ຂປລ. ກົມອະນາໄມ ເເລະ ສົ່ງເສີມສຸຂະພາບ ກະຊວງສາທາລະນະສຸກ ອອກແຈ້ງການອະນຸມັດ ຄຳເຕືອນສຸຂະພາບເເບບໃໝ່ (ການປ່ຽນຊອງຢາສູບຮູບເເບບໃໝ່) ​ເຊິ່ງ ສປປ ລາວ ຈະກາຍເປັນປະເທດລໍາດັບ 3 ໃນອາຊຽນ ຮອງຈາກປະເທດໄທ (2019) ແລະ ສິງກະໂປ (2020) ທີ່ຈັດຕັ້ງປະຕິບັດ ຄໍາເຕືອນສຸຂະພາບ ​ເປັນ​ຮູບພາບແບບໃໝ່ ທີ່ບໍ່ມີການໂຄສະນາຜ່ານຊອງຢາສູບ ​ໂດຍ ສປປ ລາວ ຈະຮ່ວມກັບອີກ 26 ປະເທດໃນທົ່ວໂລກ ບັງຄັບໃຊ້ມາດຕະການທີ່ມີ ຫລັກຖານທາງວິທະຍາສາດ ຢືນຢັນແລ້ວວ່າ ສາມາດລົບລ້າງຄວາມດຶງດູດຂອງຊອງ ແລະ ຕຸດຢາສູບ ເປັນຕົ້ນ ສີສັນ, ເຄື່ອງໝາຍການຄ້າ ແລະ ຮູບພາບຕ່າງໆ.

ໃນວັນທີ 3 ທັນວາ 2024 ທີ່ ທ່ານ ດຣ ນາງ ວຽງຂັນ ພິໄຊ ຮອງຫົວໜ້າກົມອະນາໄມ ເເລະ ສົ່ງເສີມສຸຂະພາບ ​ໄດ້​ແນະ​ນໍາ​ກ່ຽວ​ກັບການ​ອອກ​ແຈ້ງ​ການ​ດັ່ງກ່າວ ​ໂດຍ ທ່ານ​ໄດ້​ໃຫ້​ຮູ້​ວ່າ: ສປປ ລາວ ໄດ້ເຂົ້າເປັນພາຄີສົນທິສັນຍາສາກົນ ໃນປີ 2006 ແລະ ມີພັນທະທີ່ຈະຕ້ອງໄດ້ມີຄຳເຕືອນສຸຂະພາບ ເປັນຮູບພາບໃຫຍ່ໃສ່ຊອງ ແລະ ຕຸດຢາສູບ ແລະ ບໍ່ໃຫ້ມີການໂຄສະນາໃດໆ ຜ່ານຊອງຢາສູບ ເຊິ່ງປະໂຫຍດຂອງຊອງຢາສູບ ແບບມາດຕະຖານ ເເມ່ນສາມາດຊ່ວຍຫລຸດຜ່ອນຄວາມດຶງດູດ ແລະ ການໂຄສະນາຜະລິດຕະພັນຢາສູບ; ເປັນສິ່ງທີ່ສື່ສານຜົນຮ້າຍ ຫລື ພະຍາດທີ່ເກີດຈາກຢາສູບ ໃຫ້ຜູ້ສູບ ແລະ ຜູ້ບໍ່ສູບໄດ້ດີກວ່າ ຊອງ ແລະ ຕຸດຢາສູບໃນຮູບແບບອື່ນ; ຊ່ວຍຫລຸດຜ່ອນຄວາມເຂົ້າໃຈຂໍ້ມູນແບບຜິດໆ ໂດຍສະເພາະ ເຕັກນິກໃນການອອກແບບຊອງ ທີ່ເຮັດໃຫ້ເຂົ້າໃຈວ່າ ຢາສູບນີ້ຮ້າຍແຮງໜ້ອຍກວ່າຢາສູບອື່ນ ຫລື ຢາສູບນີ້ ປອດໄພກວ່າ; ຊ່ວຍເພີ່ມປະສິດທິພາບ ແລະ ຄວາມຊັດເຈນ ຂອງຄໍາເຕືອນສຸຂະພາບ ທີ່ເປັນຮູບພາບ. ປັດຈຸບັນ, ກະຊວງສາທາລະນະສຸກ ໄດ້ມີການກຳນົດ 10 ເເບບ ກ່ຽວກັບຮູບພາບ ເເລະ ຂໍ້ ຄວາມຄຳເຕືອນສຸຂະພາບເເລ້ວ ຍັງມີສະຫລາກຄຳເຕືອນ 10 ແບບ ເຊິ່ງເເຕ່ລະເເບບ ເເມ່ນມີ 2 ສອງຂໍ້ຄວາມ ເເຕກຕ່າງກັນ.

