ຂປລ
ຂປລ. ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ (ນວ) ລົງຕິດຕາມກວດກາລາຄາສິນຄ້າ ອຸປະໂພກ ແລະ ບໍລິໂພກ ຢູ່ຕະຫລາດໂນນຄໍ້ ເມືອງໄຊເຊດຖາ ນະຄອນຫລວງວຽງຈັນ ເພື່ອຄຸ້ມຄອງລາຄາສິນຄ້າ ບໍ່ໃຫ້ມີການສວຍໂອກາດຂຶ້ນລາຄາ ແລະ ກັກຕຸນສິນຄ້າ ໃນໄລຍະສະເຫລີມສະ ຫລອງບຸນປີໃໝ່ສາກົນ ຈົນຮອດບຸນປີໃໝ່ ຈີນ ແລະ ຫວຽດນາມ ເນື່ອງຈາກມີບຸນ ແລະ ງານລ້ຽງຕ່າງໆ
ຂປລ. ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ (ນວ) ລົງຕິດຕາມກວດກາລາຄາສິນຄ້າ ອຸປະໂພກ ແລະ ບໍລິໂພກ ຢູ່ຕະຫລາດໂນນຄໍ້ ເມືອງໄຊເຊດຖາ ນະຄອນຫລວງວຽງຈັນ ເພື່ອຄຸ້ມຄອງລາຄາສິນຄ້າ ບໍ່ໃຫ້ມີການສວຍໂອກາດຂຶ້ນລາຄາ ແລະ ກັກຕຸນສິນຄ້າ ໃນໄລຍະສະເຫລີມສະ ຫລອງບຸນປີໃໝ່ສາກົນ ຈົນຮອດບຸນປີໃໝ່ ຈີນ ແລະ ຫວຽດນາມ ເນື່ອງຈາກມີບຸນ ແລະ ງານລ້ຽງຕ່າງໆ ເຮັດໃຫ້ຄວາມຕ້ອງການ ບໍລິໂພກສິນຄ້າຕ່າງໆເພີ່ມຂຶ້ນ ອາດເປັນສາເຫດທີ່ເຮັດໃຫ້ຊາວຄ້າຂາຍ ສວຍໂອກາດຂຶ້ນລາຄາ ສິນຄ້າຕາມລໍາພັງໃຈ.
ທ່ານ ນາງ ໄຊນາລອນ ຈຸນດາຣາ ຮອງຫົວໜ້າພະແນກອຸດສາຫະກຳ ແລະ ການຄ້າ ນະຄອນ ຫລວງວຽງຈັນ ໃຫ້ຮູ້ວ່າ: ການຄຸ້ມຄອງລາຄາສິນຄ້າ ແລະ ຄ່າບໍລິການ ປະຕິບັດຕາມຫລັກການຂອງລາຄາຢູ່ລາວ ຖືກກຳນົດດ້ວຍກົນໄກຕະຫລາດ ທີ່ມີການຄຸ້ມຄອງດັດສົມຂອງລັດ, ລັດເຄົາລົບສິດໃນການກຳນົດລາຄາ ແລະ ການແຂ່ງຂັນທາງດ້ານ ລາຄາຂອງຜູ້ດໍາເນີນທຸລະກິດ ຕາມລະບຽບກົດໝາຍ, ລັດນໍາໃຊ້ມາດຕະການ ໃນການຄຸ້ມຄອງລາຄາຕາມຄວາມຈໍາເປັນ ບົນພື້ນຖານຫລັກການບໍ່ຈໍາແນກປະ ຕິບັດ ແລະ ຄວາມໂປ່ງໃສ. ພ້ອມນີ້, ຖ້າມີການພົບເຫັນ ການຂຶ້ນລາຄາສິນຄ້າ ຫລື ຕິດລາຄາເກີນກຳນົດ ແລະ ກັກຕຸນສິນຄ້າເພື່ອເກັງກຳໄລ ສາມາດໂທແຈ້ງເຂົ້າເບີ 030 5052 603, 030 5026 826 ເພື່ອເປັນການໃຫ້ຂໍ້ມູນໄດ້.
