ຂປລ
ຂປລ. ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ເຜີຍແຜ່ກົດໝາຍ ຂອງກົມກົດໝາຍ ເປັນຕົ້ນ ຄວາມຮູ້ທົ່ວໄປກ່ຽວກັບກົດໝາຍ (ບັນດາປະກົດການຫຍໍ້ທໍ້ໃນສັງຄົມ ທີ່ຄວນລະວັງ) ແລະ ກົດໝາຍຄອບຄົວ ໃຫ້ນາຍ ແລະ ພົນທະຫານ, ນ້ອງນ້ອຍນັກຮຽນ ຢູ່ໂຮງຮຽນດັ່ງກ່າວ ໃນວັນທີ 14 ມັງກອນ 2025
ຂປລ. ໂຮງຮຽນວັດທະນະທຳຊົນເຜົ່າກອງທັບ (ຮວຜທ) ເຜີຍແຜ່ກົດໝາຍ ຂອງກົມກົດໝາຍ ເປັນຕົ້ນ ຄວາມຮູ້ທົ່ວໄປກ່ຽວກັບກົດໝາຍ (ບັນດາປະກົດການຫຍໍ້ທໍ້ໃນສັງຄົມ ທີ່ຄວນລະວັງ) ແລະ ກົດໝາຍຄອບຄົວ ໃຫ້ນາຍ ແລະ ພົນທະຫານ, ນ້ອງນ້ອຍນັກຮຽນ ຢູ່ໂຮງຮຽນດັ່ງກ່າວ ໃນວັນທີ 14 ມັງກອນ 2025 ໂດຍການເຜີຍແຜ່ ຂອງທ່ານ ພັນເອກ ພັນສະໄໝ ວິໄລ ຮອງຫົວໜ້າກົມກົດໝາຍ ກະຊວງປ້ອງກັນປະເທດ, ມີສະຫາຍ ພັນເອກ ສັງທອງ ສຸກສີສະຫວາດ ຫົວໜ້າຫ້ອງສຶກສາ ໂຮງຮຽນວັດທະນະທຳຊົນເຜົ່າກອງທັບ ພ້ອມດ້ວຍຄະນະພັກ-ຄະນະບັນຊາ 4 ຫ້ອງ, 2 ກອງພັນ, ພະນັກງານວິຊາການຈາກກົມກົດໝາຍ ແລະ ພະນັກງານ-ນັກຮົບທົ່ວໂຮງຮຽນ ເຂົ້າຮ່ວມ.
ການເຜີຍແຜ່ໂຄສະນາກົດໝາຍ ຂອງກົມກົດໝາຍໃນຄັ້ງນີ້ ເປັນການສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ, ຄັ້ງທີ 8 ເຂົ້າສູ່ຊີວິດຕົວຈິງ, ສະເພາະຢູ່ໃນກອງທັບກໍຄື ໂຮງຮຽນວັດທະນະທຳຊົນເຜົ່າກອງທັບ ເພື່ອພ້ອມກັນສຸມໃສ່ຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ ຂອງຄະນະພັກກະຊວງປ້ອງກັນປະເທດ ໂດຍສະເພາະ ການເຄື່ອນໄຫວວຽກງານຍຸຕິທຳ ໃນກົມກອງ ເພື່ອເປັນການປັບປຸງກກອງທັບ ໃຫ້ກ້າວຂຶ້ນ ເປັນກອງທັບປະຕິວັດ ທີ່ມີແບບແຜນ ເຂັ້ມແຂງໃນທຸກດ້ານ ທັງເປັນການສ້າງຂະບວນການ ເພື່ອຂໍ່ານັບຮັບຕ້ອນ ກອງປະຊຸມໃຫຍ່ຄັ້ງທີ 5 ຂອງຄະນະພັກກະຊວງ ແລະ ວັນສຳຄັນຕ່າງໆຂອງພັກ, ຂອງຊາດ, ຂອງກອງທັບ ໂດຍສະເພາະ ຊົມເຊີຍວັນຊາດ 2 ທັນວາທີ່ຜ່ານມາ ແລະ ພ້ອມກັນສ້າງຜົນງານຂ່ຳນັບຮັບຕ້ອນ ວັນທີ 20 ມັງກອນ ທີ່ຈະມາເຖິງນີ້.
ໂອກາດນີ້, ທ່ານ ພັນເອກ ພັນສະໄໝ ວິໄລ ໄດ້ຮຽກຮ້ອງໃຫ້ຄະນະພັກ-ຄະນະບັນຊາ ຈົ່ງນຳເອົາເນື້ອໃນກົດໝາຍດັ່ງກ່າວ ນຳໄປຜັນຂະຫຍາຍໃຫ້ກວ້າງຂວາງເລິກເຊິ່ງ, ສອດຫ້ອຍເຂົ້າໃນທຸກຂົງເຂດວຽກງານ ແລະ ພ້ອມກັນຜັນຂະຫາຍເຂົ້າສູ່ຊີວິດຕົວຈິງ, ຕິດພັນກັບການປະຕິບັດໜ້າທີ່ວິຊາສະເພາະ, ມີສະຕິເຄົາລົບກົດໝາຍ, ມີສະຕິຕໍ່ການຈັດຕັ້ງ, ຕ້ານ ແລະ ສະກັັດກັ້ນປະກົດການຫຍໍ້ທໍ້ຕ່າງໆ ທີ່ຂັດກັບລະບຽບກົດໝາຍ, ມີຄວາມຮັບຜິດຊອບຕໍ່ໜ້າທີ່ ທີ່ໄດ້ຮັບມອບໝາຍ ເພື່ອເຮັດໃຫ້ກົມກອງ ກໍຄືໂຮງຮຽນວັດທະນະທຳຊົນເຜົ່າກອງທັບ ມີຄວາມເຂັ້ມແຂງ ແລະ ມີແບບແຜນທີ່ທັນສະໄໝ.
ໂອກາດດຽວກັນ, ກົມກົດໝາຍ ຍັງໄດ້ມອບປື້ມກົດໝາຍ, ດຳລັດ, ປື້ມຄູມື, ໂປສະເຕີ ໃຫ້ໂຮງຮຽນວັດທະນະທຳຊົນເຜົ່າກອງທັບ ຈຳນວນ 16 ລາຍການ ລວມທັງໝົດ 31 ຫົວ ຕື່ມອີກ.
ຂ່າວ: ໂອລິນ ມິ່ງມີໄຊ
KPL
