ຂປລ. ກະຊວງຍຸຕິທຳ ແຫ່ງ ສປປ ລາວ ແລະ ກະຊວງຍຸຕິທຳ ສສ ຫວຽດນາມ ຈັດກອງປະຊຸມ ສະຫລຸບຄີລາຄາຄືນການພົວພັນຮ່ວມມື ໄລຍະຜ່ານມາ ເພື່ອສືບຕໍ່ຮັດແໜ້ນການພົວພັນຮ່ວມມື ໃນວັນທີ 18 ທັນວາ 2024 ຜ່ານມາ ເຊິ່ງນຳໂດຍ ສະຫາຍ ໄພວີ ສີບົວລິພາ ກຳມະການສູນກາງພັກ, ລັດຖະມົນຕີກະຊວງຍຸຕິທຳ ສປປ ລາວ ແລະ ສະຫາຍ ຫງວ້ຽນຫ໋າຍນິງ ກໍາມະການສູນກາງພັກກອມມູນິດຫວຽດນາມ, ລັດຖະມົນຕີກະຊວງຍຸຕິທໍາ ສສ ຫວຽດນາມ, ມີພະນັກງານກ່ຽວຂ້ອງສອງຝ່າຍ ເຂົ້າຮ່ວມ.

ໂອກາດນີ້, ສະຫາຍ ໄພວີ ສີບົວລິພາ ໄດ້ສະແດງຄວາມຍິນດີຕ້ອນຮັບ ສະຫາຍ ຫງວ້ຽນຫ໋າຍນິງ ແລະ ຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ຊຶ່ງເປັນການສືບຕໍ່ເສີມຂະຫຍາຍມູນເຊື້ອສານພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນຂອງສອງຊາດ ລາວ-ຫວຽດນາມ ໂດຍສະເພາະສອງກະຊວງ ທີ່ຈະໄດ້ພ້ອມກັນຈັດຕັ້ງຜັນຂະຫຍາຍເນື້ອໃນ ຂອງບົດບັນທຶກການຮ່ວມມື ລະຫວ່າງກະຊວງຍຸຕິທໍາ ສປປ ລາວ ແລະ ສສ ຫວຽດນາມ ໃນໄລຍະແຕ່ປີ 2021-2025 ໃຫ້ເຂົ້າສູ່ລ່ວງເລິກ ແລະ ປະກົດຜົນເປັນຈິງຢ່າງມີປະສິດທິພາບ.

ໂອກາດນີ້, ສອງຝ່າຍໄດ້ຕີລາຄາຄືນ ການພົວພັນຮ່ວມມືລະຫວ່າງ 2 ກະຊວງຍຸຕິທຳລາວ-ຫວຽດນາມ ໃນໄລຍະປີ 2022-2024 ສາມາດຍາດໄດ້ສໍາເລັດບາງໜ້າວຽກ ເປັນຕົ້ນ ການແລກປ່ຽນຂໍ້ມູນຂ່າວສານ ເຊິ່ງກັນ ແລະ ກັນ; ການສຳມະນາຍົກລະດັບຄວາມຮູ້ ກ່ຽວກັບກໍ່ສ້າງວິຊາຊີບ ປະຕິບັດຄໍາຕັດສິນຂອງສານ, ວິຊາຊີບທະບຽນສານ, ວິຊາຊີບຍຸຕິທໍາ; ສຳເລັດການຝຶກອົບຮົມຫລັກສູດ ທັກສະການສ້າງນິຕິກຳ; ສຳເລັດການຝຶກອົບຮົມ ທົດລອງຫລັກສູດ ທັກສະການໂຄສະນາເຜີຍແຜ່ກົດໝາຍ; ສຳເລັດຝຶກອົບຮົມທົດລອງ ຫລັກສູດທັກສະການແກ້ໄຂຂໍ້ຂັດແຍ່ງທາງ ດ້ານເສດຖະກິດດ້ວຍການໄກ່ເກ່ຍ, ການຕັດສິນໂດຍກຳມະການ; ການແລກປ່ຽນການຢ້ຽມຢາມ ເຊິ່ງກັນ ແລະ ກັນ. ສຳລັບຂະແໜງຍຸຕິທຳຢູ່ຂັ້ນທ້ອງຖິ່ນ ກໍໄດ້ມີການພົວພັນຮ່ວມມື ກັນຢ່າງຕໍ່ເນື່ອງລຽນຕິດ ແລະ ດຳເນີນໄປດ້ວຍບັນຍາກາດດີ.

ສໍາລັບແຜນການຮ່ວມມືປີ 2025 ແລະ ແຜນບົດບັນທຶກການຮ່ວມມື 5 ປີ (2026-2030) ສອງຝ່າຍຈະໄດ້ສຸມໃສ່ ບາງວຽກງານທີ່ຂະແໜງຍຸຕິທໍາ ຂອງສອງປະເທດ ຕ້ອງໄດ້ພັດທະນາ ແລະ ແລກປ່ຽນນຳກັນ ເປັນຕົ້ນຄະນະນໍາກະຊວງຍຸຕິທໍາ ສປປ ລາວ ຈະເດີນທາງໄປພົບປະຢ້ຽມຢາມ ກະຊວງຍຸຕິທໍາ ສສ ຫວຽດນາມ, ສະຫລຸບລາຍງານ ການຈັດຕັ້ງປະຕິບັດວຽກງານ; ສ້າງຂີດຄວາມສາມາດໃຫ້ແກ່ຂະແໜງຍຸຕິທໍາ ໂດຍການສ້າງຫລັກສູດ ປະ ລິນຍາຕີ, ຫລັກສູດປະລິນຍາໂທ, ປັບປຸງຫໍສະໝຸດ; ໂຄງການຫັນເປັນທັນສະໄໝ ຂອງຂະແໜງການຍຸຕິທໍາ ຂອງ ສປປ ລາວ; ໂຄງການສ້າງຂີດຄວາມສາມາດ ແກ່ການສ້າງກົດໝາຍ, ໂຄສະນາເຜີຍແຜ່ກົດໝາຍ ແລະ ປະເມີນນິຕິກໍາ ຊຶ່ງຝ່າຍລາວ ໄດ້ສະເໜີ ໃຫ້ຝ່າຍຫວຽດນາມ ຊຸກຍູ້ ແລະ ສ້າງເງື່ອນໄຂໃຫ້ນັກກົດໝາຍຫວຽດນາມ ມາສ້າງຕັ້ງຫ້ອງການ ທີ່ປຶກສາກົດໝາຍຢູ່ລາວ ແລະ ຝ່າຍ ລາວ ກໍຈະຊຸກຍູ້ໃຫ້ນັກກົດໝາຍລາວ ໄປສ້າງຕັ້ງຫ້ອງການ ທີ່ປຶກສາກົດໝາຍຢູ່ຫວຽດນາມ.

ພາບ: ວັນເພັງ

KPL