ຂປລ. ໂຮງຮຽນວັດທະນະທຳ ຊົນເຜົ່າກອງທັບ (ຮວຜທ) ຈັດກອງປະຊຸມເຜີຍແຜ່ແຜນການ ແລະ ແຕ່ງຕັ້ງຄະນະເຄື່ອນໄຫວ ຫັນລົງກໍ່ສ້າງຮາກຖານການເມືອງ ຕາມມູນເຊື້ອກອງທັບ ກັບ 4 ບ້ານອ້ອມຂ້າງ ໃນວັນທີ 26 ພະຈິກ 2024 ໂດຍການເປັນປະທານຂອງ ສະຫາຍ ພັນເອກ ສະແຫວງ ແດນນາມົນ ເລຂາຄະນະພັກ, ຫົວໜ້າການເມືອງ ໂຮງຮຽນວັດທະນະທຳ ຊົນເຜົ່າກອງທັບ, ມີບັນດາຄະນະອະນຸກຳມະການ 4 ຫ້ອງ, 2 ກອງພັນ ແລະ ວິຊາການທີ່ກ່ຽວຂ້ອງ ເຂົ້າຮ່ວມ.

ສະຫາຍ ພັນຕີ ອຸໄລກອນ ກົມມະເມືອງ ກຳມະການຄະນະພັກ, ຮອງຫົວໜ້າຫ້ອງການເມືອງ ໂຮງຮຽນວັດທະນະທຳຊົນເຜົ່າກອງທັບ ໄດ້ຜ່ານແຜນການ ແລະ ຂໍ້ຕົກລົງ ຂອງໂຮງຮຽນ ວັດທະນະທຳຊົນເຜົ່າກອງທັບ ວ່າດ້ວຍການແຕ່ງຕັ້ງຄະນະເຄື່ອນໄຫວ ຫັນລົງກໍ່ສ້າງຮາກຖານ ການເມືອງຕາມມູນເຊື້ອກອງທັບ ກັບ 4 ບ້ານອ້ອມຂ້າງຄື: ບ້ານຈອມສີ, ບ້ານນາໄຫ, ບ້ານໄຮ່ຄຳ ແລະ ບ້ານນາຄວາຍໃຕ້, ອີງຕາມມະຕິຕົກລົງ ຂອງຄະນະພັກ ເມືອງ ໄຊເສດຖາ ສະບັບເລກທີ 256/ຄພ.ມຊຖ, ລົງວັນທີ 28 ພະຈິກ 2023 ວ່າດ້ວຍການອະນຸມັດໃຫ້ ໂຮງຮຽນວັດທະນະທຳຊົນເຜົ່າກອງທັບ ລົງກໍ່ສ້າງຮາກຖານການເມືອງ ຕາມແບບມູນເຊື້ອ ກັບ 4 ບ້ານອ້ອມຂ້າງ ເຂດກຸ່ມ VI ແລະ ກຸ່ມ VII; ອີງຕາມ ແຜນການລົງກໍ່ສ້າງຮາກຖານ ການເມືອງຕາມມູນເຊື້ອກອງທັບ ກັບ 4 ບ້ານ ອ້ອມຂ້າງ ຂອງໂຮງຮຽນວັດທະນະທຳຊົນເຜົ່າກອງທັບ ປະຈຳໄຕມາດ 4 ປີ 2024 ຫົວໜ້າການເມືອງໂຮງຮຽນ ວັດທະນະທຳຊົນເຜົ່າກອງທັບ ຕົກລົງ: ແຕ່ງຕັ້ງຄະນະຊີ້ນຳລວມ 4 ສະຫາຍ ແລະ ແຕ່ງຕັ້ງຄະນະລົງພາກສະໜາມ ປະຕິບັດຕົວຈິງຢູ່ບ້ານຮາກຖານ 10 ສະຫາຍ.

ໂອກາດນີ້, ສະຫາຍ ພັນເອກ ສະແຫວງ ແດນນາມົນ ໄດ້ໃຫ້ທິດຊີ້ນຳ ໂດຍເນັ້ນໜັກໃຫ້ບັນດາອະນຸກຳມະການທີ່ໃດ້ຮັບການແຕ່ງຕັ້ງ ເອົາໃຈໃສ່ສຶກສາອົບຮົມ ການເມືອງ-ນຳພາແນວຄິດ ໃຫ້ພະນັກງານ ແລະ ປະຊາຊົນ ເຊື່ອມຊຶມແນວທາງນະໂຍບາຍຂອງພັກ, ແຜນພັດທະນາ ເສດຖະກິດ-ສັງຄົມຂອງລັດ, ມູນເຊື້ອຂອງຊາດ, ຂອງພັກ ແລະ ຂອງກອງທັບຢ່າງທົ່ວເຖິງ, ສົມທົບກັບອຳນາດ ການປົກຄອງປັບປຸງ ແລະ ຊ່ວຍທ້ອງຖິ່ນ ເຮັດວຽກງານປ້ອງກັນຊາດ ປ້ອງກັນຄວາມສະຫງົບ, ປຸກລະດົມປະຊາຊົນ ພັດທະນາເສດຖະກິດ ແລະ ແກ້ໄຂຊີວິດ ການເປັນຢູ່ໃຫ້ດີຂຶ້ນ ແລະ ຫລຸດພົ້ນຈາກຄວາມທຸກຍາກ, ຊຸກຍູ້ອຳນາດການປົກຄອງທ້ອງຖິ່ນ ປັບປຸງແບບແຜນວິທີເຮັດວຽກຂອງ 5 ໜ່ວຍງານໃຫ້ເຄື່ອນໄຫວ ຕາມພາລະບົດບາດ ຂອງຕົນ ໃນການຄຸ້ມຄອງ, ບໍລິຫານບ້ານ ແລະ ສ້າງພະນັກງານຫລັກແຫລ່ງແກ່ນສານ, ເອົາໃຈໃສ່ປະສານສົມທົບ ຢ່າງແໜ້ນແຟ້ນກັບຮາກຖານບ້ານ ແລະ ກຳໄດ້ເນື້ອໃນດ້ານຕ່າງໆ ຢູ່ບັນດາ ບ້ານຮາກຖານ ເພື່ອສະຫລຸບລາຍງານ ໃຫ້ຂັ້ນເທິງຢ່າງຖືກຕ້ອງ.

ຂ່າວ: ໂອລິນ ມິ່ງມີໄຊ

KPL