*ເທສະການດອກງິ້ວບານ ຄັ້ງທີ 22 ຈະຈັດຂຶ້ນໃນລະຫວ່າງວັນທີ 27 ມັງກອນ ຫາ ວັນທີ 2 ກຸມພາ 2025 ທ່ີເຂດເສດຖະກິດພິເສດສາມຫລ່ຽມຄຳ ເມືອງຕົ້ນເຜິ້ງ ແຂວງ ບໍ່ແກ້ວ, ຈະມີຫລາກຫລາຍກິດຈະກຳເປັນຕົ້ນງານວາງສະແດງຈຳໜ່າຍສິນຄ້າສີ່ປະເທດລາວ, ຈີນ, ໄທ ແລະ ມຽນມາ; ວາງສະແດງສິລະປະສາກົນສັນຕິພາບສາມຫລ່ຽມຄຳ ຄັ້ງທີ II;  ການແຂ່ງຂັນກິລາກັອຟຊີງຂັນດອກງິ້ວຄໍາ; ການປະກວດນາງສາວດອກງິ້ວບານ; ຊົມການສະແດງສິລະປະ-ວັນນະຄະດີ ລາວ-ຈີນ ແລະ ປ່ອຍໂຄມໄຟອວຍໄຊໃຫ້ພອນ ແລະ ກິດຈະກຳອື່ນໆ.

    ການຈັດງານດັ່ງກ່າວ ເພື່ອເປັນການອະນຸລັກຮັກສາ ແລະ ສົ່ງເສີມວຽກງານດ້ານສິລະປະ, ວັດທະນະທຳ, ການນຸ່ງຖື, ແບບແຜນວິຖີຊີວິດ ກໍຄືຮີດຄອງປະເພນີອັນດີງາມຂອງປະຊາຊົນບັນດາເຜົ່າພາຍໃນແຂວງ ບໍ່ແກ້ວ ໃຫ້ມີຄວາມຍືນຍົງຄຽງຄູ່ກັບການພັດທະນາທາງດ້ານເສດຖະກິດ ແລະ ທັງເປັນການເຊື່ອມໂຍງເຂົ້າກັບວັດທະນະທຳ-ອະລິຍາທຳອັນດີງາມຂອງຊາດ ແລະ ສາກົນ ເພື່ອເຮັດໃຫ້ບັນດາແຂກ ແລະ ນັກທ່ອງທ່ຽວໄດ້ທ່ຽວຊົມ ແລະ ສຳພັດກັບຄວາມສວຍສົດງົດງາມ ທີ່ເປັນເອກະລັກພິເສດຂອງຕົ້ນງິ້ວ ກໍຄືດອກງິ້ວໄລຍະທີ່ກໍາລັງເບັ່ງບານ ເຊິ່ງເຕັມໄປດ້ວຍມົນສະເໜ່ ແລະ ຄຸນຄ່າທາງດ້ານຊັບພະຍາກອນທຳມະຊາດອັນອຸດົມສົມບູນ, ປະຊາຊົນລາວມີຄວາມເຊື່ອວ່າດອກງິ້ວທີ່ເບັ່ງບານແມ່ນສະແດງ ເຖິງຄວາມອຸດົມຮັ່ງມີ, ຄວາມອົງອາດກ້າຫານ ແລະ ຄວາມສະຫງ່າ ງາມທັງນີ້ກໍເພື່ອເປັນການຊຸກຍູ້, ສົ່ງເສີມ ແລະ ພັດທະນາວຽກງານການທ່ອງທ່ຽວທາງທຳມະຊາດ, ປະຫວັດສາດ, ວັດທະນະທຳ, ຮີດຄອງປະເພນີ, ວິຖີຊີວິດຂອງຊາວແຂວງບໍ່ແກ້ວ ແບບມີສ່ວນຮ່ວມຂອງຊຸມຊົນຕິດພັນກັບການສົ່ງເສີມການຜະລິດ, ການຄ້າ ແລະ ການບໍລິການໃຫ້ມີການຂະຫຍາຍຕົວ, ປະກອບສ່ວນເຮັດໃຫ້ເສດຖະກິດຂອງແຂວງ ແລະ ຂອງຊາດໃຫ້ມີບາດກ້າວຂະຫຍາຍຕົວໃໝ່, ທັງເປັນການສ້າງລາຍຮັບ ແລະ ແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ດີຂຶ້ນ. ທັງເປັນການຊຸກຍູ້ສົ່ງເສີມວັດທະນະທຳຮີດຄອງປະເພນີອັນດີງາມຂອງຊາວລາວກໍຄືຊາວ ແຂວງບໍ່ແກ້ວ, ເພື່ອເຜີຍແຜ່ແຫລ່ງທ່ອງທ່ຽວອັນສວຍສົດງົດງາມເປັນທີ່ເອກອ້າງທະນົງໃຈໃຫ້ຊາວໂລກໄດ້ຮັບຮູ້.

