ຂປລ. ກະຊວງປ້ອງກັນປະເທດ ຈັດພິທີໂຮມຊຸມນຸມສະເຫລີມສະຫລອງ ວັນສ້າງຕັ້ງກອງທັບ ປະຊາຊົນຫວຽດນາມ ຄົບຮອບ 80 ປີ (22 ທັນວາ 1944-22 ທັນວາ 2024) ໃນວັນທີ 30 ທັນວາ 2024 ຢູ່ສະໂມສອນກົມໃຫຍ່ການເມືອງກອງທັບ ໂດຍການເປັນກຽດເຂົ້າຮ່ວມຂອງ ສະຫາຍ ພົນໂທ ຄໍາລຽງ ອຸທະໄກສອນ ກຳມະການສູນກາງພັກ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ມີສະຫາຍ ຫງວຽນ ມິງ ເຕິມ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ, ມີຄະນະນຳບັນດາກົມໃຫຍ່, ຫ້ອງວ່າການກະຊວງປ້ອງກັນປະເທດ, ວິທະຍາຄານ, ຜູ້ຕາງໜ້າຈາກເຫລົ່າຮົບ ແລະ ກົມກອງອ້ອມຂ້າງກະຊວງປ້ອງກັນປະເທດເຂົ້າຮ່ວມ.

ໃນພິທີ, ສະຫາຍ ຫງວຽນ ມິງ ເຕິມ ໄດ້ຍົກໃຫ້ເຫັນມູນເຊື້ອ ແຫ່ງການເຕີບໃຫຍ່ຂະຫຍາຍຕົວ ຂອງກອງ ທັບປະຊາຊົນຫວຽດນາມ ຕະຫອດໄລຍະ 80 ປີ ຜ່ານມາ, ກອງທັບປະຊາຊົນຫວຽດນາມ ໄດ້ສ້າງຕັ້ງຂຶ້ນ ໃນວັນທີ 22 ທັນວາ 1944 ເຊິ່ງກາຍເປັນເຫດການ ປະຫວັດສາດອັນຍິ່ງໃຫຍ່ ຂອງການປະຕິວັດຫວຽດນາມ ເພາະວ່າເປັນຄັ້ງທຳອິດໃນປະຫວັດສາດ, ຂອງຊົນຊັ້ນກຳມະກອນ ແລະ ປະຊາຊົນຫວຽດນາມ ໄດ້ມີກອງທັບແບບໃໝ່ ໂດຍພັກກອມມູນິດຫວຽດນາມ ແລະ ປະທານ ໂຮ່ຈີ່ມິງ ຈັດຕັ້ງ, ສຶກສາ, ຫລໍ່ຫລອມ, ກອງທັບຂອງປະຊາຊົນ ໂດຍປະຊາ ຊົນ ແລະ ເພື່ອປະຊາຊົນ, ສູ້ຮົບເພື່ອເອກະລາດແຫ່ງຊາດ ແລະ ສັງຄົມນິຍົມ, ເພື່ອເສລີພາບ, ຄວາມຜາສຸກ ຂອງປະຊາຊົນ.

