*ກອງປະຊຸມປຶກສາຫາລື ສ້າງຄວາມເອກະພາບ ແລະ ການກະກຽມຄວາມພ້ອມ ໃຫ້ແກ່ການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ຂອງເມືອງທຸລະຄົມ ແຂວງວຽງຈັນ ຈັດຂຶ້ນໃນວັນທີ 26 ທັນວາ 2024 ຜ່ານມາໂດຍການເປັນປະທານ ຂອງທ່ານ ນາງ ວົງເດືອນ ວັດຕະໂສ ເຈົ້າເມືອງໆທຸລະຄົມ ພ້ອມດ້ວຍອົງການ, ກົມກອງ, ກຸ່ມບ້ານ ແລະ ພາກສ່ວນກ່ຽວຂ້ອງເຂ້ົາຮ່ວມ.

   ທ່ານ ຄໍາມະນີ ລາດຊະມີໄຊ ຫົວໜ້າຫ້ອງການແຜນການ ແລະ ການລົງທຶນເມືອງ ໄດ້ຜ່ານແຜນການເຄື່ອນໄຫວການຈັດຕັ້ງປະຕິບັດວຽກງານດັ່ງກ່າວ ບົນພື້ນຖານການຜັນຂະຫຍາຍ ແລະ ຈັດຕັ້ງປະຕິບັດກົດໝາຍວ່າດ້ວຍສະຖິຕິ ສະບັບເລກທີ 24/ສພຊ ລົງວັນທີ 11 ພຶດສະພາ 2017, ຂໍ້ຕົກລົງຂອງເຈົ້າແຂວງວຽງຈັນ ສະບັບ ເລກທີ 531/ຈຂ.ວຈ ລົງວັນທີ 29 ມີນາ 2024 ແລະ ຄໍາແນະນໍາຂອງພະແນກແຜນການ ແລະ ການລົງທຶນ ແຂວງວຽງຈັນ ຈຸດປະສົງ, ເປົ້າໝາຍເພື່ອເຮັດໃຫ້ການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ຂອງເມືອງທຸລະຄົມ ດໍາເນີນສອດຄ່ອງຕາມບາດກ້າວ, ຂ້ັນຕອນ ແລະ ສໍາເລັດຕາມເວລາກໍານົດໄວ້.

   ທ່ານ ນາງ ວົງເດືອນ ວັດຕະໂສ ໄດ້ຍົກໃຫ້ເຫັນຄວາມຈໍາເປັນ ແລະ ຄວາມຮຽກຮ້ອງຕ້ອງການ ຂອງວຽກງານການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດແມ່ນຄວາມຮັບຜິດຊອບ ຂອງຄະນະພັກ-ຄະນະນໍາທຸກຂັ້ນ ແລະ ປະຊາຊົນບັນດາເຜົ່າໝົດທຸກຄົນຊຶ່ງ ຄົບຮອບ 10 ປີ ຈຶ່ງສໍາຫລວດເທື່ອໜຶ່ງ. ສະນັ້ນ, ຮຽກຮ້ອງໃຫ້ຄະນະຮັບຜິດຊອບ ທີ່ໄດ້ຮັບການແຕ່ງຕັ້ງຈົ່ງພ້ອມກັນເປັນເຈົ້າການປະຕິບັດວຽກງານໃຫ້ມີຜົນສໍາເລັດ, ເອົາໃຈໃສ່ໃນການສ່ອງແສງລາຍງານຄວາມຄືບໜ້າ ຂອງການເຄື່ອນໄຫວໃຫ້ຄະນະຊີ້ນໍາຢ່າງປົກກະຕິ, ໃຫ້ຖືເອົາວຽກງານດັ່ງກ່າວເປັນຄວາມຮັບຜິດຊອບການເມືອງ ຕິດພັນກັບການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກເມືອງ ຄັ້ງທີ VIII ແລະ ຂອງຄະນະພັກຂັ້ນເທິງ, ຮັບປະກັນໃຫ້ໄດ້ 300% ຄື: ຄວາມສະຫງົບປອດໄພ 100%, ຮັບປະກັນຂໍ້ມູນຖືກຕ້ອງຊັດເຈນ 100% ແລະ ສະຫລຸບລາຍງານໃຫ້ຂັ້ນເທິງທັນເວລາ 100%.

   ການສຳຫລວດພົນລະເມືອງ ແລະ ທີ່ຢູ່ອາໄສ ໃນຂອບເຂດທົ່ວປະເທດ ຄັ້ງທີ  V ປີ 2025 ແມ່ນ ການສຳຫລວດລະດັບຊາດ ທີ່ເປັນແຫລ່ງຂໍ້ມູນໜຶ່ງດຽວທີ່ສຳຄັນໃນການປັບປຸງຂໍ້ມູນພົນລະເມືອງແຫ່ງຊາດ ຂອງ ສປປ ລາວ ຕະຫລອດ ໄລຍະ 10 ປີຜ່ານມາ, ເປັນຖານຂໍ້ມູນທີ່ຈະປະກອບດ້ວຍຂໍ້ມູນກ່ຽວກັບການຈະເລີນພັນ, ການເສຍຊີວິດ ແລະ ການເຄື່ອນຍ້າຍຂອງພົນລະເມືອງ, ລວມທັງຂໍ້ມູນລະອຽດກ່ຽວກັບຄຸນລັກສະນະຂອງພົນລະເມືອງ, ໂຄງປະກອບດ້ານອາຍຸ, ເພດ, ຊົນເຜົ່າ, ສະສະໜາ, ການຂຶ້ນທະບຽນການເກີດ, ການຖືບັດປະຈຳຕົວ-ສຳມະໂນຄົວ, ການສຶກສາ, ການປະກອບອາຊີບ, ເງື່ອນໄຂການດຳລົງຊີວິດ ແລະ ການເຂົ້າເຖິງການບໍລິການຕ່າງໆ ຊຶ່ງການສຳຫລວດຄັ້ງນີ້ ຈະໄດ້ຂໍ້ມູນຈຳນວນປະຊາກອນ, ຄຸນລັກສະນະທາງດ້ານປະຊາກອນ, ການຂະຫຍາຍຕົວ ແລະ ການແຈກຢາຍຂອງພົນລະເມືອງ, ສະພາບທາງດ້ານເສດຖະກິດ-ສັງຄົມ ແລະ ທີ່ຢູ່ອາໄສຂອງພົນລະເມືອງ  ຊຶ່ງເປັນຂໍ້ມູນທີ່ສຳຄັນຫລາຍ ໃນການຕິດຕາມ ແລະ ປະເມີນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ, ເປົ້າໝາຍການພັດທະນາ ແບບຍືນຍົງ, ການຫລຸດພົ້ນອອກຈາກປະເທດດ້ອຍພັດທະນາ ແລະ ການປັບປຸງນະໂຍບາຍທາງດ້ານ ພົນລະເມືອງຂອງລາວ.

ແຫລ່ງຂ່າວຈາກ: ແຂວງວຽງຈັນ

KPL