ຂປລ
ຂປລ. ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ແຂວງຫລວງພະບາງ ຈະສົ່ງຄະນະນຳ, ຄູຝຶກ ແລະ ນັກກິລາເຂົ້າຮ່ວມທັງໝົດ 207 ຄົນ ໃນນີ້, ນັກກິລາ 152 ຄົນ ໃນ 12 ປະເພດກິລາ ໃນມະຫາກໍາກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ VII
ຂປລ. ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ແຂວງຫລວງພະບາງ ຈະສົ່ງຄະນະນຳ, ຄູຝຶກ ແລະ ນັກກິລາເຂົ້າຮ່ວມທັງໝົດ 207 ຄົນ ໃນນີ້, ນັກກິລາ 152 ຄົນ ໃນ 12 ປະເພດກິລາ ໃນມະຫາກໍາກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ VII ທີ່ແຂວງສາລະວັນ ໃນລະຫວ່າງວັນທີ 13-22 ທັນວາ 2024 ພ້ອມຕັ້ງເປົ້າຈະສູ້ຊົນໃຫ້ໄດ້ຢ່າງໜ້ອຍ 31 ຫລຽນ.
ທ່ານ ສຸລິດອນ ພານິຜິດ ຫົວໜ້າຂະແໜງພະລະ-ສິລະປະ ພະແນກສຶກສາທິການ ແລະ ກິລາແຂວງຫລວງພະບາງ ໄດ້ກ່າວລາຍງານຕໍ່ກອງປະຊຸມຂອງຄະນະນັກກິລາ ໃນວັນທີ 3 ທັນວາ 2024 ຜ່ານມາວ່າ: ຜ່ານການກະກຽມວຽກງານແຕ່ລະດ້ານ ແຂວງຫລວງພະບາງ ໄດ້ມີຄວາມພ້ອມຫລາຍກວ່າ 100% ແລ້ວ ທີ່ຈະເຂົ້າຮ່ວມມະຫາກໍາກິລາ ນັກຮຽນມັດທະຍົມສຶກສາ ທົ່ວປະເທດ ຄັ້ງທີ VII ທີ່ ແຂວງສາລະວັນ ເປັນເຈົ້າພາບ ໃນລະຫວ່າງວັນທີ 13-22 ທັນວາ 2024 ໂດຍໄດ້ແຕ່ງຕັ້ງບັນດາອະນຸກຳມະການຮັບຜິດຊອບ ແລະ ປັບປຸງບັນດາສະຫະພັນກິລາແຕ່ລະປະເພດ ໃຫ້ມີຄວາມເຂັ້ມແຂງ ຮັບປະກັນເຮັດໃຫ້ການເຂົ້າຮ່ວມແຂ່ງຂັນຄັ້ງນີ້ ບັນລຸໄດ້ຕາມຄາດໝາຍທີ່ວາງໄວ້. ພ້ອມນີ້, ຍັງສຳເລັດການຄັດເລືອກນັກກິລາແຕ່ລະປະເພດ ທັງກຳນົດຈຳນວນພົນຕາງໜ້າແຂວງເຂົ້າຮ່ວມ ທັງໝົດ 207 ຄົນ, ໃນນີ້, ແບ່ງເປັນສະເພາະນັກກິລາທັງຍິງ-ຊາຍ 152 ຄົນ ໃນ 12 ປະເພດກິລາ ພ້ອມຕັ້ງເປົ້າສູ້ຊົນຍາດໃຫ້ໄດ້ຢ່າງໜ້ອຍ 31 ຫລຽນ ໃນນີ້, ແບ່ງເປັນ 8 ຫລຽນຄຳ ແລະ 10 ຫລຽນເງິນ ແລະ 13 ຫລຽນທອງ.
ໂອກາດນີ້, ທ່ານ ສຸລິເດດ ແກ້ວບົວລະເພັດ ຫົວໜ້າພະແນກສຶກສາທິການ ແລະ ກິລາແຂວງ ໄດ້ກ່າວສະແດງຄວາມຊົມເຊີຍທີ່ສະຫະພັນກິລາແຕ່ລະປະເພດ ທີ່ໄດ້ເອົາໃຈໃສ່ຄັດເລືອກນັກກິລາ ເຂົ້າສູນຝຶກຊ້ອມຕາມກຳນົດເວລາ ທັງສະແດງຄວາມຂອບໃຈ ຕໍ່ການນໍາຂອງແຂວງ ທີ່ໄດ້ໃຫ້ການຊຸກຍູ້ວັດຖຸ ແລະ ປັດໄຈ ຊ່ວຍນັກກິລາແຕ່ລະປະເພດ ເພື່ອເຂົ້າຮ່ວມແຂ່ງຂັນຕາມກຳນົດເວລາ ພ້ອມທັງເຊີນຊວນມວນຊົນຊາວແຂວງຫລວງພະບາງ ທີ່ຢູ່ພາຍໃນແຂວງຈົ່ງພ້ອມກັນຮ່ວມຊົມຮ່ວມເຊຍ ແລະ ໃຫ້ກຳລັງໃຈແກ່ທັບນັກກິລາ ຂອງແຂວງຫລວງພະບາງ ໃຫ້ສາມາດຍາດໄດ້ໄຊຊະນະ ຕາມຄາດໝາຍທີ່ວາງໄວ້.
ຂ່າວ: ສອນອາຄົມ
KPL
