ຂປລ. ໃນປີ 2024 ນີ້, ນັບແຕ່ເດືອນມັງກອນຫາເດືອນທັນວາ ສປປ ລາວ ມີຫລາຍເຫດການເດັ່ນທີ່ເກີດ ໃນຫລາຍດ້ານ ເປັນຕົ້ນ ດ້ານການເມືອງ, ດ້ານວັດທະນະທຳ-ສັງຄົມ, ດ້ານເສດຖະກິດ, ກະສິກຳ, ດ້ານການຄ້າ-ການລົງທຶນ, ການທ່ອງທ່ຽວ ແລະ ອື່ນໆ.

          ສຳລັບ ເຫດການທີ່ 1 ເປີດປີທ່ອງທ່ຽວລາວ 2024 ​ໂອກາດສະເຫລີມສະຫລອງບຸນນະມັດ ສະການພະທາດຫລວງ ປະຈຳປີ 2023 ເຊິ່ງແມ່ນຄັ້ງທີ 4 ນັບແຕ່ປີ 1999 ເປັນຕົ້ນມາ, ລັດຖະບານ ໄດ້ຖືເອົາການເປີດປີທ່ອງທ່ຽວລາວ 2024 ພາຍໃຕ້ຄຳຂວັນ “ທ່ອງທ່ຽວລາວ ປອດໄພ, ຊື່ນໃຈໃນວັດ ທະນະທໍາ, ທໍາມະຊາດ ແລະ ປະຫວັດສາດ” ແລະ ສັນຍາລັກ “ຊ້າງເຜືອກງວງກ້ຽວແຄນລາວ” ເປັນເຫດການໜຶ່ງ ທີ່ມີຄວາມໝາຍຄວາມສຳຄັນ ໂດຍໄດ້ກຳນົດເອົາ 79 ກິດຈະກໍາ, ໃນນີ້ມີ 14 ກິດຈະກຳລະດັບຊາດ ເເລະ 65 ກິດຈະກໍາລະດັບເເຂວງ ເພື່ອສ້າງຂະບວນການໃຫ້ຟົດຟື້ນ ໃນຂອບເຂດທົ່ວປະເທດ ກໍຄື ພາຍໃນເເຂວງ ຕະຫລອດຮອດຂັ້ນເມືອງ ຕາມສະພາບທ່າເເຮງຂອງການທ່ອງທ່ຽວຂອງຕົນ.

       ເຫດການທີ 2 ເປີດມະຫາກໍາການທ່ອງທ່ຽວອາຊຽນ 2024 ຢ່າງເປັນທາງການ ໃນວັນທີ 24 ມັງກອນ 2024 ຢູ່ນະຄອນຫລວງວຽງຈັນ ເປັນຄັ້ງທີ 3 ທີ່ລັດຖະບານແຫ່ງ ສປປ ລາວ ໄດ້ຮັບກຽດເປັນເຈົ້າພາບ ໃນໄລຍະທີ່ ສປປ ລາວ ເປັນປະທານອາຊຽນໃນປີ 2024 ປະກອບມີ 4 ໜ້າວຽກຕົ້ນຕໍ ຄື: ກອງປະຊຸມລັດຖະມົນຕີທ່ອງທ່ຽວອາຊຽນ ແລະ ກອງປະຊຸມປິ່ນອ້ອມ, ງານວາງສະແດງການທ່ອງ ທ່ຽວອາຊຽນ, ກອງປະຊຸມທຸລະກິດທ່ອງທ່ຽວ ແລະ ການທັດສະນະສຶກສາຢ້ຽມຢາມສະຖານທີ່ທ່ອງທ່ຽວ ໂດຍໄດ້ກຳນົດຄຳຂວັນ: “ການທ່ອງທ່ຽວທີ່ມີຄຸນນະພາບ ແລະ ມີຄວາມຮັບຜິດຊອບ ເພື່ອຄວາມຍື່ນຍົງ ຂອງອາຊຽນ” ແນໃສ່ພັດທະນາການທ່ອງທ່ຽວແບບຍືນຍົງ ພາຍໃນອາຊຽນ ໃຫ້ມີຄວາມເຂັ້ມ ແຂງ, ມີປະສິດທິພາບ ແລະ ປະສິດທິຜົນສູງສຸດ ເພື່ອໂຄສະນາ ແລະ ດຶງດູດນັກທ່ອງທ່ຽວທັງພາກພື້ນ, ສາກົນ ແລະ ທົ່ວໂລກເຂົ້າມາທ່ອງທ່ຽວອາຊຽນ ໃຫ້ຫລາຍຂຶ້ນ, ເພີ່ມທະວີການຮ່ວມມື ແລະ ເສີມຂະຫຍາຍ ການຮ່ວມມືອາຊຽນ ກັບຄູ່ຮ່ວມມືພາຍນອກ ຄ່ຽງຄູ່ກັບການຮັກສາບົດບາດ ແລະ ຄວາມເປັນແກນກາງຂອງອາຊຽນ ເພື່ອໃຫ້ບັນລຸເປົ້າໝາຍ ດັ່ງຄຳຂວັນການເປັນປະທານອາຊຽນ ຂອງ ສປປ ລາວ ໃນປີ 2024 ໄດ້ກໍານົດໄວ້ວ່າ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”.

