ຂປລ. ພິທີສະເຫລີມສະຫລອງວັນສ້າງຕັ້ງ ເມືອງປາກງື່ມ ນະຄອນຫລວງວຽງຈັນ ຄົບຮອບ 30 ປີ(30/12/1994-30/12/2024) ຈັດຂຶ້ນວັນທີ 30 ທັນວາ 2024 ຜ່ານມານ ​ໂດຍມີ ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫລວງວຽງຈັນ, ທ່ານ ອາດສະພັງທອງ ສີພັນດອນ ເຈົ້າຄອງ ນະຄອນຫລວງວຽງຈັນ, ມີການນຳຂັ້ນສູນກາງ, ນະຄອນຫລວງວຽງຈັນ, ພ້ອມດ້ວຍ ພາກ ສ່ວນກ່ຽວຂ້ອງ ແລະ ມວນຊົນຊາວເມືອງປາກງື່ມເຂົ້າຮ່ວມ.

ໂອກາດັ່ງກ່າວ, ທ່ານ ຄຳໝູນ ຕຽງທະລາດ ເຈົ້າເມືອງປາກງື່ມ ​ໄດ້ໃຫ້ຮູ້ວ່າ: ເມືອງປາກງື່ມ ສ້າງຕັ້ງຂຶ້ນໃນປີ 1994 ມາຮອດປັດຈຸບັນ ຄົບຮອບ 30 ປີ, ຕະຫລອດໄລຍະ 30 ປີຜ່ານມາ ພາຍໃຕ້ການນຳພາ-ຊີ້ນຳ ໂດຍກົງ ແລະ ຮອບດ້ານ ຂອງອົງຄະນະພັກນະຄອນຫລວງວຽງຈັນ ໃນການຈັດຕັ້ງຜັນຂະຫຍາຍ ແນວທາງປ່ຽນແປງ ໃໝ່ຂອງພັກ ແລະ ການຈັດຕັ້ງປະຕິບັດມະຕິ ແຜນພັດທະນາເສດຖະ ກິດ-ສັງຄົມ ໃນແຕ່ລະໄລຍະ ໃຫ້ປະກົດຜົນເປັນຈິງ ເຊິ່ງອົງຄະນະພັກເມືອງ ໃນຮຸ່ນຜ່ານໆມາໄດ້ເອົາ ໃຈໃສ່ຊີ້ນຳ-ນຳພາ ພ້ອມທັງຂຸດຄົ້ນທ່າແຮງບົ່ມຊ້ອນ ທີ່ມີຢູ່ພາຍໃນເມືອງ ຈຶ່ງສາມາດຜ່ານຕໍ່ອຸປະສັກ ນາໆປະການໄດ້ດີ ແລະ ມີຜົນງານພົ້ນເດັ່ນ ໃນແຕ່ລະດ້ານ ໂດຍສະເພາະ ອົງຄະນະພັກເມືອງ ໄດ້ຖືສຳຄັນ ຕໍ່ວຽກງານສຶກສາອົບຮົມການເມືອງ-ແນວຄິດ ສະແດງອອກໃນການປະກອບສ່ວນເຂົ້າ ໃນການຈັດຕັ້ງປະ ຕິບັດ ສອງໜ້າທີ່ຍຸດທະສາດ ແລະ ສ້າງສາພັດທະນາປະເທດຊາດ ນັບມື້ນັບເຂັ້ມແຂງ ແລະ ຈະເລີນກ້າວໜ້າ. ຄຽງຄູ່ກັນນັ້ນ, ກໍໄດ້ເອົາໃຈໃສ່ວຽກງານ ປ້ອງກັນຊາດ-ປ້ອງກັນຄວາມສະຫງົບ ແລະ ເອົາໃຈ ໃສ່ໃນການພັດທະນາເສດຖະກິດ-ສັງຄົມ, ໄດ້ປະສານສົມທົບກັບທຸກຂະແໜງການ ສຸມໃສ່ວຽກງານກໍ່ສ້າງຮາກຖານການເມືອງ, ພັດທະນາສົນນະບົດ, ແກ້ໄຂຄວາມທຸກຍາກ ຕິດພັນກັບວຽກງານ 3 ສ້າງ ຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ, ສົ່ງເສີມການຜະລິດກະສິກຳ ເພື່ອສະໜອງສະ ບຽງອາຫານ ໃຫ້ນະຄອນຫລວງວຽງຈັນ ແລະ ໃຫ້ກາຍເປັນສິນຄ້າຢູ່ພາຍໃນ ແລະ ສົ່ງອອກ ໂດຍຖືກະ ສິກຳເປັນທ່າແຮງ ຕິດພັນກັບອຸດສາຫະກຳປຸງແຕ່ງ, ບໍລິການ ແລະ ທ່ອງທ່ຽວ ທີ່ກົມກຽວ, ເຮັດໃຫ້ GDP ຂະຫຍາຍຕົວເພີ່ມຂຶ້ນ 7,56% ຕໍ່ປີ, ລວມຍອດ GDP ຮອດປີ 2024 ບັນລຸ 1.792 ຕື້ກີບ, ລວມຍອດຜະລິດຕະພັນພາຍໃນ ສະເລ່ຍໃສ່ຫົວຄົນບັນລຸໄດ້ 72 ລ້ານກວ່າກີບຕໍ່ຄົນຕໍ່ປີ, ການເກັບລາຍຮັບເຂົ້າງົບປະມານ 5 ປີຜ່ານມາ ສາມາດລື່ນແຜນການ ພື້ນຖານໂຄງລ່າງ ໄດ້ຮັບການພັດທະນາ, ຮອດປັດຈຸບັນ ເມືອງປາກງື່ມ ມີເສັ້ນທາງໄປຮອດໄປເຖິງທຸກໆບ້ານ, ຊີວິດການເປັນຢູ່ ຂອງປະຊາຊົນບັນດາເຜົ່າ ນັບມື້ນັບດີຂຶ້ນ, ສາມາດສ້າງຄອບຄົວ ແລະ ບ້ານພັດທະນາ ຕາມມາດຖານ ກວມ 80%, ເມືອງປາກງື່ມ ສາມາດຮັບໃບຢັ້ງຢືນວັດພະທາດຖິ່ນຊ້ອຍ ຮັບຮອງໃຫ້ເປັນມໍລະດົກແຫ່ງຊາດ ລະດັບທ້ອງຖິ່ນ ທາງດ້ານວັດທະນະທຳແຫ່ງທີ 2 ຂອງນະຄອນຫລວງວຽງຈັນ.

