ຂປລ. ລັດຖະບານ ສະວິດ ປະກາດການສະໜັບສະໜູນ ການນຳໃຊ້ແນວທາງທີ່ຄຳນຶງເຖິງ ການປ່ຽນແປງຂອງດິນຟ້າອາກາດ ແລະ ຍືນຍົງ ມານຳໃຊ້ເຂົ້າໃນການປຸງແຕ່ງ ອາຫານທ່ຽງ ໃນໂຮງຮຽນ ໃຫ້ນັກຮຽນຊັ້ນປະຖົມ 120 ກວ່າໂຮງຮຽນ ຢູ່ແຂວງຜົ້ງສາລີ ແລະ ແຂວງອຸດົມໄຊ ໂດຍການຈັດຕັ້ງປະ ຕິບັດ ຂອງອົງການອາຫານໂລກ ແນໃສ່ຮັບປະກັນວ່າ ເດັກນັກຮຽນ 12.000 ກວ່າຄົນ ສາມາດເຂົ້າເຖິງອາຫານໃນໂຮງຮຽນ ທີ່ມີໂພຊະນາການໄດ້ດີຂຶ້ນ, ທັງເປັນການສ້າງຄວາມເຂັ້ມແຂງໃຫ້ແກ່ຊາວກະສິ ກອນຜູ້ລ້ຽງສັດນ້ອຍ ໃນເຂດຊົນນະບົດ ໂດຍສະເພາະແມ່ຍິງ ​ເຊິ່ງໂຄງການນີ້, ແມ່ນນຳໃຊ້ແນວທາງ 5 ປະການ ຄື: ສຸມໃສ່ການສະໜັບສະໜູນ ກະສິກຳແບບຍືນຍົງ, ປັບປຸງການເຂົ້າເຖິງນໍ້າ, ສົ່ງເສີມການສ້າງຄວາມເຂັ້ມແຂງທາງ ດ້ານເສດຖະກິດຂອງແມ່ຍິງ, ຍົກລະດັບພື້ນຖານໂຄງລ່າງຂອງໂຮງຮຽນ ແລະ ສ້າງຂີດຄວາມສາມາດໃຫ້ແກ່ພະນັກງານລັດ ໃນການຄຸ້ມຄອງໂຄງການຢ່າງມີປະສິດທິພາບ.

ທ່ານ ນາໂອກິ ມາເອກາວາ ຮອງຜູ້ອຳນວຍການ ອົງການອາຫານໂລກ ປະຈຳລາວ ກ່າວວ່າ: ລັດ ຖະບານ ສປປ ລາວ ໄດ້ດຳເນີນການກໍ່ສ້າງໂຄງ ການອາຫານທ່ຽງ ໃນໂຮງຮຽນ ມາເປັນເວລາຫລາຍກວ່າ 2 ທົດສະວັດ ເຊິ່ງມີຄວາມຄືບໜ້າທີ່ໜ້າປະທັບໃຈຫລາຍຢ່າງ ແຕ່ສິ່ງທ້າທາຍຍັງຄົງຢູ່ເຊັ່ນດຽວກັນ, ໂດຍສະເພາະ ແມ່ນດ້ານທຶນຮອນ ທີ່ບໍ່ພຽງພໍໃນ ການດຳເນີນໂຄງການ ເພື່ອໃຫ້ມີຄວາມຍືນຍົງ. ການເຂົ້າເຖິງນ້ຳ ແລະ ຕ່ອງໂສ້ອາຫານ ທີ່ຜະລິດຢູ່ທ້ອງຖິ່ນບໍ່ພຽງພໍ. ການແກ້ໄຂສິ່ງທ້າທາຍເຫລົ່ານີ້, ຈຳເປັນຕ້ອງມີການຮ່ວມມື ຈາກຫລາຍ ຂະແໜງການ. ດັ່ງນັ້ນ, ການປະກອບສ່ວນ ຈາກລັດຖະບານສະວິດ ເປັນອີກບາດກ້າວໜຶ່ງ ທີ່ຈະຊ່ວຍຜັກດັນ ໃຫ້ໂຄງການນີ້ສາມາດກ້າວ ໄປຂ້າງໜ້າໄດ້ ໂດຍສືບຕໍ່ອາໄສ ຜົນສໍາເລັດ ແລະ ຄວາມພະຍາຍາມ ທີ່ຜ່ານມາໃນການເຊື່ອມຕໍ່ຊາວກະສິກອນ ທ້ອງຖິ່ນກັບອາຫານທ່ຽງໃນໂຮງຮຽນ, ການລິເລີ່ມນີ້, ເນັ້ນໜັກໃສ່ການກະສິກໍາ ທີ່ສະຫລາດທີ່ຄຳນຶງເຖິງ ດິນຟ້າອາກາດ ແລະ ການເຮັດກະສິກໍາແບບຍືນຍົງ.

ທ່ານ ຊອລ ກາເບຣຍ ດຸສ໌ ຜູ້ອຳນວຍການປະຈຳພາກພື້ນ ຂອງສຳນັກງານຮ່ວມມື ເພື່ອການພັດທະນາ ແຫ່ງສະວິດ ໃນພາກພື້ນລຸ່ມແມ່ນ້ຳຂອງ ກ່າວວ່າ: ການສະໜັບສະໜູນ ໂຄງການ ອາຫານທ່ຽງໃນໂຮງຮຽນ ຂອງ ສປປ ລາວ ໂດຍຜ່ານການກະສິກຳ ທີ່ຄຳນຶງເຖິງສະພາບດິນຟ້າອາກາດ ຖືເປັນຮູບແບບທີ່ມີປະສິດທິພາບ ໃນການປັບປຸງຊີວິດການ ເປັນຢູ່ຂອງກະສິກອນ ຂະໜາດນ້ອຍ, ພ້ອມທັງປະກອບ ສ່ວນເຂົ້າໃນດ້ານໂພຊະນາການ ແລະ ການສຶກສາ ຂອງຄົນຮຸ່ນຫລັງ. ວິທີນີ້ ບໍ່ພຽງແຕ່ຈະຊ່ວຍແກ້ໄຂຄວາມຕ້ອງການ ການຄ້ຳປະກັນດ້ານ ສະບຽງ ອາຫານເທົ່ານັ້ນ, ແຕ່ຍັງເສີມສ້າງຄວາມອາດສາມາດຂອງຊຸມຊົນ ໃນການປັບຕົວເຂົ້າກັບ ການປ່ຽນແປງຂອງດິນຟ້າອາກາດ ນຳອີກ.

ການປະກອບສ່ວນ ແລະ ສະໜັບສະໜູນ ຂອງລັດຖະບານສະວິດ ສະແດງເຖິງບາດກ້າວອັນສຳຄັນ ໃນການບັນບຸວິໄສທັດ ຂອງລັດຖະບານ ກ່ຽວກັບການຄຸ້ມຄອງເພື່ອ ໃຫ້ທຸກໂຮງຮຽນ ຂອງລັດ ໃນຂອບເຂດທົ່ວປະເທດ ມີອາຫານທ່ຽງໃນໂຮງຮຽນ ພາຍໃນປີ 2030, ເພື່ອສົ່ງເສີມອະນາຄົດ ຢ່າງມີຄວາມຮອບຄອບ ແລະ ມີຄວາມທົນທານ ຕໍ່ການປ່ຽນແປງຂອງສະພາບ ດິນຟ້າອາກາດຫລາຍຂຶ້ນ.

ຂ່າວ: ທະນູທອງ

ຂໍ້ມູນ-ພາບ: ອົງການອາຫານໂລກ

KPL