          ເຫດການທີ 3 ຄົ້ນພົບພະພຸດທະຮູບ ຢູ່ດອນເຜິ້ງຄຳ ແຂວງບໍ່ແກ້ວ ຈໍານວນຫລາຍ ເຊິ່ງການຂຸດຄົ້ນດຳເນີນເປັນ 2 ໄລຍະຄື: ໄລຍະທີ 1 ໄດ້ເລີ່ມ ຂຸດຄົ້ນລະຫວ່າງວັນທີ 14 ມີນາ ຫາ 6 ເມສາ 2024 ເປັນເວລາ 24 ວັນ, ສາມາດຂຸດພົບພະພຸດທະຮູບ ທີ່ຝັງຢູ່ພື້ນແຮ່-ຊາຍ ທີ່ມີອາຍຸຫລາຍຮ້ອຍປີ ໄດ້ທັງໝົດ 204 ອົງ ແລະ 910 ລາຍການ. ໄລຍະທີ 2 ໄດ້ເລີ່ມຂຸດຄົ້ນລະຫວ່າງ ວັນມາ 10-17 ພຶດສະພາ 2024, ສາມາດຂຸດຄົ້ນພະພຸດທະຮູບ ໄດ້ທັງໝົດ 51 ອົງ ໃນນັ້ນມີອົງໜຶ່ງໃຫຍ່ທີ່ສຸດ ຄາດວ່າອາດເປັນອົງພະປະທານມີຄວາມສູງ 2,67 ຊັງ​ຕີ​ແມັດ, ອົງພະຍາວ 1,93 ຊັງ​ຕີ​ແມັດ, ແທ່ນສູງ 74 ຊັງ​ຕີ​ແມັດ, ແທ່ນກວ້າງ 2,54 ຊັງ​ຕີ​ແມັດ, ບ່າໄຫລ່ກວ້າງ 1,23 ຊັງ​ຕີ​ແມັດ, ໜ້າຕັກກວ້າງ 2,24 ຊັງ​ຕີ​ແມັດ, ປັດຈຸບັນພະພຸດທະຮູບທັງໝົດ ໄດ້ປະດິດສະຖານໄວ້ ທີ່ວັດທອງທິບພັດທະນາຣາມ ເມືອງຕົ້ນເຜິ້ງ ເພື່ອໃຫ້ມວນຊົນທັງພາຍໃນ ແລະ ຕ່າງປະເທດ ໄດ້ສັກກະລະບູຊາ.

