ຂປລ
ຂປລ. ໃນຕອນບ່າຍວັນທີ 25 ພະຈິກ 2024 ຜ່ານມາ, ທີ່ຄະນະພົວພັນຕ່າງປະເທດສູນກາງພັກ, ສະຫາຍ ນາງ ຟາງຫົງ ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈຳ ສປປ ລາວ ໄດ້ເຂົ້າຊົມເຊີຍ ສະຫາຍ ບຸນເຫລືອ ພັນດານຸວົງ ໃນໂອກາດທີ່ໄດ້ຮັບການແຕ່ງຕັ້ງເປັນ ຮັກສາການ ຫົວໜ້າຄະນະພົວພັນ ຕ່າງປະເທດສູນກາງພັກ.
ຂປລ. ໃນຕອນບ່າຍວັນທີ 25 ພະຈິກ 2024 ຜ່ານມາ, ທີ່ຄະນະພົວພັນຕ່າງປະເທດສູນກາງພັກ, ສະຫາຍ ນາງ ຟາງຫົງ ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈຳ ສປປ ລາວ ໄດ້ເຂົ້າຊົມເຊີຍ ສະຫາຍ ບຸນເຫລືອ ພັນດານຸວົງ ໃນໂອກາດທີ່ໄດ້ຮັບການແຕ່ງຕັ້ງເປັນ ຮັກສາການ ຫົວໜ້າຄະນະພົວພັນ ຕ່າງປະເທດສູນກາງພັກ.
ໂອກາດນີ້, ສະຫາຍ ນາງ ຟາງຫົງ ໄດ້ນໍາເອົາຄວາມຊົມເຊີຍຈາກ ສະຫາຍ ຫລິວຊຽນຊາວ ກໍາມະການສູນກາງພັກ, ຫົວໜ້າຄະນະພົວພັນ ຕ່າງປະເທດສູນກາງພັກກອມມູນິດຈີນ ມາຍັງ ສະຫາຍ ບຸນເຫລືອ ພັນດານຸວົງ ເຊິ່ງເປັນການສະແດງໃຫ້ເຫັນເຖິງ ຄວາມໄວ້ເນື້ອເຊື່ອໃຈຈາກ ສູນກາງພັກ ປປ ລາວ ຕໍ່ການປະກອບສ່ວນຂອງສະຫາຍ ແລະ ຢືນຢັນວ່າ ສະຖານທູດ ແລະ ຄະນະພົວພັນຕ່າງປະເທດສູນກາງພັກກອມມູນິດຈີນ ຈະສືບຕໍ່ປະສານສົມທົບ ແລະ ຮ່ວມກັບມືກັບ ຄະນະພົວພັນຕ່າງປະເທດສູນກາງພັກ ປປ ລາວ ໃນການຊຸກຍູ້ເສີມຂະຫຍາຍການຮ່ວມມື ລະຫວ່າງ ສອງພັກ, ສອງລັດ ແລະ ປະຊາ ຊົນສອງຊາດ ຈີນ-ລາວ.
ພ້ອມກັນນີ້, ສະຫາຍ ບຸນເຫລືອ ພັນດານຸວົງ ກໍໄດ້ສະແດງຄວາມຂອບໃຈ ຕໍ່ການຊົມເຊີຍຂອງຝ່າຍຈີນ, ໄດ້ຕີລາຄາສູງຕໍ່ການຮ່ວມມືປະສານສົມທົບ ແລະ ຮ່ວມມືກັນ ລະຫວ່າງ ຄະນະພົວພັນຕ່າງປະເທດສູນກາງພັກ ປປ ລາວ ແລະ ຄະນະພົວພັນຕ່າງປະເທດ ສູນກາງພັກກອມມູນິດຈີນ ກໍຄື ສະຖານທູດຈີນ ໃນໄລຍະຜ່ານມາ; ໄດ້ແລກປ່ຽນຄໍາຄິດເຫັນກັບ ສະຫາຍທູດຈີນ ກ່ຽວກັບ ທິດທາງການຮ່ວມມື ສອງພັກ, ສອງຄະນະພົວພັນຕ່າງປະເທດສູນກາງພັກ ລາວ-ຈີນ ໃນຕໍ່ໜ້າ, ພ້ອມທັງຢືນຢັນຈະສືບຕໍ່ຮັກສາມູນເຊື້ອດັ່ງກ່າວ ເພື່ອຮ່ວມກັນປະກອບສ່ວນ ແລະ ຊຸກຍູ້ການຈັດຕັ້ງປະຕິບັດ ຄໍາເຫັນສໍາຄັນທີ່ເຫັນດີ ເປັນເອກະພາບກັນ ລະຫວ່າງ ການນໍາສູງສຸດ ສອງພັກ, ສອງລັດ ລາວ-ຈີນ, ຈີນ-ລາວ; ຕິດຕາມຊຸກຍູ້ ຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ມີຄຸນນະພາບສູງ ຂຶ້ນກວ່າເກົ່າ ກໍຄື ປະກອບສ່ວນເຂົ້າໃນການເສີມ ຂະຫຍາຍສາຍພົວພັນມິດຕະ ພາບອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ນັບມື້ນັບແໜ້ນແຟ້ນ ແລະ ມີປະສິດທິຜົນຍິ່ງໆຂຶ້ນ.
ໃນວັນດຽວກັນ, ທ່ານ ນາງ ເມແກັນ ຈອນສ MEGAN JONES ເອກອັກຄະລັດຖະທູດ ອົດສະຕຣາລີ ປະຈໍາ ສປປ ລາວ ກໍໄດ້ເຂົ້າຊົມເຊີຍ ສະຫາຍ ບຸນເຫລືອ ພັນດານຸວົງ ແລະ ຮ່ວມກັນປຶກສາຫາລື ກ່ຽວກັບທິດທາງການພົວພັນຮ່ວມມືສອງຝ່າຍ ໃນຕໍ່ໜ້າ ເພື່ອເສີມຂະຫຍາຍສາຍພົວພັນ ມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ອົດສະຕຣາລີ ໃຫ້ນັບມື້ນັບແໜ້ນແຟ້ນ ແລະ ມີໝາກຜົນຍິ່ງໆຂຶ້ນ.
ພາບ: ອ່າຍຄຳ
KPL
