ຂປລ
ຂປລ. ໃນໂອກາດເຂົ້າຮ່ວມສໍາມະນາວິທະຍາສາດ ພາຍໃຕ້ຫົວຂໍ້ “70 ປີ ພາຍໃຕ້ການນໍາພາຂອງພັກທີ່ມີກຽດສະຫງ່າ” ຢູ່ແຂວງອຸດົມໄຊ ເມື່ອບໍ່ດົນມານີ້, ທ່ານ ວິສູກ ພົມພິທັກ ຮອງຫົວໜ້າຄະນະຕັ້ງສູນກາງພັກ ໄດ້ໃຫ້ຮູ້ວ່າ: ໜ້າທີ່ການເມືອງຂອງພັກໄລຍະໃໝ່ ເລັ່ງທວງໃຫ້ພັກຕ້ອງກໍ່ສ້າງ-ປັບປຸງຕົນເອງ ເພື່ອເຮັດຫລ້ອນ ພາລະກໍາປະຫວັດສາດ ໃນການນໍາພາປະຊາຊົນລາວບັນດາເຜົ່າ ເຮັດສໍາເລັດພາລະກິດປະຕິວັດຂອງຊາດ ໃນແຕ່ລະໄລຍະ
ຂປລ. ໃນໂອກາດເຂົ້າຮ່ວມສໍາມະນາວິທະຍາສາດ ພາຍໃຕ້ຫົວຂໍ້ “70 ປີ ພາຍໃຕ້ການນໍາພາຂອງພັກທີ່ມີກຽດສະຫງ່າ” ຢູ່ແຂວງອຸດົມໄຊ ເມື່ອບໍ່ດົນມານີ້, ທ່ານ ວິສູກ ພົມພິທັກ ຮອງຫົວໜ້າຄະນະຕັ້ງສູນກາງພັກ ໄດ້ໃຫ້ຮູ້ວ່າ: ໜ້າທີ່ການເມືອງຂອງພັກໄລຍະໃໝ່ ເລັ່ງທວງໃຫ້ພັກຕ້ອງກໍ່ສ້າງ-ປັບປຸງຕົນເອງ ເພື່ອເຮັດຫລ້ອນ ພາລະກໍາປະຫວັດສາດ ໃນການນໍາພາປະຊາຊົນລາວບັນດາເຜົ່າ ເຮັດສໍາເລັດພາລະກິດປະຕິວັດຂອງຊາດ ໃນແຕ່ລະໄລຍະ ໂດຍສະເພາະ ແມ່ນນໍາພາພາລະກິດ ປ່ຽນແປງໃໝ່ຮອບດ້ານ ທີ່ມີຫລັກການຂອງພັກ ໃນການຜ່ານຜ່າຄວາມຫຍຸ້ງຍາກ ທາງດ້ານເສດຖະກິດ, ເຮັດໃຫ້ຊີວິດການເປັນຢູ່ທາງດ້ານວັດຖຸ, ຈິດໃຈຂອງປະຊາຊົນດີຂຶ້ນເທື່ອລະກ້າວນັ້ນ, ມີຄວາມຈໍາເປັນຕ້ອງກໍ່ສ້າງ-ປັບປຸງພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນໃນທຸກດ້ານ ເພື່ອໃຫ້ມີຄວາມສາມາດພຽງພໍໃນ ນໍາພາລັດ ແລະ ນໍາພາການກໍ່ສ້າງເສດຖະກິດ ໃຫ້ມີບາດກ້າວຂະຫຍາຍຕົວໃໝ່ທີ່ໜັກແໜ້ນ, ສາມາດ ແຂ່ງຂັນກັບບັນດາປະເທດອ້ອມຂ້າງ ແລະ ຍົກສູງລະດັບຊີວິດການເປັນຢູ່ຂອງພະນັກງານ, ສະມາຊິກພັກ ແລະ ປະຊາຊົນດີຂຶ້ນ.