ເຫດການທີ 4 ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ຈັດພິທີສະເຫລີມສະຫລອງ ຫັດຖະກໍາພື້ນເມືອງພູມປັນຍາ ການຕໍ່າລາຍນາກຂອງຊຸມຊົນເຊື້ອຊາດລາວ ເປັນມໍລະດົກວັດ ທະນະທຳ ທີ່ບໍ່ເປັນວັດຖຸຂອງມວນມະນຸດ ຮັບຮອງໂດຍອົງການເພື່ອການສຶກສາ ວິທະຍາສາດ ແລະ ວັດທະນະທຳ ແຫ່ງສະຫະປະຊາຊາດ ຫລື ອຸຍແນັສໂກ ໃນວັນທີ 7 ມິຖຸນາ 2024 ທີ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ ຖືເປັນເຫດການປະຫວັດສາດ ແລະ ເປັນກຽດອັນສູງສົ່ງ ເຕັມໄປດ້ວຍຄວາມເອກອ້າງທະນົງໃຈ ຂອງປວງຊົນລາວທັງຊາດ ຕະຫລອດຮອດຄົນເຊື້ອຊາດລາວ ບໍ່ພຽງແຕ່ຢູ່ພາຍໃນປະເທດ ແຕ່ຢູ່ທົ່ວທຸກມູມຂອງໂລກ ສາມາດຢັ້ງຢືນໄດ້ຢ່າງພາກພູມໃຈວ່າ: ຫັດຖະກໍາລາຍນາກ ໄດ້ຖືກຮັບຮອງເຂົ້າເປັນມໍລະດົກໂລກຢ່າງແທ້ຈິງ ແລະ ຈະຍືນຍົງຢູ່ຄຽງຄູ່ກັບມວນມະນຸດໂລກຢ່າງຖາວອນຕະຫລອດໄປ.

ເຫດການທີ 5 ອົງການເພື່ອການສຶກສາ ວິທະຍາສາດ ແລະ ວັດທະນະທຳ ແຫ່ງສະຫະປະຊາຊາດ ຫລື ອຸຍແນັສໂກ ໄດ້ຮັບຮອງເອົາການຂຶ້ນທະບຽນ “ຟ້ອນລໍາວົງລາວ” ເປັນມໍລະດົກນາມມະທໍາຂອງມວນມະນຸດໂລກ ໃນວັນທີ 5 ທັນວາ 2024 ທີ່ ແຂວງ ອາຊັນຊົງ, ປະເທດ ປາຣາກວາຍ, ເຮັດໃຫ້ປະຊາຊົນລາວບັນດາເຜົ່າ ແລະ ສັງຄົມລາວ ມີຄວາມພາກພູມໃຈ ໃນການອານຸລັກຮັກສາມໍລະດົກ ແລະ ຄວາມຫລາກຫລາຍທາງດ້ານວັດທະນະທຳ ໃຫ້ຍືນຍົງຄົງຢູ່ຄູ່ກັບຊາດລາວຕະຫລອດໄປ.

ເຫດການທີ 6 ສປປ ລາວ ໄດ້ຮັບກຽດເປັນປະທານອາຊຽນ ຄັ້ງທີ 3 ໃນປີ 2024 ພາຍໃຕ້ຄຳຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ໂດຍສະເພາະ ໄດ້ເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44, 45 ແລະ ກອງປະຊຸມສຸດຍອດທີ່ກ່ຽວຂ້ອງ ເຊິ່ງຈັດຂຶ້ນໃນລະຫວ່າງວັນທີ 8-11 ຕຸລາ 2024 ຢູ່ນະຄອນຫລວງວຽງຈັນ. ໃນພິທີເປີດກອງປະຊຸມ ທ່ານ ທອງລຸນ ສີສຸລິດ ປະທານປະເທດ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງອາຊຽນຕະຫລອດໄລຍະ 57 ປີ ຜ່ານມາ ໂດຍສະ ເພາະໃນຂະບວນການສ້າງປະຊາຄົມອາຊຽນ ກໍຄື ການປະກອບສ່ວນອັນສໍາຄັນເຂົ້າໃນພາລະກິດປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງພາກພື້ນ ແລະ ໃນໂລກ. ພ້ອມນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຢໍ້າເຖິງຄວາມສຳຄັນຂອງການເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ເພື່ອເສີມສ້າງປະຊາຄົມອາຊຽນໃຫ້ເຂັ້ມແຂງ ແລະ ໄດ້ໃຫ້ກຽດມອບລາງວັນອາຊຽນ ໃຫ້ແກ່ອົງການຊາວໜຸ່ມອາຊຽນ ເຊິ່ງເປັນອົງການຊາວໜຸ່ມພາກພື້ນ ທີ່ມີໜ່ວຍງານຕັ້ງຢູ່ປະເທດອິນໂດເນເຊຍ ໂດຍມີຜົນງານປະກອບສ່ວນເຂົ້າໃນ ການສົ່ງເສີມການຮ່ວມມືທີ່ມີ ຄວາມຫລາກຫລາຍທາງດ້ານວັດທະນະທຳ ຂອງບັນດາຊາວໜຸ່ມອາຊຽນ ແລະ ເສີມຂະຫຍາຍຄວາມເປັນເອກະລັກຂອງອາຊຽນ ໃຫ້ແກ່ຊາວໜຸ່ມພາກພື້ນ.

