ຂປລ
ຂປລ. ພິທີປະກາດການຈັດຕັ້ງ ຮອງເລຂາພັກແຂວງ, ຮອງເຈົ້າແຂວງບໍ່ແກ້ວ ຈັດຂຶ້ນໃນທ້າຍອາທິດຜ່ານມາ ໂດຍເປັນກຽດເຂົ້າຮ່ວມຂອງ ສະຫາຍ ນາງ ສີໃສ ລືເດດມູນສອນ ກຳມະການກົມການ ເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ສະຫາຍ ທອງຈັນ ມະນີໄຊ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງບໍ່ແກ້ວ, ມີຄະນະປະຈໍາພັກແຂວງ, ກຳມະການພັກແຂວງ, ສະມາຊິກສະພາປະຊາຊົນແຂວງ, ເລຂາພັກເມືອງ-ເຈົ້າເມືອງ, ຫົວໜ້າ-ຮອງ ຫົວໜ້າພະແນກການ ແລະ ພະນັກງານຫຼັກແຫຼ່ງເຂົ້າຮ່ວມ
ຂປລ. ພິທີປະກາດການຈັດຕັ້ງ ຮອງເລຂາພັກແຂວງ, ຮອງເຈົ້າແຂວງບໍ່ແກ້ວ ຈັດຂຶ້ນໃນທ້າຍອາທິດຜ່ານມາ ໂດຍເປັນກຽດເຂົ້າຮ່ວມຂອງ ສະຫາຍ ນາງ ສີໃສ ລືເດດມູນສອນ ກຳມະການກົມການ ເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ສະຫາຍ ທອງຈັນ ມະນີໄຊ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງບໍ່ແກ້ວ, ມີຄະນະປະຈໍາພັກແຂວງ, ກຳມະການພັກແຂວງ, ສະມາຊິກສະພາປະຊາຊົນແຂວງ, ເລຂາພັກເມືອງ-ເຈົ້າເມືອງ, ຫົວໜ້າ-ຮອງ ຫົວໜ້າພະແນກການ ແລະ ພະນັກງານຫຼັກແຫຼ່ງເຂົ້າຮ່ວມ
ໃນພິທີ, ສະຫາຍ ສຸລິຍາ ພົມມີສິດ ຮອງຫົວໜ້າກົມຄຸ້ມຄອງ ພະນັກງານ ຄະນະຈັດຕັ້ງສູນກາງພັກ ໄດ້ຜ່ານ ມະຕິຕົກລົງເລກທີ 349/ຄລສພ, ຄໍາສັ່ງເລກທີ 03/ນຍ ວ່າດ້ວຍການຍົກຍ້າຍ ພະນັກງານໄປຮັບໜ້າທີ່ໃໝ່ ໂດຍເຫັນດີແຕ່ງຕັ້ງ ສະຫາຍ ພົນຈັດຕະວາ ແປັນຄໍາ ບຸດຈັນແພງ ຫົວໜ້າການເມືອງວິທະຍາຄານ ປ້ອງກັນຊາດ ໄກສອນ ພົມວິຫານ ກະຊວງປ້ອງກັນປະເທດ ມາເປັນ ຮອງເລຂາຄະນະບໍລິຫານງານພັກແຂວງພັກແຂວງ, ຮອງເຈົ້າແຂວງບໍ່ແກ້ວ ແລະ ຍົກຍ້າຍ ສະຫາຍ ພົນຕີ ສາຍໃຈ ກົມມະສິດ ຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງບໍ່ແກ້ວ ໄປຮັບໜ້າທີ່ໃໝ່ ຢູ່ກະຊວງປ້ອງກັນປະເທດ. ຈາກນັ້ນ, ອະດີດຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງບໍ່ແກ້ວ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານ ຕະຫລອດໃນໄລຍະ 6 ເດືອນຜ່ານມາ ພາຍໃນຄວາມຮັບຜິດຊອບຂອງຕົນ ເຊິ່ງໄດ້ຍົກໃຫ້ເຫັນຜົນສໍາເລັດ ການເຄື່ອນໄຫວວຽກງານຫລາຍດ້ານ, ລວມທັງຂໍ້ສະດວກ, ຂໍ້ຫຍຸ້ງຍາກ ແລະ ທິດທາງແຜນໃນການໃນຕໍ່ໜ້າ.
