ຂປລ. ການດຳເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວັນທີ 3 ທັນວາ  2024 ພາຍໃຕ້ການເປັນປະທານຂອງ ທ່ານ ສົມມາດ ພົນເສນາ ຮອງປະທານສະພາແຫ່ງຊາດ, ບັນດາສະມາຊິກສະພາແຫ່ງຊາດ (ສສຊ) ໄດ້ປະກອບຄຳຄິດຄຳເຫັນ ໃສ່ຮ່າງກົດໝາຍ ວ່າດ້ວຍທະນາຄານແຫ່ງ ສປປ ລາວ ສະບັບປັັບປຸງ ທີ່ສະເໜີໂດຍ ທ່ານ ນາງ ວັດທະນາ ດາລາລອຍ ຮັກສາການຜູ້ວ່າທະນາຄານແຫ່ງ ສປປ ລາວ. ຈາກນັ້ນ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງຕ່າງໆ ໄດ້ສຸມໃສ່ປະກອບຄຳຄິດຄຳເຫັນ ໃສ່ຮ່າງກົດໝາຍດັ່ງກ່າວ ຢ່າງກົງໄປກົງມາ ເຊິ່ງໂດຍລວມແລ້ວ ແມ່ນເຫັນດີເປັນເອກະພາບ ຕໍ່ໂຄງສ້າງ ແລະ ເນື້ອໃນ ຂອງຮ່າງກົດໝາຍສະບັບນີ້, ແຕ່ຍັງມີ ສສຊ ບາງເຂດເລືອກຕັ້ງ ສະເໜີໃຫ້ຕັດອອກ, ຕື່ມໃສ່ ບາງເນື້ອໃນ ຢູ່ບາງໝວດ, ບາງມາດຕາ ເພື່ອເຮັດໃຫ້ກົດໝາຍສະບັບນີ້ ມີເນື້ອໃນຄົບຖ້ວນ, ສົມບູນ, ຮັດກຸມ, ຈະແຈ້ງ ແລະ ສອດຄ່ອງຕາມແນວ ທາງນະໂຍບາຍ ຂອງພັກ, ລັດ ວາງອອກ ເພື່ອສາມາດນຳໄປຈັດຕັ້ງປະຕິບັດ ໄດ້ຢ່າງມີປະສິດທິພາບ ແລະ ປະສິດທິຜົນ ພາຍຫລັງ ໄດ້ຖືກຮັບຮອງ ຢ່າງເປັນທາງການ.

ທ່ານ ພົນຕີ ສາຍໃຈ ກົມມະສິດ ສສຊ ເຂດເລືອກຕັ້ງທີ 5 ແຂວງບໍ່ແກ້ວ ໄດ້ສະແດງຄວາມສະໜັບສະໜູນ ຕໍ່ເຫດຜົນ ແລະ ຄວາມຈຳເປັນ ໃນການສ້າງກົດໝາຍ ວ່າດ້ວຍທະນາຄານແຫ່ງ ສປປ ລາວ ຄະນະດຽວກັນ ກໍໄດ້ສະເໜີໃຫ້ ທຫລ ເພີ່ມເນື້ອໃນໃສ່ມາດຕາ 40 ຫົວໜ່ວຍເງິນຕາຂອງ ສປປ ລາວ ເຊິ່ງເງິນຕາຂອງ ສປປ ລາວ ແມ່ນເງິນກີບ ຂຽນຫຍໍ້ເປັນພາສາລາວ “ກີບ” ແລະ ເປັນພາສາອັງກິດ  LAK, ມີຫົວໜ່ວຍເປັນກີບ, ໜຶ່ງກີບເທົ່າກັບໜຶ່ງຮ້ອຍອັດ ຕໍ່ກັບເນື້ອໃນຂອງມາດຕາດັ່ງກ່າວ, ເຫັນວ່າຍັງມີເນື້ອສັັ້ນ ສະເໜີໃຫ້ກຳນົດຄວາມໝາຍ ຄວາມສຳຄັນຂອງເງິນກີບເຂົ້າຕື່ມ ເພື່ອໃຫ້ສັງຄົມ ກໍຄື ຜູ້ທີ່ຊົມໃຊ້ເງິນກັບເຂົ້າໃຈ ແລະ ເຫັນໄດ້ຄວາມສຳຄັນ ຂອງຄ່າເງິນກີບ. ພ້ອມນີ້, ຍັງສະເໜີໃຫ້ ທຫລ ເພີ່ມອີກມາດຕາໜຶ່ງ ກ່ຽວກັບຮູບແບບ ແລະ ຂະໜາດຂອງເງິນກີບ ເຊິ່ງໃນໄລຍະຜ່ານມາ, ເຫັນວ່າຮູບແບບ ແລະ ຂະໜາດຂອງເງິນກີບເກົ່າ ແລະ ໃໝ່ ແຕກຕ່າງກັນ ເຊັ່ນ: ໃບ 10.000 ກີບ, ໃບ 20.000 ກີບ, 50.000 ກີບ ແລະ 100.000 ກີບ ອັນໄດ້ສ້າງຄວາມສັບສົນໃຫ້ກັບຜູ້ຊົມໃຊ້ເງິນກີບ. ສະນັ້ນ, ທຫລ ຄວນກຳນົດເຂົ້າໃນກົດໝາຍ ໃຫ້ຊັດເຈນ ເພື່ອສ້າງຄວາມຈະຈ່າງແຈ້ງ.

