ຂປລ
ລາຄາທອງແດງ ໃນຕະຫລາດໂລກ ເພີ່ມຂຶ້ນສູງສຸດ ໃນຮອບ 5 ເດືອນ ທ່າມກາງ ຄວາມວິກິດ ກັງວົນຂອງ ພາກສ່ວນ ທີ່ກ່ຽວຂ້ອງ ລະບຸວ່າ ສ.ອາເມລິກາ ຈະຂຶ້ນພາສີ ໃນແຮ່ທາດ ສຳຄັນ.
ຂປລ. ສຳນັກຂ່າວ ຕ່າງປະເທດ ລາຍງານ ຈາກ ນະຄອນຫລວງ ວໍຊິງຕັນ ປະເທດ ສ.ອາເມລິກາ ເມື່ອວັນທີ 20 ມີນາ, ລາຄາທອງແດງ ໃນຕະຫລາດໂລກ ເພີ່ມຂຶ້ນສູງສຸດ ໃນຮອບ 5 ເດືອນ ທ່າມກາງ ຄວາມວິກິດ ກັງວົນຂອງ ພາກສ່ວນ ທີ່ກ່ຽວຂ້ອງ ລະບຸວ່າ ສ.ອາເມລິກາ ຈະຂຶ້ນພາສີ ໃນແຮ່ທາດ ສຳຄັນ.
ໂດຍລາຄາ ການຊື້ຂາຍ ທອງແດງ ໃນຕະຫລາດໂລກ ເພີ່ມຂຶ້ນເຖິງ 10.046,50 ໂດລາ ສະຫະລັດ ຕໍ່ໂຕນ ໃນໄລຍະຂອງການຊື້ຂາຍ, ຊຶ່ງເປັນ ລາຄາສູງທີ່ສຸດ ນັບຕັ້ງແຕ່ ເດືອນຕຸລາ ປີກາຍ ຜ່ານມາ. ຖ້າຫາກລັດຖະບານ ສ.ອາເມລິກາ ກຳນົດ ກຳແພງພາສີ ກັບ ທອງແດງ ຈະເປັນການ ເພີ່ມຄວາມເຄັ່ງຕຶງ ໃຫ້ກັບຄວາມສຳພັນກັບ ຊີເລ ຊຶ່ງເປັນ ປະເທດ ຜູ້ຜະລິດທອງແດງ ຂະໜາດໃຫຍ່ທີ່ສຸດ ຂອງ ໂລກ ແລະ ສ.ອາເມລິກາ ນໍາເຂົ້າທອງແດງ ຈາກ ຊີເລ ໃນອັດຕາສ່ວນ 35%. ປັດຈຸບັນ ສ.ອາເມລິກາ ອາໄສ ການນໍາເຂົ້າ ທອງແດງ ເປັນຫລັກ ເພື່ອຕອບສະໜອງ ກັບ ຄວາມຕ້ອງການ ພາຍໃນ ປະເທດ ຊຶ່ງໃຊ້ ວຽກງານ ທາງດ້ານການທະຫານ, ການຜະລິດແບດເຕີຣີ ລົດໄຟຟ້າ ແລະ ການພັດທະນາ ກ່ຽວຂ້ອງກັບ ປັນຍາທຽມ (ເອໄອ)./
KPL