ເຫດການທີ 7 ກະຊວງການຕ່າງປະເທດ ເປັນເຈົ້າພາບຈັດ ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມອື່ນໆທີ່ກ່ຽວຂ້ອງ ໄດ້ຈັດຂຶ້ນໃນລະຫວ່າງວັນທີ 24-27 ກໍລະກົດ 2024 ທີ່ນະຄອນຫລວງວຽງຈັນ ໂດຍມີກອງປະຊຸມປິ່ນອ້ອມ ທັງໝົດ 25 ກອງປະ ຊຸມ. ໃນນັ້ນ, ໄດ້ທົບທວນຄວາມຄືບໜ້າຂອງການສ້າງປະຊາຄົມອາຊຽນ, ລວມທັງຄວາມຄືບໜ້າການ ຈັດຕັ້ງປະຕິບັດບັນດາບຸລິມະສິດ ການເປັນປະທານອາຊຽນຂອງລາວ ທີ່ປິ່ນອ້ອມຄໍາຂວັນ: ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ. ພ້ອມນີ້, ຍັງໄດ້ປຶກສາຫາລືກ່ຽວກັບ ການສະໝັກເຂົ້າເປັນພາຄີ ຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ ແລະ ໄດ້ສະແດງຄວາມຍິນດີທີ່ ອານເຊີຣີ, ແຟັງລັງ, ລຸກຊໍາບວກ, ແອັດສະປາຍ ແລະ ເມັກຊິກ ຈະໄດ້ລົງນາມເຂົ້າເປັນພາຄີສົນທິສັນຍາ ດັ່ງກ່າວໃນເວລາມໍ່ໆນີ້. ນອກ ຈາກນີ້, ຍັງໄດ້ທົບທວນຄືນການຈັດຕັ້ງປະຕິບັດ ຄໍາຕົກ ລົງ 5 ຂໍ້ຂອງຜູ້ນໍາອາຊຽນ, ການພົວພັນລະຫວ່າງອາຊຽນ ແລະ ຄູ່ຮ່ວມມືພາຍນອກ.

ເຫດການທີ 8 ນະຄອນຫລວງວຽງຈັນ ເປັນເຈົ້າພາບຈັດກອງປະຊຸມເວທີ ເຈົ້ານະຄອນອາຊຽນ (AMF) ແລະ ກອງປະຊຸມເຄືອຂ່າຍບັນດານະຄອນ ອາຊີຕາເວັນອອກສ່ຽງໃຕ້ ຂອງສະມາຄົມບັນດາເຈົ້າຄອງນະຄອນ ທີ່ນໍາໃຊ້ພາສາຝຣັ່ງ ລະຫວ່າງວັນທີ 16-20 ກັນຍາ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ເພື່ອການພັດທະນາແບບຍືນຍົງ ຂອງບັນດານະຄອນອາຊຽນ” ເຊິ່ງສອດຄ່ອງກັບຄໍາຂວັນ ການເປັນປະທານອາຊຽນຂອງ ສປປ ລາວ ໃນປີ 2024, ກອງປະຊຸມໄດ້ກໍານົດ 5 ຂົງເຂດວຽກງານທີ່ສໍາຄັນ ເພື່ອນໍາມາປຶກສາຫາລື ຄື: ຕົວເມືອງທີ່ໜ້າຢູ່ ແລະ ຍືນຍົງ, ການທ່ອງທ່ຽວສີຂຽວ, ການພັດທະນາເສດຖະກິດແບບຍືນຍົງ, ຕົວເມືອງທີ່ມີຄວາມຍືນຍົງທາງດ້ານສິ່ງແວດລ້ອມ, ຄວາມເຂັ້ມແຂງທາງດ້ານ ການປ່ຽນແປງດິນຟ້າອາກາດ.

