ຂປລ
ຂປລ. ທ້າຍອາທິດຜ່ານມາ, ຄະນະຮັບຜິດຊອບຕິດຕາມ ກວດກາ ແລະ ຈັດຕັ້ງປະຕິບັດມາດຕະການ ຕໍ່ຜູ້ລະເມີດ ໃນການເຊື່ອມຕໍ່ສາຍສົ່ງ ໂທລະຄົມມະນາຄົມ ແລະ ອິນເຕີເນັດ ເຂົ້າ-ອອກ ສປປ ລາວ ຢູ່ຕາມຈຸດຊາຍແດນ
ຂປລ. ທ້າຍອາທິດຜ່ານມາ, ຄະນະຮັບຜິດຊອບຕິດຕາມ ກວດກາ ແລະ ຈັດຕັ້ງປະຕິບັດມາດຕະການ ຕໍ່ຜູ້ລະເມີດ ໃນການເຊື່ອມຕໍ່ສາຍສົ່ງ ໂທລະຄົມມະນາຄົມ ແລະ ອິນເຕີເນັດ ເຂົ້າ-ອອກ ສປປ ລາວ ຢູ່ຕາມຈຸດຊາຍແດນ ໃນຂອບເຂດທົ່ວປະເທດ ນໍາໂດຍ ທ່ານ ໄຊລືຊາ ອິນສີຊຽງໃໝ່ ຮອງລັດຖະ ມົນຕີ ກະຊວງ ເຕັກໂນໂລຊີ ແລະ ການສື່ສານ (ກຕສ) ພ້ອມດ້ວຍຜູ້ຕາງໜ້າຈາກ ອົງການດັດສົມ ໂທລະຄົມມະນາຄົມ, ສູນອິນເຕີເນັດແຫ່ງຊາດ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ຄະນະຄຸ້ມຄອງຂົວ ແລະ ບັນດາບໍລິສັດໃຫ້ບໍລິການໂທລະຄົມມະນາຄົມ ແລະ ອິນເຕີເນັດ ໄດ້ລົງຊຸກຍູ້ ແລະ ຕິດຕາມ ການກວດກາຈຸດເຊື່ອມຕໍ່ຕົວຈິ່ງ ຢູ່ທີ່ຂົວມິດຕະພາບ ລາວ-ໄທ ແຫ່ງທີ 1 ຢູ່ບ້ານດົງໂພສີ ເມືອງຫາດຊາຍຟອງ ນະຄອນຫລວງວຽງຈັນ.
ການລົງຊຸກຍູ້ ແລະ ຕິດຕາມ ການກວດກາຈຸດເຊື່ອມຕໍ່ ສາຍສົ່ງໂທລະຄົມມະນາຄົມ ແລະ ອິນເຕີເນັດ ຄັ້ງນີ້ ເພື່ອກວດກາ ແລະ ປ້ອງກັນການເຊື່ອມຕໍ່ທີ່ຜິດກົດໝາຍ ແລະ ລະບຽບການທີ່ກໍານົດໄວ້, ທັງເປັນການຮັບປະກັນ ຄວາມປອດໄພທາງດ້ານໄຊເບີ, ປ້ອງກັນການຫລອກລວງຂອງກຸ່ມຄົນບໍ່ດີ, ກຸ່ມແກ້ງຄອນເຊັນເຕີຕ່າງໆ, ພ້ອມທັງຊຸກຍູ້ສົ່ງເສີມ ການເຊື່ອມຕໍ່ສາຍສົ່ງ ໂທລະຄົມມະນາຄົມ ແລະ ອິນເຕີເນັດ ໃຫ້ມີຄວາມສະດວກ, ວ່ອງໄວ ແລະ ທົ່ວສັງຄົມສາມາດເຂົ້າເຖິງໄດ້; ບັນດາບຸກຄົນ, ນິຕິບຸກຄົນ, ການຈັດຕັ້ງ ແລະ ບໍລິສັດບໍລິການໂທລະຄົມມະນາຄົມ ແລະ ອິນເຕີເນັດ ຢູ່ ສປປ ລາວ ຕ້ອງປະຕິບັດຕາມກົດໝາຍ ແລະ ລະບຽບການ ກ່ຽວກັບການເຊື່ອມຕໍ່ສາຍສົ່ງ ໂທລະຄົມມະນາຄົມ ແລະ ອິນເຕີເນັດ ໂດຍຜ່ານບັນດາຈຸດເຊື່ອມຕໍ່ ກັບຕ່າງປະເທດ ທີ່ກະຊວງເຕັກໂນໂລຊີ ແລະ ການສື່ສານ ກໍານົດຢ່າງເຂັ້ມງວດ.
ຂ່າວ-ພາບ: ອົງການດັດສົມໂທລະຄົມມະນາຄົມ
KPL
