ຂປລ. ສວນພຶກສາ ໄດ້ຈັດງານສະເຫລີມສະຫລອງບຸນກິນຈຽງ ຫລື ບຸນນໍເປເຈົ່າ ຂອງຊົນເຜົ່າມົ້ງ ຢູ່ສວນດັ່ງກ່າວ, ຢູ່ບ້ານດ່ານຊີ ເມືອງນາຊາຍທອງ ນະຄອນຫລວງວຽງຈັນ ໃນວັນທີ 3 ມັງກອນ 2025 ໂດຍມີ ທ່ານ ຄຳໄຫລ ສີປະເສີດ ຮອງປະທານສູນກາງແນວລາວສ້າງຊາດ, ມີຮອງເລຂາພັກ ເມືອງນາຊາຍທອງ, ຮອງປະທານສະພາການຄ້າ ແລະ ອຸດສາຫະກຳ ແຫ່ງຊາດລາວ, ​ຫົວ​ໜ້າ​ກົມ, ຮອງ​ກົມ, ຫົວ​ໜ້າ​ພະ​ແນກ, ຮອງ​ພະ​ແນກ, ພ້ອມດ້ວຍມວນຊົນຊາວເຜົ່າມົ້ງ,  ປະຊາຊົນບ້ານດ່ານຊີ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໂອກາດດັ່ງກ່າວ, ທ່ານ ພູ​ວົງ ພະມີສິດ ເຈົ້າຂອງສວນ​ພຶກ​ສາ ​ໄດ້ໃຫ້ຮູ້ວ່າ: ສວນພຶກສາ ຈັດງານບຸນ​ນໍ​ເປ​ເຈົ່າ ເປັນປະຈໍາທຸກໆປີ ​ແລະ ​ປີນີ້ຈັດຂຶ້ນເປັນປີທີ 7 ໂດຍ​ເລີ່ມແຕ່ວັນ​ທີ 1-5 ມັງກອນ 2025 ​ເຊິ່ງປະກອບມີຫລາຍກິດຈະກຳ ເປັນຕົ້ນ ກິດຈະກຳທາງສາສະໜາ ເຊັ່ນ: ວຽນ​ຫຍ້າ​ຄາ, ແກວ່ງ​ໄກ່, ສູ່​ຂວັນ ​ຜູກ​ແຂນແບບຮີດຄອງເຜົ່າມົ້ງ, ຕຳ​ເຂົ້າ​ປ່ຽງ ແລະ ໂຍນ​ໝາກ​ຄອນ​. ນອກນັ້ນ, ຍັງມີ ກິດຈະກຳແຂ່ງຂັນຮ້ອງເພງ ແລະ ປະກວດນາງສາວເຜົ່າມົ້ງ ນະຄອນຫລວງວຽງຈັນ ປະຈຳປີ 2025 ເຊິ່ງສ້າງບັນຍາກາດ ໃຫ້ງານສະເຫລີມສະຫລອງບຸນກິນຈຽງ ມີຄວາມຄຶກຄື້ນມ່ວນຊື່ນ, ຮັກສາໄດ້ຄວາມສາມັກ ຄີ, ຮັກແພງ, ຮີດຄອງປະເພນີ ຂອງຊົນເຜົ່າມົ້ງ ແລະ ອື່ນໆ.

ການຈັດງານໃນຄັ້ງນີ້, ເພື່ອສົ່ງເສີມ ແລະ ໃຫ້ໂອກາດແກ່ລູກຫລານ ຊົນເຜົ່າມົ້ງ ທັງຊາວໜຸ່ມ ທັງຍິງ ແລະ ຊາຍ ໃຫ້ມີບ່ອນສະແດງຄວາມສາມາດຮອບດ້ານ ຂອງເຂົາເຈົ້າ ທາງດ້ານປັນຍາສຶກສາ, ສິລະປະສຶກສາ ແລະ ອື່ນໆ ຈາກລະດັບທ້ອງຖິ່ນສູ່ລະດັບຊາດ ແລະ ກ້າວສູ່ສາກົນ, ທັງເປັນການ ສົ່ງເສີມ​​ສິນ​ຄ້າ​ບັນ​ດາ​ເຜົ່າ ​ໂດຍໄດ້ຈັດໃຫ້ມີຮ້ານວາງສະແດງ ຜະລິດຕະພັນທີ່ເປັນ​ສິນ​ຄ້າ​ໂອ​ດັອບ ແລະ ສິນຄ້າທົ່ວ​ໄປ. ພ້ອມນີ້, ຍັງເປັນການສ້າງ​ຄວາມ​ສາ​ມັກ​ຄີພາຍໃນຂອງຊົນເຜົ່າມົ້ງ ກັບ​ເຜົ່າອື່ນໆ ໄດ້ຊ່ວຍກັນປົກປັກຮັກ​ສາ​ຮີດ​ຄອງ​ປະ​ເພ​ນີອັນລໍ້າຄ່າ ຂອງຕົນເອງໄວ້ ແລະ ຊ່ວຍກັນສົ່ງ​ເສີມໃຫ້​ຢູ່ຄູ່ວັດທະນະ ທຳລາວ ຕະຫລອດໄປ.

ທ່ານ ພູ​ວົງ ພະມີສິດ ຍັງໃຫ້ຮູ້ອີກວ່າ: ສວນພຶກສາ ໄດ້ນໍາເອົາລູກໆຫລານໆ ຂອງຊົນເຜົ່າມົ້ງ ເຂົ້າ​ມາ​ຝຶກຝົນຫລໍ່ຫລອມ​ ໃຫ້ເກີດ​ມີ​ຄວາມ​ກ້າ​ຫານ, ມີຄວາມຮູ້​ຮອບຕົວຫລາຍຂຶ້ນ, ມີຄວາມສາ​ມາດ, ມີ​ປະ​ສົບ​ການ ແລະ ມີເພື່ອນມິດ. ພ້ອມນີ້, ເວ​ທີ​ການປະກວດນາງສາວເຜົ່າມົ້ງ ໃນໄລຍະຜ່ານມາ ໄດ້​ສ້າງ​ນາງ​ສາວ​​ງາມ ທີ່​ມີ​ຄຸນ​ນະ​ພາບ​, ມີຄວາມສາ​ມາດ​ໄປ​ແຂ່ງ​ຂັນ​​ໃນ​ເວ​ທີ​ລະ​ດັບ​ໂລກ​ມາແລ້ວ ເປັນຕົ້ນ ນາງສາວເຜົ່າມົ້ງ ປາເຢັງ ຊາລໍ ນັ້ນຄືຕົວຢ່າງໜຶ່ງ ທີ່ຢັ້ງຢືນຕໍ່ສາຍຕາຂອງສັງຄົມວ່າ ກິດຈະກຳ ຢູ່ສວນພຶກສາ ໄດ້ສ້າງບຸກຄະລາກອນ ທີ່ດີໃຫ້ແກ່ປະ​ເທດຊາດ ແລະ ບັນດານ້ອງໆ ທີ່ຜ່ານການແຂ່ງຂັນ ແລະ ໄດ້ຮັບລາງວັນຊະນະເລີດ ໄດ້ກາຍມາເປັນຄູຝຶກ ໃຫ້ແກ່ ນ້ອງໆຮຸ່ນ​ຕໍ່ໆ​ມາໄດ້ເປັນຢ່າງດີ.

ຂ່າວ-ພາບ: ທະນູທອງ

KPL