*ປີ 2025 ນີ້, ແຂວງບໍ່ແກ້ວ ໄດ້ເປົ້າສູ້ຊົນຫລາຍໜ້າວຽກທີ່ຍັງຄົງຄ້າງໃຫ້ປະສົບຜົນສຳເລັດຕາມແຜນທ່ີວາງໄວ້ ໂດຍສະເພາະແມ່ນວຽກງານກ່ໍສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ ເຊິ່ງເປັນແນວໃດນັ້ນພວກເຮົາໄປຮູ້ພ້ອມໆກັນ. ຢູ່ໃນກອງປະຊຸມສະຫລຸບຖອດຖອນບົດຮຽນວຽກງານຫ້ອງວ່າການ, ວຽກກໍ່ສ້າງຮາກການເມືອງປີ 2024 ແລະ ທິດທາງແຜນການ 2025 ທ່ີຈັດຂ້ຶນບ່ໍດົນນີ້ວ່າ: ຄະນະພັກແຕ່ລະຂັ້ນແມ່ນໄດ້ເອົາໃຈໃສ່ຖືເອົາວຽກງານກ່ໍສ້າງຮາກຖານການເມືອງເປັນ ສຳຄັນເຮັດໃຫ້ຢູ່ຂັ້ນຮາກຖານມີຄວາມເຂ້ັມແຂງ, ໄດ້ກຳນົດແຜນວຽກຂອງຕົນເປັນແຕ່ລະໄລຍະ ແລະ ໄດ້ນຳເອົາບັນດານິຕິກໍາຂອງພັກ-ລັດ ມາຈັດຕັ້ງຜັນຂະຫຍາຍ ເປັນມະຕິ, ຄຳສັ່ງ, ຄຳແນະນໍາຂອງຄະນະປະຈຳພັກ, ໄດ້ແບ່ງຄວາມຮັບຜິດຊອບໃນການຊີ້ນໍາ ວຽກງານກ່ໍສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະ ວຽກ 3 ສ້າງ ແມ່ນຕ້ອງໄດ້ເອົາໃຈໃສ່ສືບຕໍ່ຄົ້ນຄວ້າ ແລະ ປັບປຸງກົນໄກ, ວິທີການປັບປຸງລະບົບການເມືອງຢູ່ຮາກຖານໃຫ້ເຂັ້ມແຂງນໍາພາສັງຄົມຈັດຕັ້ງປະຕິບັດ 2 ໜ້າທີ່ຍຸດທະສາດ, ເພີ່ມທະວີຄວາມຮັບຜິດຊອບແບ່ງຂັ້ນຄຸ້ມຄອງໃຫ້ທ້ອງຖິ່ນຫລາຍຂຶ້ນ. ການຫັນລົງກ່ໍສ້າງຮາກຖານການເມືອງຕາມສາຍວິຊາສະເພາະ, ສຸມງົບປະມານ, ເຕັກນິກ-ວິຊາການຂອງຕົນເຂ້ົາໃສ່ແກ້ໄຂວຽກງານທີ່ຍັງຄົງຄ້າງຢູ່ບັນດາບ້ານຈຸດສຸມຢ່າງເປັນເຈົ້າການແຕ່ຫົວທີ່, ການຂຸດຄົ້ນນໍາໃຊ້ທ່າແຮງຢູ່ກັບທີ່ສ້າງເສດຖະກິດເອກະລາດເປັນເຈ້ົາຕົນເອງປະຕິບັດຂໍ້ແຂ່ງຂັນ “ຮັກຊາດ ແລະ ພັດທະນາ”, “ 3 ເຂັ້ມ 3 ບຸກ” ຕິດພັບກັບຂອງຂະແໜງການ. ສືບຕ່ໍສ້າງເມືອງປາກທາ ໃຫ້ກາຍເປັນເມືອງພົ້ນທຸກ; ສ້າງຄອບຄົວພ້ົນທຸກໃຫ້ໄດ້ 