ໃນກອງປະຊຸມສູນກາງ ຄັ້ງທີ 6 (ເດືອນພະຈິກ 1939) ແລະ ຄັ້ງທີ 7 (ເດືອນພະຈິກ 1940) ພິເສດແມ່ນໃນກອງປະຊຸມສູນກາງ ຄັ້ງທີ 8 (ເດືອນພຶດສະພາ 1941) ພັກກອມມູນິດອິນດູຈີນ ໄດ້ຕັດສິນຫັນທິດການປະຕິວັດ, ວາງໜ້າທີ່ປົດປ່ອຍຊາດ ເປັນອັນດັບແຖວໜ້າ, ຊຸກຍູ້ການສ້າງຫຼັກທີ່ໝັ້ນ, ກະກຽມການລູກຂຶ້ນຕໍ່ສູ້ ດ້ວຍອາວຸດເພື່ອຍາດອຳນາດການປົກຄອງ. ສະນັ້ນ, ບົນພື້ນຖານບັນດາກອງປະກອບ ອາວຸດການປະຕິວັດຢູ່ຫວຽດບັກ, ມາເຖິງວັນທີ 22 ທັນວາ 1944 ຢູ່ເມືອງງວຽນບິ່ງ ແຂວງກາວບັງ, ພາຍໃຕ້ການບັນຊາ ຂອງ ສະຫາຍ ຫວໍ້ ຫງວຽນ ຢ໋າບ ກອງທະຫານຫວຽດນາມ ໂຄສະນາປົດປ່ອຍກອງທັບໄດ້ສ້າງຕັ້ງຂຶ້ນ ເຊິ່ງແມ່ນກອງທັບ ປະຊາຊົນຫວຽດນາມ ໃນເມື່ອກ່ອນ. ຂະນະນັ້ນ, ກອງທະຫານຫວຽດນາມ ໂຄສະນາປົດປ່ອຍກອງທັບ ມີພະນັກງານ-ນັກຮົບພຽງແຕ່ 34 ຄົນ, ຈາກກອງທະຫານປະກອບອາວຸດ ທີ່ປະຖົມປະຖານ ຜ່ານໄລຍະການຕໍ່ສູ້ກູ້ຊາດ ຕ້ານພວກລ່າເມືອງຂຶ້ນແບບເກົ່າ, ກອງທັບປະຊາຊົນຫວຽດນາມ ໄດ້ເຕີບໃຫຍ່ຢ່າງບໍ່ຢຸດຢັ້ງ, ທັງກໍ່ສ້າງກໍາລັງທາງການທະຫານ, ຈາກບັ້ນຕີນ້ອຍຫາບັ້ນຕີໃຫຍ່, ຈາກການຕີແບບກອງຫລອນ ຫາການຕີແບບຫລວງ. ຜ່ານໄລຍະ 9 ປີ ແຫ່ງການຕໍ່ສູ້ເຕັມໄປດ້ວຍຄວາມລຳບາກຫຍຸ້ງຍາກ ໄດ້ຕີຖອຍບັນດາຍຸດທະສາດ ການທະຫານຂອງສັດຕູ ດ້ວຍໄຊຊະນະ ຂອງການບຸກໂຈມຕີ ບັນດາຍຸດທະສາດ ການທະຫານຂອງສັດຕູ, ດ້ວຍໄຊຊະນະ ຂອງການບຸກໂຈມຕີຍຸດທະສາດ ລະດູໜາວ-ລະດູບານ ໃໝ່ 1953-1954 ເຊິ່ງໄຊຊະນະອັນໃຫຍ່ຫລວງກອງທັບ ແລະ ປະຊາຊົນຫວຽດໃນບັນຮົບດຽນບຽນຝູ໋ ບັງຄັບລັດຖະບານຝຣັ່ງ ຕ້ອງລົງນາມສົນທິສັນຍາເຊີແນວ, ສ້າງຄວາມສັນຕິພາບຄືນຢູ່ອິນດູຈີນ, ຖອນໂຕກັບຄືນປະເທດ, ປົດປ່ອຍພາກເໜືອຢ່າງສົມບູນ, ສິ້ນສຸດໄຊຊະນະການຕໍ່ສູ້ຕ້ານ ກັບລ່າເມືອງຂຶ້ນຝຣັ່ງຮຸກຮານ, ຍົກຂຶ້ນເປັນແບບຢ່າງໃຫ້ແກ່ ຂະບວນການປົດປ່ອຍຊາດໃນໂລກ. ຕໍ່ສະພາບການດັ່ງກ່າວ, ກອງທັບ ແລະ ປະຊາຊົນຫວຽດນາມໄດ້ປະ ສານສົມທົບກັບການຕໍ່ສູ້ ຂອງປະຊາຊົນລາວ ແລະ ປະຊາຊົນກຳປູເຈຍອ້າຍນ້ອງ ຍາດໄດ້ໄຊຊະນະອັນໃຫຍ່ຫລວງ ພົ້ນເດັ່ນແມ່ນບັ້ນຮົບເສັ້ນທາງເລກທີ 9 ພາກໃຕ້ຂອງລາວ, ບັ້ນຮົບຕາເວັນອອກສ່ຽງເໜືອກຳປູເຈຍ ພ້ອມທັງເປີດບັ້ນບຸກໂຈມຕີຍຸດທະສາດ ໃນທົ່ວສະໜາມຮົບພາກໃຕ້ ດ້ວຍບັນດາບັ້ນຮົບບຸກໂຈມຕີຮ່ວມກຳລັງທະຫານຢູ່ກວາງຈິ-ເທື່ອທຽນເຫວ້, ເຂດໄຕງວຽນສ່ຽງເໜືອ, ເຂດພາກຕາເວັນອອກສ່ຽງໃຕ້, ບັນດາບັ້ນຮົບບຸກໂຈມຕີສັງລວມຢູ່ທົ່ງ ພຽງແມ່ນ້ຳຂອງ, ພາກກາງ. ຈາກບັນດາໄຊຊະນະດັ່ງກ່າວ, ກອງທັບປະຊາຊົນຫວຽດນາມໄດ້ດຳເນີນ “ບັ້ນຮົບໂຮ່ຈີ່ມິງ” ໂດຍໄດ້ປິດລ້ອມນະຄອນ ໄຊງ່ອນ ພາຍຫລັງການສູ້ຮົບ ຢ່າງດຸເດືອດຫລາຍແຫ່ງ ໄດ້ຍຶດເອົາວົງການ ນອກໄດ້ສຳເລັດຜົນ, ຍ້ອນຄວາມຮຽກຮ້ອງຕ້ອງການ ຂອງສະຖານະການ ການເມືອງ ແລະ ການທະຫານຢູ່ແຫລມອິນດູຈີນ ພິເສດແມ່ນສົງຄາມ ຊາຍແດນຕາເວັນຕົກສ່ຽງໃຕ້ ແລະ ສົງຄາມປົກປັກຮັກສາຊາຍແດນພາກເໜືອ, ກຳລັງປະກອບອາວຸດຫວຽດນາມ, ກອງທັບປະຊາຊົນຫວຽດນາມ ໄດ້ຈັດຕັ້ງເປັນຫລາຍ ແມ່ທັບຫລວງ, 8 ເຂດການທະຫານ ແລະ ກອງບັນຊາການທະຫານອາສາສະໝັກ 2 ແຫ່ງ ຢູ່ ລາວ ແລະ ກຳປູເຈຍ ກອງທັບປະຊາຊົນຫວຽດນາມ ໄດ້ຄຽງບ່າຄຽງໄຫລ່ກັບປະຊາຊົນລາວ ແລະ ປະຊາຊົນກຳປູເຈຍ ຕໍ່ຕ້ານສັດຕູຜູ້ດຽວ, ເພື່ອເອກະລາດ, ອິດສະຫລະພາບ ຂອງແຕ່ລະປະເທດ ກ້າວເຂົ້າສູ່ໄລຍະປ່ຽນແປງໃໝ່, ຜະເຊີນໜ້າກັບການປ່ຽນແປງຢ່າງສັບສົນ ຂອງສະພາບການພາຍໃນ ແລະ ສາກົນ, ເສີມຂະຫຍາຍມູນເຊື້ອຄວາມຈົງຮັກພັກດີ ຢ່າງເດັດຂາດກັບພາລະກິດປະຕິວັດ ຂອງພັກ ແລະ ປະເທດຊາດ, ກອງທັບປະຊາຊົນຫວຽດນາມ ຍາມໃດກໍປະສົບຜົນສຳເລັດໃນທຸກໜ້າທີ່ ແລະ ທັນສະໄໝເທື່ອລະກ້າວຢ່າງບໍ່ຢຸດຢັ້ງ; ຝຶກຝົນຫລໍ່ຫລອມລະບຽບ, ຄວາມສາມາດກຽມພ້ອມສູ້ຮົບ, ບໍ່ໃຫ້ຖືກເປັນທ່າຮັບ ຫລື ຕົກຕະລຶງຕໍ່ທຸກສະຖານະການ ໃນຂະບວນການກໍ່ສ້າງ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ; ປົກປັກຮັກສາສັນຕິພາບ, ສະຖຽນລະພາບ, ການພັດທະນາຢູ່ພາກພື້ນ ແລະ ໃນໂລກ, ສົມກັບຊື່ວ່າ: “ວິລະຊົນກອງທັບ ປະຊາຊົນຫວຽດນາມ”. ກອງທັບປະຊາຊົນປະຕິບັດຢ່າງຕັ້ງໜ້າ ແລະ ເປັນເຈົ້າການໃນບັນດາການເຄື່ອນໄຫວຕອບແທນບຸນຄຸນ, ແກ້ໄຂຜົນຮ້າຍຫລັງສົງຄາມ, ປ້ອງກັນ, ຕ້ານພະຍຸ, ໄພນ້ຳຖ້ວມ, ໄພທຳມະຊາດ ແລະ ກູ້ໄພ.