ພ້ອມກັນນີ້, ຍັງໄດ້ລົງຕິດຕາມກວດກາກະຕ່າຂອງຂວັນ, ທັງແນະນໍາໃຫ້ບັນດາຮ້ານຄ້າ ຕິດຊື່ຮ້ານ, ເບີໂທ ເພື່ອຮັບປະກັນໃຫ້ກະຕ່າຂອງຂວັນ ທີ່ຈໍາໜ່າຍ ບໍ່ໃຫ້ນໍາໃຊ້ສິນຄ້າທີ່ໃກ້ຈະໝົດອາຍຸ ຫລື ໝົດອາຍຸ ມາຈໍາໜ່າຍໃຫ້ລູກຄ້າ, ຖ້າຫາກກວດເຫັນແມ່ນຈະຖືກປັບໃໝ ໂດຍບໍ່ໄດ້ຕັກເຕືອນ. ສໍາລັບຊາວຄ້າຂາຍຜູ້ໃດ ລະເມີດຕໍ່ລະບຽບການ ຂອງຕະຫລາດວາງອອກ ເປັນຕົ້ນ ສວຍໂອກາດຂຶ້ນລາຄາສິນ ຄ້າ, ປັບຕາຊິງ ແລະ ອື່ນໆ ຈະຖືກດຳເນີນຄະດີຕາມລະບຽບ ທີ່ວາງໄວ້ຢ່າງເຄັ່ງຄັດ ຄື: ຖ້າກະທຳຜິດເທື່ອທຳອິດ ຈະອອກໃບແຈ້ງເຕືອນເຖິງຮ້ານ, ເທື່ອທີ່ສອງຈະເຮັດບົດບັນທຶກ ແລະ ກະທຳຜິດ ເທື່ອທີສາມຈະໃຫ້ຢຸດເຊົາກິດຈະການຊົ່ວຄາວ ແລະ ປັບໃໝຕາມລະບຽບການ.
ຜ່ານການລົງກວດກາສະພາບຕົວຈິງ ເຫັນໄດ້ວ່າ ລາຄາສິນຄ້າມີໄດ້ມີການຫລຸດລົງ ແລະ ຢູ່ໃນສະພາວະຄົງທີ່ຕາມການກໍານົດ ຂອງຂະແໜງອຸດສາຫະກໍາ ແລະ ການຄ້າ ໂດຍສະເພາະ ໄກ່, ໄຂ່, ພືດຜັກ, ເຂົ້າ, ປາ ແລະ ສິນຄ້າອື່ນໆ ທີ່ຢູ່ໃນບັນຊີການຄຸ້ມຄອງ ຂອງພາກສ່ວນ ທີ່ກ່ຽວຂ້ອງ.
ທ່ານ ວຽງຄໍາ ລໍວັນໄຊ ຫົວໜ້າຈັດສັນຕະຫລາດໂນນຄໍ້ ໄດ້ໃຫ້ຮູ້ວ່າ: ຕະຫລາດໂນນຄໍ້ ເມືອງໄຊເຊດຖາ ໄດ້ກຽມຄວາມພ້ອມຮອບດ້ານ ເພື່ອສະໜອງສິນຄ້າປະເພດຕ່າງໆ ໃຫ້ພຽງພໍກັບຄວາມຕ້ອງການຂອງຜູ້ບໍລິໂພກ ຢູ່ນະຄອນຫລວງວຽງຈັນ, ພ້ອມທັງວາງມາດ ຕະການຢ່າງ ເຂັ້ມງວດ ໃຫ້ຊາວຄ້າຂາຍຕິດປ້າຍລາຄາສິນຄ້າຢ່າງຊັດເຈນ ເພື່ອບໍ່ໃຫ້ເອົາລັດເອົາປຽບຜູ້ບໍລິໂພກ, ທັງເປັນການຢັ້ງຢືນໃຫ້ຜູ້ບໍລິໂພກ ມີຄວາມໝັ້ນໃຈທີ່ຈະຊື້ສິນຄ້າປະເພດຕ່າງໆ.
KPL