ໂອກາດນີ້, ສະຫາຍ ນາງ ສີໃສ ລືເດດມູນສອນ ມີຄໍາເຫັນ ແລະ ໃຫ້ທິດຊີ້ນໍາໃຫ້ຄະນະພັກ, ການນໍາທຸກຂັ້ນຂອງແຂວງບໍ່ແກ້ວ ເປັນເອກະພາບນໍາສູນກາງພັກ, ລັດຖະບານ ຕໍ່ການຍົກຍ້າຍ ແລະ ແຕ່ງຕັ້ງຮອງເລຂາພັກແຂວງ, ຮອງເຈົ້າແຂວງ ໃນຄັ້ງນີ້ ເຊິ່ງເປັນວຽກງານ ປົກກະຕິທີ່ເຄີຍຈັດຕັ້ງປະຕິບັດຜ່ານມາ ໂດຍອີງໃສ່ ຄວາມຮຽກຮ້ອງຕ້ອງການ ຂອງໜ້າທີ່ການເມືອງ ໃນແຕ່ລະໄລຍະ. ບົນພື້ນຖານນັ້ນ, ໃຫ້ຄະນະພັກ, ຄະນະນໍາສືບຕໍ່ນໍາພາແນວຄິດ ຂອງພະນັກງານ-ສະມາຊິກພັກ ຢູ່ແຕ່ລະພະແນກການ, ແຕ່ລະເມືອງ ແລະ ປະຊາຊົນບັນດາເຜົ່າ ໃນທົ່ວແຂວງໃຫ້ເຂົ້າໃຈ ແລະ ຮັບຮູ້ຢ່າງທົ່ວເຖິງຕໍ່ການແຕ່ງຕັ້ງ ເພື່ອສ້າງຄວາມ ເປັນເອກະພາບ; ພ້ອມກັນສືບຕໍຄົ້ນຄວ້າຊອກວິທີ ການປັບປຸງແກ້ໄຂວຽກງານທີ່ຍັງຄົງຄ້າງ ແລະ ປະຕິບັດໃຫ້ສໍາເລັດເພື່ອກຽມຄວາມພ້ອມ ໃຫ້ແກ່ການດໍາເນີນກອງປະຊຸມໃຫຍ່ ອົງຄະນະພັກແຂວງທີ່ຈະມາເຖິງ; ສືບຕໍ່ເສີມຂະຫຍາຍມູນເຊື້ອ ຄວາມສາມັກຄີພາຍໃນພັກ, ຄະນະປະຈໍາພັກແຂວງ, ຄະນະບໍລິຫານງານ ພັກແຂວງໃຫ້ມີຄວາມໜັກແໜ້ນ, ມີຄວາມເປັນເອກະພາບສູງ, ເປັນຫລັກແຫລ່ງ, ເປັນຄັນທຸງ ແລະ ເປັນແກນນໍາໃນການເຕົ້າໂຮມຄວາມສາມັກຄີ ໃນຖັນແຖວພະນັກງານ-ສະມາຊິກພັກ ແລະ ປະຊາຊົນບັນດາເຜົ່າ. ສິ່ງສໍາຄັນຕ້ອງເອົາໃຈໃສ່ປະຕິບັດ ຫລັກການນໍາພາຂອງພັກຢ່າງເຂັ້ມງວດ, ເອົາໃຈໃສ່ວຽກງານສຶກສາອົບຮົມ ການເມືອງ-ແນວຄິດ ຕໍ່ພະນັກງານ-ສະມາ ຊິກພັກ ແລະ ປະຊາຊົນບັນດາເຜົ່າ ໃຫ້ມີທັດສະນະຫລັກໝັ້ນ ການເມືອງໜັກແໜ້ນ, ມີຄວາມສາມັກຄີເປັນປຶກແຜ່ນ, ມີຄວາມຈົງຮັກພັກດີຕໍ່ພັກ ແລະ ເຊື່ອໝັ້ນຕໍ່ການນໍາພາຂອງພັກ ໂດຍສະເພາະ ຕໍ່ການນໍາພາຂອງຄະນະບໍລິຫານງານພັກແຂວງ ຊຸດປັດຈຸບັນ ເພື່ອພ້ອມກັນ ປະຕິບັດໜ້າທີ່ ການເມືອງທີ່ໄດ້ຮັບ ມອບໝາຍໃຫ້ມີຜົນສໍາເລັດ.
ສໍາລັບ ສະຫາຍ ຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງ (ຜູ້ໃໝ່) ກໍໃຫ້ສືບຕໍ່ເສີມຂະຫຍາຍມູນເຊື້ອ, ຄຸນງາມຄວາມດີ, ຄວາມຮັບຜິດຊອບຢ່າງປະດິດ ສ້າງຕໍ່ໜ້າທີ່ການເມືອງ ທີ່ໄດ້ຮັບມອບໝາຍ ຕະຫລອດໄລຍະທີ່ສະຫາຍເຄີຍ ປະຕິບັດວຽກງານຢູ່ທ້ອງຖິ່ນ ກໍຄື ກະຊວງປ້ອງກັນປະເທດ ເພື່ອຮ່ວມກັບຄະນະບໍລິຫານງານ ພັກແຂວງບໍ່ແກ້ວ ນໍາພາ-ຊີ້ນໍາວຽກງານຮອບດ້ານຂອງແຂວງ ໃຫ້ນັບມື້ມີຜົນສໍາເລັດ, ເຮັດໃຫ້ແຂວງບໍ່ແກ້ວ ມີການພັດທະນາກ້າວຂຶ້ນ, ມີການເຕີບໃຫຍ່ເຂັ້ມແຂງຂຶ້ນຢ່າງບໍ່ຢຸດຢັ້ງ, ເຮັດໃຫ້ຊີວິດການເປັນຢູ່ທາງວັດຖຸ ແລະ ຈິດໃຈ ຂອງສະມາຊິກພັກ, ພະນັກງານ, ທະຫານ, ຕໍາຫລວດ ກໍຄື ປະຊາຊົນຊາວແຂວງບໍ່ແກ້ວ ໄດ້ຮັບການພັດທະນາດີຂຶ້ນເລື້ອຍໆ.
ຂ່າວ: ເງິນຫລົງ ຈິດພູວົງ.
KPL
