ຂປລ. ກະຊວງສຶກສາທິການ ແລະ ກິລາ ໄດ້ຮັບການສະໜັບສະໜູນ ຈາກລັດຖະບານອົດສະຕຣາລີ ໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນ ສຳລັບການສຶກສາຂັ້ນພື້ນຖານໃນລາວ (ແຜນງານບີຄວາ) ໄດ້ຜະລິດວິດີໂອ ສຳລັບການພັດທະນາຄູໃໝ່ 2 ຕອນ ກ່ຽວກັບການຄຸ້ມຄອງຫ້ອງຮຽນ ແລະ ເຕັກນິກການສອນບົດຮຽນຝຶກເວົ້າພາສາລາວ ສຳລັບນັກຮຽນຊົນເຜົ່າທີ່ ບໍ່ເວົ້າພາສາລາວລຸ່ມ ເປັນພາສາຫລັກໃນຄອບຄົວ.

ທ່ານ ອານຸລົມ ວິໄລພອນ ຜູ້ອໍານວຍການສະຖາບັນຄົ້ນຄວ້າ ວິທະຍາສາດການສຶກສາ (ສວສ) ໄດ້ກ່າວວ່າ: ຍັງມີຄູໃນລາວຫລາຍທ່ານ ທີ່ສອນຢູ່ເຂດຫ່າງໄກ ແລະ ພົບຄວາມຫຍຸ້ງຍາກໃນການສອນ ເຊັ່ນ: ນັກຮຽນຍັງບໍ່ສາມາດເວົ້າພາສາລາວ ໄດ້ດີເທື່ອເມື່ອເຂົາເຈົ້າເລີ່ມເຂົ້າໂຮງຮຽນ, ຫ້ອງຮຽນທີ່ແອອັດ ແລະ ຫ້ອງຮຽນ ທີ່ເປັນຫ້ອງຄວບ. ນັບແຕ່ປີ 2019 ເປັນຕົ້ນມາ, ສວສ ໄດ້ຜະລິດວິດີໂອຫລາກຫລາຍຫົວຂໍ້ ເພື່ອຊ່ວຍໃຫ້ຄູໄດ້ຮັບຄຳແນະນຳ ແລະ ໄດ້ສາທິດວິທີການສິດສອນທີ່ມີປະສິດທິພາບ ສາມາດຕອບສິ່ງທ້າທາຍ ຂອງເຂົາເຈົ້າທີ່ພົບຫລາຍທີ່ສຸດ.

ທ່ານ ນາງ ວາເນັດຊ້າ ເຮັກກາທີ້ ເລຂາເອກ, ສະຖານທູດອົດສະຕຣາລີ ປະຈຳ ສປປ ລາວ ໄດ້ກ່າວວ່າ: ລັດຖະບານອົດສະຕຣາລີ ແລະ ກະຊວງສຶກສາທິການ ແລະ ກິລາ ກຳລັງຮ່ວມມືກັນເພື່ອຮັບປະກັນໃຫ້ຄູ ໄດ້ຮັບການສະໜອງດ້ານຊັບພະຍາກອນ ແລະ ໄດ້ຮັບການສະໜັບສະໜູນ ໃຫ້ນຳໃຊ້ເຕັກນິກ ການສອນແບບໃໝ່. ລັດຖະບານອົດສະຕຣາລີ ເຊື່ອໝັ້ນເປັນຢ່າງຍິ່ງວ່າ ດ້ວຍສະຖານະການທີ່ຍັງຂາດແຄນ ຄູສອນໃນປັດຈຸບັນ, ມັນເປັນສິ່ງສຳຄັນທີ່ຄູຄວນໄດ້ປະກອບຄຳເຫັນ, ບອກຄວາມຮູ້ສຶກ, ໄດ້ຮັບຄວາມເຂົ້າໃຈ ແລະ ທີ່ສຳຄັນທີ່ສຸດແມ່ນການໄດ້ຮັບ ການສະໜັບສະໜູນ. ນີ້ແມ່ນກຸນແຈເພື່ອແກ້ໄຂສິ່ງທ້າທາຍ ທີ່ເຂົາເຈົ້າຜະເຊີນໃນເວລາສອນ ໂດຍສະເພາະ ແມ່ນຜູ້ທີ່ຢູ່ເຂດຫ່າງໄກ. ພວກເຮົາຢາກໃຫ້ຄູມີແຮງບັນດານໃຈ ແລະ ສ້າງຄວາມເຂັ້ມແຂງ ເພື່ອໃຫ້ເຂົາເຈົ້າຍຶດໝັ້ນ ຕໍ່ບົດບາດອັນສຳຄັນ ຂອງເຂົາເຈົ້າໃນການສິດສອນຄົນຮຸ່ນໃໝ່, ຜູ້ທີ່ຈະເປັນຜູ້ນຳ ແລະ ນັກຄົ້ນຄວ້າໃນອະນາຄົດ.