ເຫດການທີ 9 ສປປ ລາວ ໄດ້ຮັບກຽດເປັນເຈົ້າພາບ ຈັດກອງປະຊຸມລັດຖະມົນຕີ ເສດຖະກິດອາຊຽນ ແລະ ກອງປະຊຸມກ່ຽວຂ້ອງ ຄັ້ງທີ  56 ຢູ່ນະຄອນຫລວງວຽງຈັນ ໃນລະຫວ່າງວັນທີ 16-22 ກັນ ຍາ 2024 ໃນກອງປະຊຸມ ລັດຖະມົນຕີເສດຖະກິດອາຊຽນ ໄດ້ຮັບຮອງຖະແຫລງການອາຊຽນ ວ່າດ້ວຍການເຊື່ອມຈອດຕ່ອງໂສ້ການສະໜອງ, ຖະແຫລງການນີ້ ເປັນການຢືນຢັນຄຳໝັ້ນສັນຍາ ຂອງອາຊຽນຄືນໃໝ່ ເພື່ອສົ່ງເສີມນະວັດຕະກຳ, ການແຂ່ງຂັນ ແລະ ຄວາມເຂັ້ມແຂງຂອງຕ່ອງໂສ້ ການສະໜອງໃນພາກພື້ນ. ພ້ອມນີ້, ຍັງໄດ້ຮັບຮອງເອົາຄຳແນະນຳ ໃນການປັບປຸງສັນຍາແຜນວຽກຂອງອາຊຽນ ວ່າດ້ວຍການຮ່ວມມືທາງດ້ານ ຊັບສິນທາງປັນຍາ ໂດຍຄາດວ່າການເຈລະຈາປັບປຸງ ສັນຍາດັ່ງກ່າວ, ຈະສາມາດເລີ່ມຕົ້ນໄດ້ໃນປີ 2025.

ເຫດການທີ 10 ສປປ ລາວ ສໍາເລັດການເປັນເຈົ້າພາບ ຈັດກອງປະຊຸມສະມັດຊາໃຫຍ່ໄອປາ ຄັ້ງທີ 45 ລະຫວ່າງ ວັນທີ 17-23 ຕຸລາ 2024, ພາຍໃຕ້ຫົວຂໍ້ “ບົດບາດຂອງລັດຖະສະພາ ໃນການຊຸກ ຍູ້ການເຊື່ອມຈອດ ແລະ ການເຕີບໂຕແບບກວມລວມ ຂອງອາຊຽນ’’ ໃນກອງປະຊຸມ ບັນດາປະທານລັດຖະສະພາ ແລະ ຫົວໜ້າຄະນະຜູ້ແທນແຕ່ລະປະເທດ ໄດ້ຢໍ້າຄືນຄວາມໝາຍໝັ້ນ ຂອງຜູ້ນຳລັດຖະສະພາສະມາຊິກໄອປາ ທີ່ຈະຕ້ອງເພີ່ມທະວີບົດບາດລັດຖະສະພາ ໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ. ພ້ອມທັງ ໄດ້ລົງເລີກຄົ້ນຄວ້າປຶກສາຫາລື, ພິຈາລະນາ ແລະ ຮັບຮອງເອົາຮ່າງມະຕິທັງໝົດ 37 ສະບັບ. ໃນນີ້, ຂົງເຂດການເມືອງມີ 4 ສະບັບ, ຂົງເຂດເສດຖະກິດ 8 ສະບັບ, ຂົງເຂດສັງຄົມ 5 ສະບັບ, ວຽກງານເພດຍິງ 2 ສະບັບ, ວຽກງານຊາວໜຸ່ມ 3 ສະບັບ ແລະ ວຽກງານຈັດຕັ້ງພາຍໃນໄອປາ 15 ສະບັບ. ກອງປະຊຸມສະມັດຊາໃຫຍ່ໄອປາຄັ້ງນີ້, ຍັງໄດ້ພິຈາລະນາຮັບ ຮອງເອົາປະເທດມາເລເຊຍ ເປັນເຈົ້າພາບຈັດກອງປະຊຸມສະມັດຊາໃຫຍ່ ໄອປາ ຄັ້ງຕໍ່ໄປໃນປີ 2025.

ນອກຈາກ​ນີ້, ຍັງ​ມີ​ຫລາຍ​ເຫດການ​ສໍາຄັນ​ອື່ນໆ​ທີ່​ເກີດ​ຂຶ້ນ ທັງ​ຢູ່​ສູນ​ກາງ ​ແລະ ບັນດາ​ແຂວງ ຕື່ມ​ອີກ.

KPL