຄາດໝາຍ, ເຮັດໃຫ້ສະພາບການທົ່ວປະເທດມີຄວາມສະຫງົບ, ອັນພົ້ນເດັ່ນແມ່ນການປ້ອງກັນອົງການນຳຂອງພັກ-ລັດ, ປ້ອງກັນກອງປະຊຸມລະດັບຊາດ ແລະ ກອງປະຊຸມລະດັບສາກົນຕ່າງໆໃຫ້ມີຄວາມປອດໄພ 100%, ເປັນເຈົ້າການປົກປ້ອງເຂດນໍ້າແດນດິນແກ້ໄຂບັນຫາຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ, ເຮັດໃຫ້ປະເທດຊາດມີຄວາມສະຫງົບທາງດ້ານການເມືອງ ແລະ ສັງຄົມມີຄວາມເປັນລະບຽບຮຽບຮ້ອຍ.

KPL