*ເມື່ອບໍ່ດົນມານີ້ ທ່ານ ຄອນສະຫງ່າ ພິມມະສອນ ກຳມະການພັກແຂວງຫົວໜ້າຄະນະໂຄສະນາອົບຮົມແຂວງ ພະນັກງານຫັນລົງກໍ່ສ້າງຮາກຖານການເມືອງ ປະຈຳເມືອງສາມັກຄີໄຊ ພ້ອມດ້ວຍຄະນະຫັນລົງກໍ່ສ້າງຮາກຖານການເມືອງ ສົມທົບກັບຄະນະນຳ ເມືອງສາມັກຄີໄຊ, ພາກສ່ວນໜ່ວຍງານປູກຝັງ-ລ້ຽງສັດ ແລະ ພາກສ່ວນທ່ີກ່ຽວຂ້ອງ.

    ສຳລັບການລົງຢ້ຽມຢາມຊຸກຍູ້ຄອບຄົວປູກພືດສະອາດທິ່ບ້ານ ສີວິໄລ ແລະ ບ້ານໃຫຍ່ ເຊກະໝານເຊິ່ງເປັນຄອບຄົວທີ່ຫ້ອງການກະສິກຳ-ປ່າໄມ້ເມືອງ ໄດ້ກຳນົດເອົາໃນການປູກພືດສະອາດ ແລະ ຂະຫຍາຍການປູກພືດສະອາດພາຍໃນເມືອງໃຫ້ຫລາຍຂຶ້ນ ມີ 2 ຄອບຄົວຄື: ຄອບຄົວທ່ານ ຄຳພຸດ ທີນທະວົງ ແລະ ຄອບຄົວ ທ່ານ ສົມໃຈ ໄຊປະເສີດ ຢູ່ບ້ານສີວິໄລ ຊຶ່ງທັງ 2 ຄອບຄົວນີ້ໄດ້ເອົາໃຈໃສ່ການປູກພືດຜັກເປັນຕົ້ນ: ຜັກກາດ, ຜັກສະຫລັດ, ໝາກບວບ-ໝາກນອຍ, ຜັກຫອມ...ຜົນຜະລິດດັ່ງກ່າວ ແມ່ນໄດ້ຈຳໜ່າຍຂາຍພາຍໃນບ້ານ ແລະ ຕາມທ້ອງຕະຫລາດ. ນອກນີ້, ຍັງໄດ້ລ້ຽງສັດປະເພດໝູ, ໄກ່, ງົວ, ຄວາຍ ຈຳນວນໜຶ່ງ ຊຶ່ງໃນປັດຈຸບັນສາມາດສ້າງລາຍຮັບໃຫ້ຄອບຄົວ ທ່ານ ຄຳພຸດ ອິນທະວົງ ປະມານປີລະ 50-60 ລ້ານກີບ, ຄອບຄົວ ທ່ານ ສົມໃຈ ໄຊປະເສີດ ປະມານປີລະ 30-40 ລ້ານກີບ ຊຶ່ງ ເຮັດໃຫ້ 2 ຄອບຄົວດັ່ງກ່າວມີເງິນເກັບ, ມີທຶນໝູນວຽນ. ພ້ອມນັ້ນກໍໄດ້ຢ້ຽມຢາມສີນຄ້າໜຶ່ງເມືອງໜຶ່ງ ຜະລິດຕະພັນແຫ່ງຊາດຂອງກຸ່ມຫັດຖະກຳຕ່ຳແຜ່ນແພຜ້າກະໂດ ບ້ານ ສີວິໄລ. ຫລັງຈາກນັ້ນ, ກໍໄດ້ຢ້ຽມຢາມຊຸກຍູ້ຄອບຄົວ ທ່ານ ແຫລ້ + ນາງ ໄມ , ຄອບຄົວ ທ່ານ ວັນສຸກ + ນາງ ດາວີ ບ້ານໃຫຍ່ເຊກະໝານ ທັງ 2 ຄອບຄົວໄດ້ປູກໝາກຮຸ່ງ, ໝາກເຜັດ, ໝາກເຂືອ, ໝາກແຕງ, ໝາກຖົ່ວ ແລະ ພືດຜັກຈຳນວນໜຶ່ງ. ໃນປັດຈຸບັນທັງ 2 ຄອບຄົວສາມາດສ້າງລາຍຮັບເຂົ້າຄອບຄົວໄດ້ປະມານ 50-60 ລ້ານກີບຕໍ່ປີ.

    ການລົງຕິດຕາມກວດກາໂຄງການ ແລະ ບັນດາຄອບຄົວຕົວແບບ ໃນຄັ້ງນີ້ບັນດາເຈົ້າຂອງໂຄງການ ແລະ ຄອບຄົວຕົວແບບໄດ້ລາຍງານສະພາບການເຄື່ອນໄຫວຂອງຕົນ ໂດຍຫຍໍ້ກ່ຽວກັບການກໍ່ສ້າງໂຄງການ ແລະ ຂໍ້ສະດວກ-ຂໍ້ຫຍຸ້ງຍາກຂອງຄອບຄົວຕົວແບບໃຫ້ບັນດານໍາຂັ້ນເມືອງຮັບຊາບເພື່ອຊຸກຍູ້ສົ່ງເສີມ ແລະ ຫາວິທີທາງອອກໃຫ້ປະຊາຊົນ ໂດຍສະເພາະແມ່ນຄອບຄົວຕົວແບບໃຫ້ມີການພັດທະນາຂະຫຍາຍກິດຈະການຂອງຕົນໃຫ້ດີຂຶ້ນກວ່າເກົ່າ. ຈາກນັ້ນທ່ານ ຄອນສະຫງ່າ ພິມມະສອນ ກຳມະການພັກແຂວງ ຫົວໜ້າຄະນະໂຄສະນາອົບຮົມແຂວງ ໃນນາມພະນັກງານຫັນລົງກໍ່ສ້າງຮາກຖານການເມືອງປະຈຳ ເມືອງສາມັກຄີໄຊ ພ້ອມດ້ວຍຄະນະຫັນລົງກໍ່ສ້າງຮາກຖານການເມືອງ, ໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາຄອບຄົວຕົວແບບການປູກພືດສະອາດທີ່ສາມາດ ເປັນຕົວຢ່າງໃຫ້ແກ່ບັນດາຄອບຄົວພາຍໃນບ້ານຂອງຕົນ ໃນການປູກຝັງ-ລ້ຽງສັດ ແລະ ເຊື່ອໝັ້ນວ່າໃນຕໍ່ໜ້ານີ້ບັນດາຄອບຄົວປູກພືດສະອາດ ດັ່ງກ່າວ ຈະສືບຕໍ່ປັບປຸງຂະຫຍາຍກິດຈະການຂອງຕົນ ໃຫ້ເຕີບໃຫຍ່ຂະຫຍາຍຕົວໄປຕາມຄວາມຕ້ອງການຂອງສັງຄົມ ໃນຕໍ່ໜ້າຜະລິດສີນຄ້າໃຫ້ຫລາຍຂຶ້ນກວ່າເກົ່າ ສາມາດສ້າງລາຍຮັບເຂົ້າໃນການພັດທະນາຄອບຄົວຂອງຕົນ ແລະ ກາຍເປັນຄອບຄົວຮັ່ງມີຜາສຸກ.

KPL