*ເນື່ອງຈາກວ່າ ເສດຖະກິດ-ສັງຄົມ ຂອງ ສປປ ລາວ ກໍຄື ນະຄອນຫຼວງວຽງຈັນ ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ, ພົນລະເມືອງກໍເພີ່ມຂຶ້ນ ແລະ ມີເງິນຄໍາຊື້ພາຫະນະໂດຍສະເພາະລົດໃຫຍ່, ລົດຈັກມາຮັບໃຊ້ນັບມື້ນັບເພີ່ມຂຶ້ນ, ພ້ອມກັນນີ້ ຈໍານວນນັກທ່ອງທ່ຽວ ພາຍໃນ ແລະ ຕ່າງປະເທດ ລວມທັງຈຳນວນລົດບໍລິການຮັບໃຊ້ນັກທ່ອງທ່ຽວກໍເພີ່ມຂຶ້ນເຊັ່ນດຽວກັນ, ແຕ່ເສັ້ນທາງໃນໃຈກາງຕົວເມືອງ ນະຄອນຫຼວງວຽງຈັນ ແມ່ນບໍ່ສາມາດຂະຫຍາຍໃຫ້ກວ້າງອອກຕື່ມໄດ້, ໂດຍສະເພາະໃນເຂດແຫຼ່ງທ່ອງທ່ຽວທີ່ເປັນມໍລະດົກແຫ່ງຊາດ, ຈຶ່ງພາໃຫ້ສະພາບການສັນຈອນຕາມທ້ອງຖະໜົນມີຄວາມແອອັດ, ລົດຕິດ, ທັງມີຄວາມສ່ຽງພາໃຫ້ເກີດມີອຸບປະຕິເຫດຫຼາຍຂຶ້ນ.

      ສະນັ້ນ ພະແນກໂຍທາທິການ ແລະ ຂົນສົ່ງນະຄອນຫຼວງວຽງຈັນ ໄດ້ສົມທົບກັບກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ແລະ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ຄົ້ນຄວ້ານໍາສະເໜີ ແລະ ໄດ້ຮັບການເຫັນດີຈາກກອງປະຊຸມອົງການປົກຄອງນະຄອນຫຼວງວຽງຈັນແລ້ວ, ຈຶ່ງຂໍຖືເປັນກຽດແຈ້ງມາຍັງບັນດາທ່ານ ແລະ ທຸກພາກສ່ວນທີ່ກ່ຽວຂ້ອງຊາບ ແລະ ໃຫ້ຄວາມຮ່ວມມືຕໍ່ການຈັດສັນບ່ອນຈອດລົດ ສໍາລັບຜູ້ຈະໄປທ່ຽວຊົມສະຖານທີ່ທ່ອງທ່ຽວຕ່າງໆ ຢູ່ໃນໃຈກາງຕົວເມືອງນະຄອນຫຼວງວຽງຈັນ:

1. ສະຖານທີ່ທ່ອງທ່ຽວ ພິພິທະພັນມໍລະດົກແຫ່ງຊາດ ພະທາດຫຼວງ ແລະ ບໍລິເວນອ້ອມຮອບ: ອະນຸຍາດໃຫ້ລົດບັດ (Bus) ແລະ ລົດຕູ້ (Van) ບໍລິການນັກທ່ອງທ່ຽວ ທີ່ມາທ່ຽວຊົມສະຖານທີ່ທ່ອງທ່ຽວດັ່ງກ່າວ ເຂົ້າທາງດ້ານໜ້າສະພາແຫ່ງຊາດ ໄປຈອດສົ່ງ ແລະ ຮັບນັກທ່ອງທ່ຽວຢູ່ເດີ່ນສະໜາມຫຼວງເບື້ອງໂພນເຄັງ ຫຼື ເບື້ອງຫໍພິພິທະພັນກອງທັບ; ໃນຕໍ່ໜ້ານີ້ຫ້ອງການມໍລະດົກນະຄອນຫຼວງວຽງຈັນ ຈະຈັດຫາລົດໂດຍສານນ້ອຍ (ລົດໄຟຟ້າ) ມາບໍລິການຮັບ-ສົ່ງນັກທ່ອງທ່ຽວ ຈາກຈຸດຈອດລົດຫາທາງຈຸດເຂົ້າພິພິທະພັນພະທາດຫຼວງ, ທັງນີ້ກໍເພື່ອບໍ່ໃຫ້ມີຄວາມສັ່ນສະເທືອນ ສົ່ງຜົນກະທົບຕໍ່ຮາກຖານ-ໂຄງສ້າງ ແລະ ບໍ່ບົດບັງຕໍ່ທັດສະນີຍະພາບທີ່ສວຍງາມຂອງອົງພະທາດຫຼວງ.