ທ່ານ ນາງ ວາລີ ເວດສະພົງ ສສຊ ປະຈຳເຂດເລືອກຕັ້ງ 1 ນະຄອນຫລວງວຽງຈັນ  ໄດ້ປະກອບຄຳຄິດຄຳເຫັນໃສ່ມາດຕາ 1 ເຊິ່ງຕາມທັດສະນະເຫັນວ່າເນື້ອໃນ ຂອງມາດຕາດດັ່ງກ່າວ, ຍັງມີລັກສະນະລວມລວມ ຄວນກຳນົດຈຸດປະສົງຂອງກົດໝາຍສະບັບດັ່ງກ່າວ ໂດຍສະເພາະ ໃຫ້ຍົກສູງການດຳເນີນງານ, ຄວາມເປັນເອກະລາດ ຂອງ ທຫລ ເພື່ອເຮັດໃຫ້ການຈັດຕັ້ງປະຕິບັດ ວຽກງານມີປະສິດທະພາບ ຕາມພາລະບົດບາດຂອງຕົນ, ຈຳກັດການແຊກແຊງຂອງຝ່າຍບໍລິຫານ ເຖິງແມ່ນວ່າກົງຈັກຂອງ ທຫລ ຈະຢູ່ໃນໂຄງສ້າງຂອງລັດຖະບານກໍຕາມ ແຕ່ໂດຍຫລັກການພື້ນຖານຂອງທົ່ວໂລກແລ້ວ ທະນາການກາງຂອງແຕ່ລະປະເທດຕ້ອງ ມີຄວາມເປັນ ເອກະລາດ ໃນລະດັບໃດໜຶ່ງ. ທັງນີ້, ກໍເພື່ອແນໃສ່ຈັດຕັ້ງປະຕິບັດວຽກງານໃຫ້ມີປະສິດທີຜົນ ເນື່ອງຈາກວ່າ ທຫລ ເປັນສ່ວນໜຶ່ງຂອງເສົາຄໍ້າຂອງເສດຖະກິດມະຫາພາກ ແລະ ເປັນການທວງດຸນລະບົບການເງິນ, ການສ້າງສະພາບຄ່ອງເສດຖະກິດມະຫາພາກ.

ພ້ອມນີ້, ສສຊ ຫລາຍທ່ານ ຍັງໄດ້ສຸມໃສ່ມີຄຳເຫັນ ໃນມາດຕາ 9 ສິດຂອງທະນາຄານແຫ່ງ ສປປ ລາວ, ມາດຕາ 40 ຫົວໜ່ວຍເງິນຕາຂອງ ສປປ ລາວ, ມາດຕາ 41 ການພິມເງິນ, ມາດຕາ 56 ການໃຫ້ກູຢືນແກ່ສະຖາບັນການເງິນ, ມາດຕາ 59 ການຄຸມຄອງຄັງເງິນຕາຕ່າງປະເທດ, ມາດຕາ 63 ການຄຸມຄອງຊັບສິນ ຂອງທະນາຄານແຫ່ງ ສປປ ລາວ ແລະ ອື່ນໆ.

ຂ່າວ: ກິດຕາ

KPL