ຂປລ. ໃນປີ 2024 ນີ້, ກອງປະຕິບັດຄຳຕັດສິນຂອງສານ ປະຈຳນະຄອນຫລວງວຽງຈັນ (ນວ) ມີຄຳຕັດສິນເຂົ້າ ທັງໝົດ 1.220 ເລື່ອງ. ໃນນັ້ນ, ປະຕິບັດສຳເລັດ ມີ 232  ເລື່ອງ, ຄຳຕັດສິນທີ່ໄດ້ກະກຽມອອກຄຳສັ່ງໂຈະ ມີ 858 ເລື່ອງ. ໃນຂະນະທີ່ ຄໍາຕັດສິນຂອງສານ ຢູ່ກອງປະຕິບັດຄຳຕັດສິນຂອງສານ ມີທັງໝົດ 13.356 ເລື່ອງ, ຜ່ານການຈັດຕັ້ງປະຕິບັດຕົວຈິງ ເຫັນວ່າຍັງມີບັນຫາຫຍຸ້ງຍາກ ແລະ ສິ່ງທ້າທາຍຫລາຍຢ່າງ ເຮັດໃຫ້ການຕັດສິນຄະດີ ຊັກຊ້າ, ຕົກຄ້າງ ເຊິ່ງກອງປະຕິບັດຄຳຕັດສິນຂອງສານ ປະຈຳ ນວ ກໍໄດ້ວາງຫລາຍມາດຕະການ ເພື່ອແກ້ໄຂ ໃຫ້ສຳເລັດຕາມເປົ້າໝາຍ.

 ທ່ານ ລັດສະໝີ ເພັດລາວັນ ຫົວໜ້າກອງປະຕິບັດຄຳຕັດສິນຂອງສານ ປະຈຳ ນວ ໄດ້ໃຫ້ຮູ້ ໃນກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ນະຄອນຫລວງວຽງຈັນ ຊຸດທີ II ໃນວັນທີ 20 ທັນວາ 2024 ວ່າ: ຈຳນວນຄຳຕັດສິນ ຄະດີແພ່ງ ທີ່ຄ້າງປະຕິບັດຫລາຍປີ ມີທັງໝົດ 1.399 ເລື່ອງ, ຄະດີອາຍາທົ່ວໄປ ມີ 7.033 ເລື່ອງ ແລະ ຄະດີຢາເສບຕິດ ມີທັງໝົດ 4.761 ເລື່ອງ (ນັບແຕ່ປີ 2022 ຄືນຫລັງ). ຕໍ່ກັບບັນຫານີ້, ກອງປະຕິບັດຄຳຕັດສິນຂອງສານ ປະຈຳ ນວ ໄດ້ວາງຫລາຍມາດຕະການ ເພື່ອແກ້ໄຂ ເປັນຕົ້ນ ກວດກາສຳນວນຄຳຕັດສິນຂອງສານ ທັງໝົດ, ສ້າງຖານຂໍ້ມູນເປັນລະບົບ ເພື່ອຂຶ້ນບັນຊີແຍກເປັນສຳນວນທີ່ມີເງື່ອນໄຂ ແລະ ບໍ່ມີເງື່ອນໄຂການປະຕິບັດ ແລ້ວສ້າງເປັນແຜນການນຳມາປະຕິບັດໃຫ້ສຳເລັດ; ປະສານສົມທົບກັບພາກສ່ວນທີ່ກ່ຽວ ຂ້ອງ ຊອກວິທີປະຕິບັດຕໍ່ສຳນວນ ຄຳຕັດສິນທີ່ມີເງື່ອນໄຂ ເພື່ອຄວາມເປັນເອກະພາບ ແລະ ຂໍທິດຊີ້ນຳຈາກຂັ້ນເທິງຂອງຕົນ; ສົ່ງພະນັກງານປະຕິບັດ ໄປປະຈໍາຢູ່ຄ້າຍຄຸມຂັງ-ຄ້າຍດັດສ້າງ ເກັບກຳບັນຊີລາຍຊື່ນັກໂທດ, ໂຄສະນາເຜີຍແຜ່ກົດໝາຍ, ສຶກສາອົບຮົມນັກໂທດ, ລະດົມຍາດພີ່ນ້ອງ ໃຫ້ປະຕິບັດຄໍາຕັດສິນຂອງສານ ຕາມຄຳແນະນຳຮ່ວມຂອງ 4 ພາກສ່ວນ ແລະ ໄດ້ສ້າງແຜນນຳເອົາຄະດີລົງບ້ານ ເພື່ອເກັບຄ່າປັບໃໝ, ຊັບສິນທີ່ສານຕັດສິນຮິບ ແມ່ນພາກສ່ວນໃດຄຸ້ມຄອງ ແລະ ຊອກສາເຫດທີ່ພາໃຫ້ ບໍ່ສາມາດຈັດຕັ້ງປະຕິບັດໄດ້; ຄຳຕັດສິນ ທີ່ຜ່ານການກວດກາແລ້ວ ມີເງື່ອນໄຂປະຕິບັດຄົບຖວ້ນ ຕາມຄຳຕັດສິນ ແມ່ນຈະໄດ້ບັງຄັບເອົາຊັບດັ່ງກ່າວ ມາປະຕິບັດຢ່າງເຂັ້ມງວດ; ໃນກໍລະນີຜູ້ຖືກປະຕິບັດ ມີເງື່ອນໄຂປະຕິບັດ ເປັນແຕ່ລະເດືອນ ຈະໄດ້ຫັກລາຍຮັບ, ລາຍໄດ້ ຕາມມາດຕາ 59, 60 ຂອງກົດໝາຍວ່າດ້ວຍ ການປະຕິບັດຄຳຕັດສິນຂອງສານ ສະບັບປັງປຸງ 2021; ຄຳຕັດສິນ ທີ່ຜ່ານການກວດກາເຫັນວ່າ ບໍ່ມີເງື່ອນໄຂປະຕິບັດ ຈະໄດ້ອອກຄຳສັ່ງໂຈະ ຕາມມາດຕາ 43 ແລະ 71 ຂອງກົດໝາຍວ່າດ້ວຍການປະຕິບັດຄຳຕັດສິນຂອງສານ ສະບັບປັງປຸງ 2021.