ພາຍໃນງານມີ ຮ້ານວາງສະແດງ ແລະ ຂາຍສິນຄ້າກະສິກຳ, ເຄື່ອງອຸປະໂພກ-ບໍລິໂພກ, ເຄື່ອງທີ່ລະນຶກ ແລະ ອື່ນໆ ສ້າງບັນຍາກາດ ເຮັດໃຫ້ງານສະເຫລີມສະຫລອງ ວັນສ້າງຕັ້ງເມືອງປາກງື່ມ ຄຶກຄື້ນ, ຮັກສາໄດ້ວັດທະນະທຳ, ຄວາມສະຫງົບ ແລະ ປອດໄພ.

ໃນໂອກາດດຽວກັນ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ໄດ້ ມອບໃບຢັງຢືນ ເມືອງປາກງື່ມເປັນເມືອງພົ້ນທຸກ ແລະ ມອບໃບຢັ້ງຢືນຮັບຮອງພະທາດຖິ່ນຊ້ອຍ ເປັນມໍລະດົກແຫ່ງຊາດ ລະດັບທ້ອງຖິ່ນ ທາງດ້ານວັດທະນະທຳແຫ່ງທີ 2 ຂອງນະຄອນຫລວງວຽງຈັນ ຕາງໜ້າຮັບໂດຍ ທ່ານ ຄຳໝູນ ຕຽງທະລາດ ເຈົ້າເມືອງປາກງື່ມ.

ຂ່າວ-ພາບ: ທະນູທອງ

KPL