*ກໍາມາທິການບັນດາເຜົ່າ(ກບຜ) ຝຶກອົບຮົມສ້າງຄວາມອາດສາມາດ ປະຈຳປີ 2024 ໃຫ້ພະນັກງານພາຍໃນກໍາມາທິການບັນດາເຜົ່າ ໃນວັນທີ 25 ທັນວາ 2024 ທີ່ແຂວງວຽງຈັນ ໂດຍການເປັນປະທານຂອງທ່ານ ນາງ ທັດສະດາພອນ ຈັນທະມາດ ຮອງປະທານກໍາມາທິການບັນດາເຜົ່າ, ມີຜູ້ຕາງໜ້າຈາກສະພາແຫ່ງຊາດ, ສູນກາງແນວລາວສ້າງຊາດ ແລະ ກະຊວງພາຍໃນເຂົ້າຮ່ວມ.

    ທ່ານ ນາງ ທັດສະດາພອນ ຈັນທະມາດ ກ່າວວ່າ: ການຝຶກອົບຮົມຄັ້ງນີ້ ເປັນການຍົກສູງຂີດຄວາມສາມາດ, ເພີ່ມທັກສະໃນການປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ຂອງພະນັກງານ ເພື່ອຮັບປະກັນການເປັນເສນາທິການທີ່ດີ ແກ່ພະແນກ, ກົມກໍຄືກຳມາທິການ ໃຫ້ມີຄວາມເຂັ້ມແຂງຂຶ້ນເທື່ອລະກ້າວ ພ້ອມທັງເຊື່ອມຊຶມບັນດານິຕິກຳທີ່ກ່ຽວຂ້ອງໃນຂົງເຂດວຽກງານຂອງກຳມາທິການບັນດາເຜົ່າ, ກະຊວງພາຍໃນ, ສູນກາງແນວລາວສ້າງຊາດເພ່ືອນຳໄປຈັດຕັ້ງຜັນຂະຫຍາຍເຂົ້າໃນໜ້າທີ່ວຽກງານທີ່ຕົນຮັບຜິດຊອບ.

    ພ້ອມນີ້, ຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ ເນື້ອໃນມະຕິກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ກ່ຽວກັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ຮ່າງມະຕິກອງປະຊຸມສະ ໄໝສາມັນເທື່ອທີ 8 ຂອງສະພາ ແຫ່ງຊາດ ຊຸດທີ IX ກ່ຽວກັບວຽກງານ 3 ສ້າງ, ເຜີຍແຜ່ເນື້ອໃນຮ່າງປຶ້ມ 50 ຊົນເຜົ່າ ໃນວົງຄະນາຍາດແຫ່ງ ສປປ ລາວ, ເນື້ອໃນວຽກງານແນວໂຮມ ແລະ ວຽກງານຊັ້ນຄົນ-ສັງຄົມ, ບົດຮຽນການແຍກໂຄງປະກອບການຈັດຕັ້ງ (ແຍກພະແນກ), ບາງເນື້ອໃນ ການກຳນົດຕຳແໜ່ງງານຂອງຂັ້ນພະແນກ ແລະ ບາງເນື້ອໃນຂອງດຳລັດວ່າດ້ວຍອົງການຈັດຕັ້ງສັງຄົມໃນໄລຍະຜ່ານມາ ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ວິທີການແກ້ໄຂ. ໂອກາດນີ້, ຜູ້ເຂົ້າຮ່ວມໄດ້ພ້ອມກັນຄົ້ນຄວ້າ ແລະ ແລກປ່ຽນຄຳຄິດຄຳເຫັນ ຢ່າງກົງໄປກົງມາໂດຍສຸມໃສ່ຈຸດປະສົງ ທີ່ບັນດາວິທະຍາກອນໄດ້ຍົກຂຶ້ນໃຫ້ໄດ້ຮັບປະສິດທິພາບ ແລະ ປະສິດທິຜົນສູງສຸດ.

KPL