2. ສະຖານທີ່ທ່ອງທ່ຽວມໍລະດົກແຫ່ງຊາດປະຕູໄຊ, ສວນປະຕູໄຊເກົ່າ ແລະ ພາກຂະຫຍາຍ: ອະນຸຍາດໃຫ້ລົດບັດ (Bus) ແລະ ລົດຕູ້ (Van) ບໍລິການນັກທ່ອງທ່ຽວ ທີ່ມາທ່ຽວຊົມສະຖານທີ່ທ່ອງທ່ຽວດັ່ງກ່າວ ຈອດໄດ້ຊົ່ວຄາວ ພາຍໃນ 3 ຫາ 5 ນາທີ ຕໍ່ຄັນຕໍ່ຄັ້ງ ເພື່ອສົ່ງ-ຮັບນັກທ່ອງທ່ຽວ ຢູ່ລານຈອດລົດສວນປະຕູໄຊເກົ່າ ແລະ ພາກຂະຫຍາຍແລ້ວນໍາລົດອອກໄປຈອດລໍຖ້າກັບມາຮັບນັກທ່ອງທ່ຽວ ຢູ່ຕາມລານຈອດລົດທີ່ທາງການໄດ້ຈັດສັນໄວ້; ຫ້າມເດັດຂາດບໍ່ໃຫ້ຈອດລົດກາຍເວລາທີ່ກຳນົດໃຫ້, ຜູ້ທີ່ລະເມີດຈະຖືກປັບໃໝແຕ່ 1 ລ້ານ ກີບ ຫາ 2 ລ້ານກີບຕໍ່ຄັນຕໍ່ຄັ້ງ.

3. ສະຖານທີ່ທ່ອງທ່ຽວອື່ນໆ ໃນໃຈກາງຕົວເມືອງນະຄອນຫຼວງວຽງຈັນ: ກໍອະນຸຍາດໃຫ້ລົດບັດ (Bus) ແລະ ລົດຕູ້ (Van) ບໍລິການນັກທ່ອງທ່ຽວ ທີ່ມາທ່ຽວຊົມສະຖານທີ່ທ່ອງທ່ຽວແຕ່ລະບ່ອນຈອດໄດ້ຊົ່ວຄາວ ພາຍໃນ 3 ຫາ 5 ນາທີ ຕໍ່ຄັນຕໍ່ຄັ້ງ ເພື່ອສົ່ງ-ຮັບນັກທ່ອງທ່ຽວຢູ່ແຄມທາງໃກ້ສະຖານທີ່ທ່ອງທ່ຽວຄ້າຍຄືກັນກັບປະຕິບັດຢູ່ສວນປະຕູໄຊ; ຜູ້ທີ່ລະເມີດກໍຈະຖືກປັບໃໝ່ເທົ່າເຊັ່ນກັນ.

4. ຫ້າມເດັດຂາດ ບໍ່ໃຫ້ຈອດລົດທຸກຂະໜາດ, ທຸກປະເພດຕາມແຄມທາງໃນຕົວເມືອງ ນະຄອນຫຼວງວຽງຈັນ ລຽນກັນກວມເອົາ 2 ເລນ ເພາະຈະກິດຂວາງເສັ້ນທາງຈະລາຈອນ, ທັງເປັນສາເຫດຕົ້ນຕໍ ເຮັດໃຫ້ລົດຕິດໃນຕົວເມືອງ; ຜູ້ທີ່ລະເມີດຈະຖືກປັບໃໝແຕ່ 1ລ້ານກີບ ຫາ 2 ລ້ານກີບ ຕໍ່ຄັນ ຕໍ່ຄັ້ງ

5. ຫ້າມເດັດຂາດ ບໍ່ໃຫ້ລົດບັນທຸກໜັກທຸກຂະໜາດ ແລະ ທຸກຊະນິດ ຈອດຢູ່ຕາມແຄມທາງ ແລະ ສະຖານທີ່ ທ່ອງທ່ຽວໃນໃຈກາງຕົວເມືອງ ນະຄອນຫຼວງວຽງຈັນ, ຍົກເວັ້ນແຕ່ໄດ້ຮັບອະນຸຍາດເປັນກໍລະນີຈໍາເປັນສະເພາະ ຈາກກະຊວງໂຍທາທິການ ແລະ ຂົນສົ່ງ ຫຼື ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ; ຜູ້ທີ່ລະເມີດ ຈະຖືກປັບໃໝ ແຕ່ 1 ລ້ານກີບ ຫາ 10 ລ້ານກີບ.

6. ຫ້າມເດັດຂາດ ບໍ່ໃຫ້ລົດລໍ້ໝາກກະລັ່ງ ຈອດຂາຍເຄື່ອງຕາມແຄມທາງ ໃກ້ສະຖານທີ່ທ່ອງທ່ຽວ ໃນໃຈກາງຕົວ ເມືອງນະຄອນຫຼວງວຽງຈັນ, ຜູ້ລະເມີດຈະຖືກປັບໃໝ ແຕ່ 5 ແສນກີບ ຫາ 1 ລ້ານກີບ.

7. ພາຫະນະທຸກຊະນິດ ນັບແຕ່ 3 ລໍ້ ຂຶ້ນໄປຕ້ອງມີຖົງ ຫຼື ພາຊະນະໄວ້ໃສ່ຂີ້ເຫຍື້ອ; ຫ້າມເດັດຂາດບໍ່ໃຫ້ໂຍນ ຫຼື ກວາດຂີ້ເຫຍື້ອອອກຈາກພາຫະນະຂອງຕົນໃສ່ຖະໜົນຫົນທາງ ແລະ ສະຖານທີ່ສາທາລະນະ, ຜູ້ທີ່ລະເມີດ ຈະຖືກປັບໃໝ ແຕ່ 1 ລ້ານກີບ ຫາ 5 ລ້ານກີບ ຕໍ່ຄັນຕໍ່ຄັ້ງ.

ດັ່ງນັ້ນ, ຈຶ່ງແຈ້ງມາບັນດາທ່ານ ແລະ ທຸກພາກສ່ວນທີ່ກ່ຽວຂ້ອງເພື່ອຊາບ ແລະ ຈົ່ງໃຫ້ຄວາມຮ່ວມມືຈັດຕັ້ງປະຕິບັດຢ່າງເຂັ້ມງວດ.