ການກໍ່ສ້າງປັບປຸງປົວແປງຕົນເອງຂອງພັກ ເປັນບັນຫາສໍາຄັນພົວພັນເຖິງການຄົງຕົວ, ການຂະຫຍາຍຕົວຂອງພັກ, ຂອງປະເທດຊາດ ແລະ ຂອງລະບອບປະຊາທິປະໄຕ ປະຊາຊົນຢູ່ປະເທດເຮົາ.ດັ່ງນັ້ນ, ໃນໄລຍະຜ່ານມາ ພັກເຮົາຍາມໃດກໍຖືເອົາການຕິຊົມຕົນເອງ ແລະ ຕິຊົມກັນພາຍໃນພັກເປັນໜຶ່ງ ໃນຫລັກການກໍ່ສ້າງພັກທີ່ສໍາຄັນທີ່ສຸດ.
ທ່ານ ວິສູກ ພົມພິທັກ ຍັງໃຫ້ອີກວ່າ: ຜົນສໍາເລັດອັນພື້ນຖານກວ່າໝູ່ ນັບແຕ່ສ້າງຕັ້ງພັກ ມາຮອດປັດຈຸບັນ, ພັກເຮົາໄດ້ດໍາເນີນກໍ່ສ້າງ-ປັບປຸງພັກ ແມ່ນຖືກຫລັກການ, ຖືກກົດເກນ ເປັນຕົ້ນທາງດ້ານການເມືອງ-ແນວຄິດ ແມ່ນໄດ້ຍຶດຖືເອົາລັດທິມາກ-ເລນິນ, ແນວຄິດ ໄກສອນ ພົມວິຫານ, ມູນເຊື້ອອັນດີງາມຂອງພັກ ເປັນພື້ນຖານແນວຄິດ ແລະ ການເຄື່ອນໄຫວຂອງພັກທຸກປະການ, ໄດ້ຕັ້ງໜ້າຄົ້ນຄວ້າ, ໝູນໃຊ້ຫລັກມູນທິດສະດີ ຂອງລັດທິມາກ-ເລນິນ ເຂົ້າໃນເງື່ອນໄຂສະພາບການຕົວຈິງ ຂອງການປະຕິວັດໃນແຕ່ລະໄລຍະ. ດັ່ງນັ້ນ, ຈຶ່ງສາມາດປະດິດສ້າງ, ສ້າງຕັ້ງພັກຂອງຊົນຊັ້ນກໍາມະກອນ. ນັບແຕ່ໄດ້ຮັບການສ້າງຕັ້ງພັກ ໄດ້ກໍານົດແຈ້ງ ພາລະກໍາປະຫວັດສາດ ຂອງຊົນຊັ້ນກໍາມະກອນໃນຍຸກສະໄໝ ຈຶ່ງເຮັດໃຫ້ການປະຕິວັດລາວ ເດີນຖືກກັບກົດເກນຂອງການປະຕິວັດໂລກ, ສາມາດຜາບແພ້ຈັກກະພັດປົດປ່ອຍປະເທດຊາດ, ຍາດເອກະລາດມາໃຫ້ແກ່ປະຊາຊົນລາວ, ປັດຈຸບັນແມ່ນສືບຕໍ່ນໍາພາພາລະກິດປ່ຽນແປງໃໝ່ ຍູ້ການປະຕິວັດ ໃຫ້ກ້າວຂຶ້ນຢ່າງບໍ່ຢຸດຢັ້ງ. ສະນັ້ນ, ການກໍ່ສ້າງປັບປຸງພັກຢູ່ປະເທດເຮົາ ແມ່ນມີຄວາມຈໍາເປັນ, ມີແຕ່ຍຶດໝັ້ນທັດສະນະຮັບເອົາການປັບປຸງຕົນເອງ ແລະ ຕັດສິນໃຈປັບປຸງປ່ຽນແປງຕົນເອງຢ່າງເຂັ້ມງວດ, ຖືກຫລັກການ ພັກເຮົາຈຶ່ງຈະຄົງຕົວ ແລະ ເຮັດລ້ອນພາລະ ກິດປະຕິວັດ ທີ່ຊົນຊັ້ນກໍາມະກອນ ແລະ ປະຊາຊົນລາວມອບໝາຍໃຫ້.
ຂ່າວ-ພາບ: ຂັນໄຊ
KPL
