ຂປລ. ສາຍການບິນຫວຽດເຈັດ (Vietjet) ໄດ້ຕ້ອນຮັບເຮືອບິນ A321neo ACF (Airbus Cabin Flex) ໃໝ່ 2 ລໍາ ຈາກ Airbus ໃນທ້າຍປີ 2024 ຕໍ່ມາໃນເດືອນມັງກອນ 2025 ນີ້ ສາຍການບິນຍັງໄດ້ເພີ່ມເຮືອບິນ Charter ຕື່ມອີກ 4 ລໍາ ເພື່ອຮອງຮັບຄວາມຕ້ອງການການເດີນທາງທີ່ສູງໃນເທສະການກຸດຈີນ ເຊິ່ງ​ແມ່ນ​ງານໃຫຍ່​ທີ່​ສຸດ​ຂອງ​ຫວຽດ​ນາມ. ຄວາມສໍາເລັດນີ້ກວມນອນໃນແຜນການຂະຫຍາຍເຄືອຂ່າຍເສັ້ນທາງບິນຂອງຫວຽດເຈັດ ເພື່ອຊຸກຍູ້ໃຫ້​ສາຍ​ການບິນ​ກ້າວ​ຂຶ້ນ​ສູ່​ລະດັບ​ສູງ​ໃໝ່​ໃນ​ປີ 2025.

ຕະຫລອດ​ປີ 2024 ສາຍການບິນ Vietjet ໄດ້​ເພີ່ມ​ເຮືອບິນ​ໃໝ່ 10 ລໍາ ເຮັດ​ໃຫ້​ມີ​ເຮືອ​ບິນ Airbus ​ທັງ​ໝົດ115 ລໍາ. ​ໃນ​ປັດ​ຈຸ​ບັນຫວຽດເຈັດມີສາຍ​ການ​ບິນ​ຫລາຍ​ກ​ວ່າ 170 ເສັ້ນ​ທາງ​ພາຍ​ໃນ​ ແລະ​ ຕ່າງປະເທດ​ ເຊິ່ງເຊື່ອມ​ຕໍ່​ບັນດາ​ຈຸດໝາຍ​ປາຍທາງ​ທີ່​ໜ້າຕື່ນເຕັ້ນ​ຢູ່​ຫວຽດນາມ ​ແລະ ​ໃນ​ທົ່ວ​ໂລກ ລວມທັງປະເທດລາວ ແລະ ປະເທດອື່ນໆ ບໍ່ວ່າຈະຢູ່ອາຊີຕາເວັນອອກສ່ຽງໃຕ້, ອົດສະຕາລີ, ອິນເດຍ, ຈີນ, ຍີ່ປຸ່ນ, ສ ເກົາຫລີ ແລະ ອື່ນໆ. ເສັ້ນທາງດັ່ງກ່າວເຮັດໃຫ້ນັກທ່ອງທ່ຽວຈາກລາວສາມາດເດີນທາງໂດຍຜ່ານນະຄອນໂຮ່ຈີມິນ ແລະ ຮ່າໂນ້ຍ ​ເຊິ່ງ​ແມ່ນ​ສອງ​ນະຄອນ​ໃຫຍ່​ທີ່​ສຸດ​ຂອງ​ຫວຽດນາມ ທີ່ເຊື່ອມຕໍ່ກັບຈຸດໝາຍປາຍທາງຍອດນິຍົມດ້ວຍຕົວເລືອກຖ້ຽວບິນລາຄາຕໍ່າຫລາຍປະເພດ.

ເຮືອບິນ A321neo ACF ທີ່ສົ່ງມາໃໝ່ ເຊິ່ງແມ່ນລຸ້ນຫລ້າສຸດຂອງ A320 ທີ່ປະສົບຜົນສໍາເລັດ ທີ່ມາພ້ອມກັບການອອກແບບທີ່ທັນສະໄໝ ມີຫ້ອງໂດຍສານທີ່ມີປະສິດທິພາບຫລາຍຂຶ້ນສຳລັບຜູ້ໂດຍສານເຖິງ 240 ຄົນ, A321neo ຍັງມີຄຸນນະສົມບັດຫລຸດການປ່ອຍມົນລະພິດ ແລະ ສຽງລົບກວນເມື່ອປຽບທຽບກັບລຸ້ນຜ່ານມາ. ການຍົກລະດັບນີ້ບໍ່ພຽງແຕ່ເສີມຂະຫຍາຍຄວາມສາມາດໃນການບໍລິການຜູ້ໂດຍສານຂອງ Vietjet ເທົ່ານັ້ນ, ​ແຕ່​​ຍັງ​ສະ​ແດງ​ໃຫ້​ເຫັນ​ເຖິງ​ຄວາມ​ໝັ້ນ​ໝາຍ​​ຕໍ່​ການ​ພັດທະນາ​ແບບ​ຍືນ​ຍົງ ​ແລະ ​ເປົ້າ​ໝາຍ​​ໃນ​ການ​ປ່ອຍ​ອາຍ​ພິດ​ເຮືອນ​ແກ້ວ​ໃຫ້​ເປັນ​ສູນ​ພາຍ​ໃນ​ປີ 2050. ເຮືອບິນທັນສະໄໝຂອງ Vietjet ຍັງສະໜອງປະສົບການການເດີນທາງທີ່ປອດໄພ, ລາຄາບໍ່ແພງ ແລະ ໜ້າຈົດຈຳ. ເຮືອ​ບິນ​ລຸ້ນ​ໃໝ່​ຈະ​ເລີ່ມໃຫ້​ບໍ​ລິ​ການ​ໃນ​ຕົ້ນ​ປີ 2025 ເພື່ອເພີ່ມທະວີ​ຄວາມ​ສາ​ມາດໃນການຂົນສົ່ງຂອງສາຍການບິນ​ໃນລະດູໃບໄມ້ຫລົ່ນ ພ້ອມ​ທັງ​ຮັບປະກັນ​ໃຫ້​ຜູ້​ໂດຍສານໃຫ້​ມີ​ທາງ​ເລືອກ​ໃນ​ການ​ເດີນທາງ​ທີ່​ສະດວກ​ ​ແລະ ສາມາດ​ເດີນທາງ​ຢ່າງ​ເພີດເພີນໃນ​ໄລຍະ​ວັນ​ພັກ​ທີ່​ຈະ​ມາ​ເຖິງ.

KPL