    ສຳລັບ ສາເຫດຕົ້ນຕໍ ທີ່ພາໃຫ້ຄະດີຄ້າງປະຕິບັດຫລາຍປີ ຍ້ອນຜູ້ຖືກປະຕິບັດ ບໍ່ເຂົ້າມາຕາມໝາຍຮຽກ, ບໍ່ຮູ້ທີ່ຢູ່, ເປັນຄົນທຸກຈົນ ບໍ່ມີຊັບຫຍັງທີ່ນຳມາປະຕິບັດ; ຜູ້ຖືກປະຕິບັດຊຳລະຄ່າເສຍຫາຍທາງແພ່ງ, ອາກອນລັດ ແລະ ຄ່າປັບໃໝ, ຈ່າຍເປັນເດືອນ, ຍັງປະຕິບັດໂທດຢູ່ຄ້າຍຄຸມ ຂັງເປັນເວລາຫລາຍປີ; ຜູ້ຖືກປະຕິບັດ ບໍ່ພໍໃຈຕໍ່ຄຳຕັດສິນຂອງສານ ຂຽນຄຳຮ້ອງໄປຫາຫລາຍພາກສ່ວນແລ້ວ ເອົາມາເປັນຂໍ້ອ້າງ ບໍ່ຍອມປະຕິບັດ; ມີການສະເໜີໂຈະການປະຕິບັດ ຈາກພາກສ່ວນທີ່ກ່ຽວຂ້ອງ ຫລື ທວງສຳນວນຄະດີ ໄປກວດກາໃຊ້ເວລາຄົ້ນຄວ້າດົນ ບາງຄັ້ງຄະດີດຽວ ທວງຫລາຍເທື່ອ; ພະນັກງານປະຕິບັດ ຈຳນວນໜຶ່ງຍັງຂາດຄວາມຮັບຜິດຊອບ, ບໍ່ມີແບບແຜນວິທີເຮັດວຽກ ນຳເອົາຄະດີອອກມາກວດກາ ສ້າງແຜນການຈັດຕັ້ງປະຕິບັດ ເປັນຕົ້ນ ແມ່ນຄະດີອາຍາ ສ່ວນຫລາຍປະຕິບັດແຕ່ຄະດີແພ່ງ ເຮັດໃຫ້ຄະດີອາຍາຄ້າງ ເປັນຈຳນວນຫລວງຫລາຍ ແລະ ຂາດງົບປະມານໃນການລົງຈັດຕັ້ງປະຕິບັດ ກ່ຽວກັບຄະດີອາຍາ.

ຂ່າວ-ພາບ: ທະນູທອງ

KPL