ທ່ານ ດຣ ນາງ ວຽງຂັນ ພິໄຊ ຍັງ​ໃຫ້​ຮູ້​ອີກ​ວ່າ: ທ່ານລັດຖະມົນຕີ ກະຊວງສາທາລະນະສຸກ ໃນນາມປະທານ ຄະນະກຳມະການແຫ່ງຊາດ ເພື່ອການຄວບຄຸມຢາສູບ ໄດ້ອະນຸມັດ ຂໍ້ຕົກລົງວ່າດ້ວຍ ຄຳເຕືອນສຸຂະພາບແບບໃໝ່ 13 ພຶດສະພາ 2024 ຜ່ານ​ມາ, ເເລ້ວໄດ້ນໍາໄປລົງຈົດໝາຍເຫດທາງລັດຖະການ ແລະ ເຜີຍແຜ່ໃຫ້ແກ່ ສື່ມວນຊົນ. ຈາກນັ້ນ, ໄດ້ເຜີຍແຜ່ໃຫ້ ບໍລິສັດຢາສູບ ຜູ້ຜະລິດພາຍໃນປະເທດ ແລະ ນໍາເຂົ້າຈາກຕ່າງປະເທດ, ພ້ອມທັງແຈ້ງໃຫ້ຜູ້ປະກອບການກ່ຽວກັບ ລາຍລະອຽດຂອງຂໍ້ຕົກລົງ ແລະ ວັນເວລາໃນການຈັດຕັ້ງປະຕິບັດ ກໍຄື ໄດ້ມີການກຳນົດໃຫ້ເວລາແກ່ບໍລິສັດຢາສູບ 180 ວັນ ເເລະ ຖືວ່າເປັນເວລາທີ່ພຽງພໍ ໃຫ້ ບໍລິສັດຢາສູບ ໃນການກະກຽມການພິມຄຳເຕືອນໃໝ່ ແລະ ສະສາງ ຊອງຢາສູບໃນສະຕອກທັງໝົດ.

​ໂອກາດ​ນີ້, ທ່ານຮອງຫົວໜ້າກົມອະນາໄມ ເເລະ ສົ່ງເສີມສຸຂະພາບ ຂໍຄວາມຮ່ວມມືໄປຍັງ ຜູ້ຂາຍຍ່ອຍຢາສູບ ບໍ່ຮັບຊື້ຢາສູບທີ່ມີຮູບພາບຄໍາເຕືອນແບບເກົ່າເຂົ້າມາເພີ່ມອີກ ແລະ ຂາຍຢາສູບທີ່ຊອງມີຮູບແບບເກົ່າອອກໃຫ້ໝົດ ເພື່ອໃຫ້ ຊອງຢາສູບທັງໝົດທີ່ຂາຍໃນທ້ອງຕະຫລາດຂອງ ສປປ ລາວ ມີພຽງ ຮູບພາບ ແລະ ສະຫລາກຄຳເຕືອນແບບໃໝ່ ເທົ່ານັ້ນ; ບໍລິສັດຢາສູບ ທັງຜູ້ຜະລິດພາຍໃນ ແລະ ນໍາເຂົ້າຢາສູບ ຕ້ອງປະຕິບັດຕາມກົດໝາຍຂອງ ສປປ ລາວ ຢ່າງເຄັ່ງຄັດ.

ຢາສູບເຮັດໃຫ້ຄົນທົ່ວໂລກ ເສຍຊີວິດເຖິງ 8 ລ້ານຄົນ ຕໍ່ປີ ຫລື ທຸກນາທີ ມີຄົນຕາຍ 15 ຄົນ, ສໍາລັບ ຄົນລາວ​ແມ່ນ​ເສຍ​ຊີວິດ 6.700 ຄົນຕໍ່ປີ ຫລື 18 ຄົນຕໍ່ມື້.

ຂ່າວ: ວຽງ​ສະຫວັນ

ພາບ: ຂັນ​ໄຊ

KPL