2.446 ຄອບຄົວ; ສ້າງບ້ານພົ້ນທຸກ19 ບ້ານ, ສ້າງເມືອງຫ້ວຍຊາຍ ແລະ ຫເມືອງຕົ້ນເຜິ້ງ ໃຫ້ກາຍເປັນເມືອງເຂັ້ນແຂງຮອບດ້ານ; ສືບຕໍ່ປະຕິບັດຕາມ 4 ມາດຕະຖານ 6 ຕົວຊີ້ບອກທີ່ຍັງບໍ່ທັນບັນລຸຄື: ສ້າງຄອບຄົວ ແລະ ບ້ານພັດທະນາໃຫ້ກວມ 85% ຂຶ້ນໄປ; ສ້າງຖານລາຍຮັບເພື່ອຕອບສະໜອງໃຫ້ແກ່ລາຍຈ່າຍ, ມີເງິນແຮ່ສຸກເສີນຕາມນະໂຍບາຍງົບປະມານ; ສ້າງເປັນເມືອງກໍາມະບານ 5 ເປັນເຈົ້າ ແລະ ເປັນເມືອງສະຫະພັນນັກຮົບເກົ່າ 3 ດີ 6 ຮັກສາ; ສ້າງບ້ານປ້ອງກັນຊາດເຂັ້ມແຂງ-ບ້ານປ້ອງກັນຄວາມສະຫງົບດີໃຫ້ກວມ 85% ຂຶ້ນໄປ. ສືບຕໍ່ນຳພາ-ຊີ້ນໍາ, ຕິດຕາມ, ຊຸກຍູ້ການຈັດຕ້ັງປະຕິບັດວຽກງານກໍ່ສ້າງຮາກຖານການເມືອງວຽກງານພັດທະນາຊົນນະບົດ ແລະ ວຽກງານ 3 ສ້າງ ຢູ່ໃນ 46 ຈຸດສຸມຂອງແຂວງສຸມໃສ່ແກ້ໄຂບ້ານທຸກຍາກ, ສ້າງຈຸດສຸມຕົວແບບພັດທະນາຊົນນະບົດໃໝ່, ຈຸດສຸມດ້ານ ປກຊ-ປກສ ແລະ ຈຸດສຸມບ້ານໃຫຍ່ໃຫ້ກາຍເປັນຕົວເມືອງໃນ ຊົນນະບົດໃຫ້ໄດ້ຕາມແຜນການ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກການສ້າງຄອບຄົວ, ບ້ານ ແລະ ເມືອງພົ້ນທຸກ.

   ສຳລັບການສ້າງຄອບຄົວພ້ົນທຸກໃຫ້ໄດ້ 2,446 ຄອບຄົວ, ສ້າງບ້ານພົ້ນທຸກໃຫ້ໄດ້ 19 ບ້ານນັ້ນ, ເມືອງຫ້ວຍຊາຍ 1 ບ້ານ, ຕົ້ນເຜິ້ງ 2 ບ້ານ, ເມິງ 1 ບ້ານ, ຜາອຸດົມ 10 ບ້ານ ແລະ ເມືອງປາກທາ 5 ບ້ານ, ກໍ່ສ້າງເສັ້ນທາງເຂົ້າຫາ ບ້ານໃຫ້ທຽວໄດ້ 2 ລະດູ; ປັບປຸງ ແລະ ກໍ່ສ້າງລະບົບນໍ້າລິນບ້ານໃນເຂດພູດອຍໃຫ້ໄດ້ມາດຕະຖານ ແລະ ພຽງພໍ; ສ້າງຄອບຄົວພົ້ນທຸກພາຍໃນບ້ານໃຫ້ກວມ 70% ຂຶ້ນໄປ. ສ້າງເມືອງພົ້ນທຸກໃຫ້ໄດ້ 1 ເມືອງຄື: ເມືອງປາກທາ ໂດຍສືບຕໍ່ຈັດຕັ້ງປະຕິບັດຕາມ 2 ມາດຕະຖານ ທີ່ຍັງບໍ່ທັນບັນລຸຄື: ມາດຕະຖານ ທີ 5 (ມີເສັ້ນທາງເຂົ້າເຖິງທຽວໄດ້ຕະຫລອດປີ ແລະ ເຊື່ອມຈອດທຸກໆບ້ານພາຍໃນເມືອງ) ແລະ ມາດຕະຖານທີ 9 (ເມືອງມີບ້ານພົ້ນທຸກກວມ 70% ຂຶ້ນໄປ); ສືບຕໍ່ສ້າງຄອບຄົວພັດທະນາໃຫ້ໄດ້ 4.286 ຄອບຄົວ ສ້າງຄອບຄົວໃຫ້ກາຍເປັນຄອບຄົວຕົວແບບຕ່າງໆ ຂອງຂະແໜງການເຊັ່ນ: ຄອບຄົວ ສາມັກຄີປອງດອງ, ຄອບຄົວ 3 ດີ 6 ຮັກສາ, ຄອບຄົວວັດທະນະທໍາ, ຄອບຄົວປ້ອງກັນຊາດເຂັ້ມ ແຂງ, ຄອບຄົວ, ບ້ານປ້ອງກັນ ຊາດ-ປ້ອງກັນຄວາມສະຫງົບດີໃຫ້ກວມ 85% ຂຶ້ນໄປ; ສ້າງບ້ານພັດທະນາໃຫ້ໄດ້ 45 ບ້ານ. ໃນນັ້ນ; ເມືອງຫ້ວຍຊາຍ ມີ 8 ບ້ານ, ຕົ້ນເຜິ້ງ 7 ບ້ານ, ເມິງ 3 ບ້ານ, ຜາອຸດົມ 18 ບ້ານ ແລະ ເມືອງປາກທາ 9 ບ້ານ; ສ້າງບ້ານໃຫ້ກາຍເປັນບ້ານຕົວແບບຕ່າງໆ. ສ້າງເມືອງເຂັ້ມແຂງຮອບດ້ານໃຫ້ໄດ້ 2 ເມືອງ ຄື: ເມືອງຫ້ວຍຊາຍ ແລະ ເມືອງຕົ້ນເຜິ້ງ. ສືບຕໍ່ຈັດຕັ້ງປະຕິບັດຕາມ 4 ມາດຕະຖານ 6 ຕົວຊີ້ບອກໃຫ້ບັນລຸຄື: ສ້າງຄອບຄົວ ແລະ ບ້ານພັດທະນາໃຫ້ກວມ 85% ຂຶ້ນໄປ; ສ້າງຖານລາຍຮັບເພື່ອສະໜອງໃຫ້ແກ່ລາຍຈ່າຍ, ມີເງິນແຮສຸກເສີນໄວ້. ການສ້າງຕົວແບບດ້ານການ ພັດທະນາຊົນນະບົດໃໝ່.ສືບຕໍ່ສ້າງຄອບຄົວ ແລະ ກຸ່ມຜະລິດທີ່ໄດ້ກໍານົດເປັນເປົ້າໝາຍ ເພ່ືອສ້າງເປັນໜໍ່ແໜງຂອງຄອບຄົວ ແລະ ກຸ່ມຕົວແບບດ້ານການພັດທະນາຊົນນະບົດໃໝ່ ມີ 10 ເປົ້າໝາຍຄື: ການສ້າງເປັນຄອບຄົວຕົວແບບມີ 7 ຄອບຄົວ, ມີ 3 ກິດຈະກໍາຄື: ລ້ຽງແບ້, ງົວ ແລະ ຄວາຍ; ສ້າງເປັນກຸ່ມຕົວແບບມີ 3 ກຸ່ມຄື: ລ້ຽງງົວ, ຜະລິດແຜ່ນແພ ແລະ ຫັດຖະກໍາຢູກວາດແຂມ, ສືບຕໍ່ຈັດຕັ້ງປະຕິບັດແຜນພັດທະນາ ເພື່ອສ້າງກຸ່ມບ້ານນາຄໍາເມືອງຕົ້ນເຜ້ິງ ໃຫ້ກາຍເປັນຕົວແບບດ້ານການພັດທະນາຊົນນະບົດໃໝ່. 

ໂດຍ: ເຂົ້າຈານນ້ຳ

KPL