ໂອກາດອັນມີຄວາມໝາຍສຳຄັນນີ້, ສະຫາຍ ພົນໂທ ຄໍາລຽງ ອຸທະໄກສອນ ໄດ້ມີຄໍາເຫັນຕື່ມວ່າ: ການຈັດຕັ້ງພິທີໂຮມຊຸມນຸມ ສະເຫລີມສະຫລອງ ວັນສ້າງຕັ້ງກອງທັບປົດປ່ອຍປະຊາຊົນຫວຽດນາມ ຄົບຮອບ 80 ປີ ຄັ້ງນີ້ ໄດ້ນໍາເອົາໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກແພງ ອັນສະໜິດສະໜົມອົບອຸ່ນ ແບບພິເສດ ຖານສະຫາຍອ້າຍນ້ອງ ຈາກພັກ-ລັດຖະບານ, ກອງທັບ ແລະ ປະຊາຊົນຫວຽດນາມ ມາສູ່ພັກ-ລັດຖະບານ, ກອງທັບ ແລະ ປະຊາຊົນລາວ ທັງເປັນການເພີ່ມທະວີເສີມສ້າງ ສາຍພົວພັນມິດຕະພາບ, ຮັດແໜ້ນຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດ ລາວ- ຫວຽດນາມ, ຫວຽດນາມ-ລາວ ໃຫ້ນັບມື້ແຕກດອກອອກຜົນຢ່າງບໍ່ຢຸດຢັ້ງ.

ຂ່າວ: ຄຳໄຕ ຈັນນະຄອນ

KPL