   ເທສະການດອກງິ້ວບານ ແມ່ນບຸນປາງໃຫຍ່ໜຶ່ງຂອງຊາວແຂວງ ບໍ່ແກ້ວ ທີ່ຈະຈັດຢູ່ດອນຊາວທີ່ມີຊ່ືສຽງໂດ່ງດັງໃນເຂດເສດຖະກິດພິເສດສາມຫລ່ຽມຄຳ. ດອນຊາວເມືອງຕົ້ນເຜິ້ງ ແຂວງບໍ່ແກ້ວ ມີຕົ້ນງິ້ວປ່າທີ່ດົກໜາຢັ່ງຢາຍຢູ່ໃນເນື້ອທີ່ປະມານ 40 ເຮັກຕາ ເມື່ອຮອດລະດູໜາວດອກງິ້ວກໍ ເລີ່ມເບັ່ງບານ ແລະ ແດງທົ່ວດອນຊາວ, ຊຶ່ງຊາວເມືອງຕົ້ນເຜິ້ງໄດ້ຈັດສັນດອນທີ່ງົດງາມແຫ່ງນີ້ໃຫ້ກາຍ ເປັນສະຖານທີ່ທ່ອງທ່ຽວ ເພື່ອດຶງດູດເອົານັກທ່ອງທ່ຽວເຂົ້າມາທ່ຽວຊົມໃຫ້ນັບມື້ນັບຫລາຍຂຶ້ນ. ການຈັດເທສະການດອກງິ້ວບານແມ່ນໄດ້ເລີ່ມແຕ່ປີ 2000 ເປັນຕົ້ນມາ ແລະ ມີຜົນສໍາເລັດໃນການຈັດງານແລ້ວ 21 ຄັ້ງ, ນັບແຕ່ນັ້ນມາຮອດຍາມດອກງິ້ວເບັ່ງບານໃນລະຫວ່າງທ້າຍເດືອນມັງກອນຫາຕົ້ນເດືອນ ກຸມພາ ຈຶ່ງໄດ້ມີການຈັດເທສະການດອກງິ້ວບານຂຶ້ນຂອງທຸກໆປີ. ສະນັ້ນ, ຂໍເຊີນຊວນນັກທ່ອງທ່ຽວທັງພາຍໃນ ແລະ ຕ່າງປະເທດ ມາຮ່ວມມ່ວນຊື່ນ ແລະ ສຳພັດກັບຄວາມສວຍງາມຂອງດອກງິ້ວ ປ່າທີ່ເປັນເອກະລັກສະເພາະທາງທຳມະຊາດ ແລະ ເຂົ້າມາຮ່ວມຫລິ້ນກິດຈະກຳມ່ວນຊ່ືນ ແລະ ສຳພັດກັບບັນຍາກາດພາຍໃນງານໄປພ້ອມໆ ກັນ.

ຂ່າວ: ເງິນຫລົງ ຈິດພູວົງ, ພາບ: ນັກຂ່າວເຂດເສດຖະກິດພິເສດສາມ ຫລ່ຽມຄໍາ, ທ່ຽວທົ່ວລາວ

KPL