ຂປລ
ຂປລ. ໂຄງການເຊື່ອມຕໍ່ ພະລັງງານສະອາດພາກເໜືອ ໄລະຍະທີ I ກໍຄື ໂຄງການໄຟຟ້າພະລັງງານແສງຕາເວັນ ກໍາລັງຕິດຕັ້ງ 1.000 ເມກາວັດ(MW) ຂອງບໍລິສັດ ຊີຈີເອັນ ໄດ້ເລີ່ມລົງມືກໍ່ສ້າງຢ່າງເປັນທາງການ ໃນວັນທີ 18 ທັນວາ 2024 ຜ່ານມາ ເຊິ່ງເປັນໂຄງການໄຟຟ້າ ພະລັງງານແສງຕາເວັນຂະໜາດໃຫຍ່ ໂຄງການທໍາອິດຂອງ ສປປ ລາວ.
ຂປລ. ໂຄງການເຊື່ອມຕໍ່ ພະລັງງານສະອາດພາກເໜືອ ໄລະຍະທີ I ກໍຄື ໂຄງການໄຟຟ້າພະລັງງານແສງຕາເວັນ ກໍາລັງຕິດຕັ້ງ 1.000 ເມກາວັດ(MW) ຂອງບໍລິສັດ ຊີຈີເອັນ ໄດ້ເລີ່ມລົງມືກໍ່ສ້າງຢ່າງເປັນທາງການ ໃນວັນທີ 18 ທັນວາ 2024 ຜ່ານມາ ເຊິ່ງເປັນໂຄງການໄຟຟ້າ ພະລັງງານແສງຕາເວັນຂະໜາດໃຫຍ່ ໂຄງການທໍາອິດຂອງ ສປປ ລາວ.
ໂຄງການຖານເຊື່ອມຕໍ່ພະລັງງານສະອາດ ພາກເໜືອຂອງບໍລິສັດ ຊີຈີເອັນ ແມ່ນໂຄງການສໍາຄັນສໍາລັບການເຊື່ອມຈອດ ດ້ານພະລັງງານໄຟຟ້າລາວ ແລະ ຈີນ ໂດຍວາງແຜນສ້າງຖານພະລັງງານ ສະອາດຂະໜາດໃຫຍ່ ທີ່ປະສົມປະສານລະຫວ່າງ ໄຟຟ້າພະລັງງານລົມ, ແສງຕາເວັນ, ຊີວະມວນ ແລະ ອື່ນໆ ເຊິ່ງໂຄງການໄລະຍະທີ Ⅰ ກໍາລັງຕິດຕັ້ງ 1.000 MW ຕັ້ງຢູ່ ເມືອງໄຊ ແລະ ເມືອງນາໜໍ້ ແຂວງອຸດົມໄຊ. ພາຍຫລັງກໍ່ສ້າງສໍາເລັດແລ້ວ ຈະສາມາດຜະລິດໄຟຟ້າໄດ້ 1,7 ຕື້ກິໂລວັດໂມງຕໍ່ປີ, ຜົນປະໂຫຍດດ້ານສິ່ງແວດລ້ອມ ທຽບເທົ່າກັບການປະຢັດການນໍາໃຊ້ຖ່ານຫີນ 510.000 ໂຕນຕໍ່ປີ, ລົດການປ່ອຍອາຍພິດເຮືອນແກ້ວ 140 ລ້ານໂຕນຕໍ່ປີ.
ທ່ານ ຄໍາພຽນ ຢາຈົງວາງ ຮອງເລຂາພັກແຂວງແຂວງອຸດົມໄຊ ໄດ້ກ່າວວ່າ: ການພັດທະນາໂຄງການໄຟຟ້າພະລັງງານແສງຕາເວັນ ຂອງບໍລິສັດ ຊີຈີເອັນ ຈະຊ່ວຍຊຸກຍູ້ດ້ານການສ້າງເສັ້ນທາງ, ສະໜັບສະໜູນດ້ານການສຶກສາ, ສ້າງສາພັດທະນາຊຸມຊົນ, ການສະໜອງນໍ້າ ໄຟຟ້າ ແລະ ອື່ນໆ. ພ້ອມນີ້, ຍັງເປັນການສ້າງວຽກ ເຮັດງານທໍາທີ່ໜັ້ນຄົງ, ສ້າງບ້ານໃນຊົນນະບົດໃຫ້ເປັນຕົວເມືອງນ້ອຍ, ປ່ຽນແປງວິຖີຊີວິດແບບດັ້ງເດີມ ໃຫ້ເປັນຮູບແບບການຄ້າ ແລະ ການບໍລິການແບບໃໝ່ ເພື່ອປະກອບສ່ວນຢ່າງຕັ້ງໜ້າ ໃຫ້ແກ່ການພັດທະນາເສດຖະກິດ-ສັງຄົມ ຂອງແຂວງອຸດົມໄຊ.
ໃນຂະນະທີ່ໄດ້ລົງທຶນກະຕຸ້ນ ການພັດທະນາເສດຖະກິດຂອງລາວ, ບໍລິສັດ ຊີຈີເອັນ ກໍໄດ້ຈັດຕັ້ງປະຕິບັດແຜນ “ຫິງຫ້ອຍເຮືອງແສງ” (CGN Shimmer Plan) ໂດຍຈັດຕັ້ງປະຕິບັດການຝຶກອົບຮົມ ນັກສຶກສາວິຊາຊີບ, ຊ່ວຍເຫລືອສ້າງໂຮງຮຽນ, ສົ່ງເສີມກະສິກໍາ ແລະ ອື່ນໆ ທີ່ສ້າງຜົນປະໂຫຍດແກ່ ປະຊາຊົນ ຢ່າງຕໍ່ເນື່ອງ, ສຸມໃສ່ການຍົກລະດັບຊີວິດ ການເປັນຢູ່ຂອງປະຊາຊົນລາວ. ຕາມສະຖິຕິໂຄງການໄລຍະທີ I ໄດ້ກະຕຸ້ນໃຫ້ບັນດາວິສາຫະກິດ ໃນທ້ອງຖິ່ນກວ່າ 30 ບໍລິສັດ ເຂົ້າມາມີສ່ວນຮ່ວມ ໃນການກໍ່ສ້າງໂຄງການດັ່ງກ່າວ, ໃນໄລຍະການກໍ່ສ້າງຈະສາມາດສ້າງວຽກເຮັດງານທໍາຫລາຍກວ່າພັນຕໍາແໜ່ງ.
ໃນວັນດຽວກັນ, “ຖະໜົນ CGN” ທີ່ເມືອງໄຊ ແຂວງອຸດົມໄຊ ທີ່ສ້າງໂດຍບໍລິສັດ ຊີຈີເອັນ ກໍໄດ້ເປີດນໍາໃຊ້ຢ່າງເປັນທາງການ ເຊິ່ງບໍ່ພຽງແຕ່ເປັນການປັບປຸງໂຄງລ່າງພື້້ນຖານ ໃນເມືອງໄຊ ເຂດທີ່ໂຄງການຕັ້ງຢູ່ເທົ່ານັ້ນ, ຍັງອໍາອວຍຄວາມສະດວກ ໃຫ້ແກ່ການເດີນທາງໄປ-ມາຂອງປະຊົນຊົນ ໃນຂອບເຂດອ້ອມຂ້າງ ຂອງໂຄງການອີກດ້ວຍ.
KPL