ຫົວຂໍ້ວິດີໂອສຳລັບການພັດທະນາຄູ ຕອນໃໝ່ທີ 24 ແມ່ນກ່ຽວກັບ “ການຄຸ້ມຄອງຫ້ອງຮຽນ”. ການຈັດການຫ້ອງຮຽນເປັນຍຸດທະສາດຫລັກ ເພື່ອຮັບປະກັນໃຫ້ນັກຮຽນ ມີສ່ວນຮ່ວມຢ່າງຫ້າວຫັນໃນການຮຽນຮູ້ ເຊິ່ງເປັນສິ່ງຈຳເປັນໃນຫລາຍ ເນື່ອງຈາກວ່າ ສປປ ລາວ ຫລາຍກວ່າໜຶ່ງສ່ວນສາມ ຂອງຂັ້ນຮຽນຊັ້ນປະຖົມສຶກສາ ແມ່ນເປັນຫ້ອງຄວບ. ທັກສະການຄຸ້ມຄອງຫ້ອງຮຽນ ຍັງມີຄວາມຈໍາເປັນເພື່ອສິດສອນວິທີການສອນ ທີ່ຖືເອົານັກຮຽນເປັນໃຈກາງ ຕາມຫລັກສູດໃໝ່ຢ່າງມີປະສິດທິພາບ ຫລັກສູດໄດ້ລວມມີເກມ, ກິດຈະກຳທີ່ປະຕິບັດຕົວຈິງ ແລະ ການເຮັດວຽກເປັນກຸ່ມ. ການຄຸ້ມຄອງຫ້ອງຮຽນທີ່ດີ ບໍ່ພຽງແຕ່ເຮັດໃຫ້ການສອນ ຂອງຄູງ່າຍຂຶ້ນເທົ່ານັ້ນ, ແຕ່ຍັງສາມາດມີຜົນສະທ້ອນ ທີ່ດີຕໍ່ການມີສ່ວນຮ່ວມ ທາງການຮຽນຂອງນັກຮຽນ ແລະ ຜົນການຮຽນຂອງນັກຮຽນ, ການຈັດສັນຫ້ອງຮຽນທີ່ດີ ໄດ້ສ້າງສະພາບແວດລ້ອມ ທີ່ກະຕຸ້ນການຮຽນຮູ້. ວິດີໂອໄດ້ສະແດງໃຫ້ເຫັນວິທີ ການຄຸ້ມຄອງຫ້ອງຮຽນຕາມ 6 ຄຳແນະນຳທີ່ສາມາດນຳໃຊ້ ໄດ້ຢ່າງງ່າຍດາຍໂດຍຄູ ໃນທຸກຂັ້ນຮຽນຊັ້ນປະຖົມສຶກສາ ແລະ ໃນທຸກວິຊາ.

ວິດີໂອສຳລັບການພັດທະນາຄູ ຕອນໃໝ່ທີ 25 ສະແດງໃຫ້ເຫັນວິທີການສອນ 3 ກິດຈະກຳຫລັກ ຂອງບົດຮຽນຝຶກເວົ້າພາສາລາວ, ບົດຮຽນນີ້ຖືກພັດທະນາໂດຍ ສສກ ໂດຍການສະໜັບສະໜູນ ຈາກລັດຖະບານອົດສະຕຣາລີ ແລະ ໄດ້ນຳໃຊ້ໃນທົ່ວປະເທດ ໃນເດືອນກັນຍາ 2024 ນີ້. ວິດີໂອໄດ້ສະແດງໃຫ້ເຫັນ ເຕັກນິກທີ່ຄູສາມາດໃຊ້ ເພື່ອຊ່ວຍນັກຮຽນຂັ້ນ ປ1 ທີ່ຍັງບໍ່ທັນເວົ້າພາສາລາວ ໄດ້ດີເທື່ອເມື່ອເລີ່ມເຂົ້າໂຮງຮຽນ ຊັ້ນປະຖົມສຶກສາ ເພື່ອພັດທະນາທັກສະພາສາລາວຂອງເຂົາເຈົ້າ, ວິດີໂອປະ ກອບມີ ພາກການສະທ້ອນຄືນໃຫ້ຄູຄິດ ເຖິງການປະຕິບັດຂອງຕົນເອງ ແລະ ວິທີການທີ່ເຂົາເຈົ້າຈະປັບປຸງການສອນຂອງເຂົາເຈົ້າ ເພື່ອຮັບປະກັນໃຫ້ນັກຮຽນເຂົ້າໃຈ ແລະ ພ້ອມກັນຮຽນຮູ້.

KPL