ຂປລ. ໃນວັນທີ 27 ພະຈິກ 2024, ສະຫາຍ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສົນທະນາທາງໂທລະສັບ ຜ່ານລະບົບທາງໄກກັບ ສະຫາຍ ບຸຍ ແທັງ ເຊີນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ.

ໂອກາດດັ່ງກ່າວ, ສະຫາຍ ບຸຍ ແທັງ ເຊີນ ໄດ້ສະແດງຄວາມຊົມເຊີຍຕໍ່ ສະຫາຍ ທອງສະຫວັນ ພົມວິຫານ ທີ່ໄດ້ຮັບການແຕ່ງຕັ້ງເປັນ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຄົນໃໝ່, ພ້ອມທັງໄດ້ຝາກຄໍາຢື້ຢາມຖາມຂ່າວອັນອົບອຸ່ນ ຈາກບັນດາສະຫາຍການນໍາຂອງ ສສ ຫວຽດນາມ ເຖິງ ບັນດາການນໍາຂອງ ສປປ ລາວ ແລະ ໄດ້ອວຍພອນໄຊອັນປະເສີດ ເນື່ອງໃນໂອກາດວັນຊາດ ສປປ ລາວ ຄົບຮອບ 49 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ທີ່ຈະມາເຖິງນີ້.

ສອງລັດຖະມົນຕີກະຊວງການຕ່າງປະເທດ ລາວ-ຫວຽດນາມ ໄດ້ທົບທວນຄືນການພົວພັນຮ່ວມມື ສອງຝ່າຍ ໃນໄລຍະຜ່ານມາ ແລະ ໄດ້ແລກປ່ຽນຄໍາຄິດເຫັນ ເພື່ອຊຸກຍູ້ການຮ່ວມມືໃນຕໍ່ໜ້າ, ໂດຍໄດ້ສະແດງຄວາມເຫັນດີ ເປັນເອກະພາບຮ່ວມກັນຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງປະເທດ ໃນຕະຫລອດໄລຍະທີ່ຜ່ານມາ, ສະແດງອອກຄືສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດ ນັບມື້ນັບມີການພັດທະນາເຂົ້າສູ່ລວງເລິກ ແລະ ນໍາຜົນປະໂຫຍດຢ່າງແທ້ຈິງ ມາສູ່ປະຊາຊົນສອງຊາດ ​ໂດຍສະເພາະ ການປະສານງານ ແລະ ການຮ່ວມມື ລະຫວ່າງສອງກະຊວງການຕ່າງປະເທດ ກໍນັບມື້ນັບແໜ້ນແຟ້ນ ແລະ ມີປະສິດທິຜົນ ໂດຍສະເພາະ ການເປັນເສນາທິການໃຫ້ແກ່ ການນໍາຂັ້ນສູງຂອງສອງປະເທດ ໃນການຊຸກຍູ້ ແລະ ຕິດຕາມການຈັດຕັ້ງປະຕິບັດ ຜົນການຕົກລົງຂອງການນໍາຂັ້ນສູງ. ໃນຕໍ່ໜ້າ, ສອງຝ່າຍເຫັນດີເປັນເອກະພາບຈະສືບຕໍ່ ກະກຽມກອງປະຊຸມ ຄະນະກໍາມະການຮ່ວມມືສອງຝ່າຍ ລະຫວ່າງສອງລັດຖະບານ ຄັ້ງທີ 47 ທີ່ຈະມີຂຶ້ນໃນຕົ້ນປີ 2025, ການພົບປະລະຫວ່າງ 3 ປະມຸກລັດ 3 ປະເທດ ລາວ-ຫວຽດນາມ-ກໍາປູເຈຍ ແລະ ກອງປະຊຸມປຶກສາຫາລືດ້ານການເມືອງຂັ້ນລັດຖະມົນຕີ ລາວ-ຫວຽດນາມ ຄັ້ງທີ 11, ພ້ອມທັງສືບຕໍ່ຈັດຕັ້ງ ຜັນຂະຫຍາຍບົດບັນທຶກ ການຮ່ວມມື ລະຫວ່າງສອງກະຊວງ ໄລຍະປີ 2021-2025 ໃຫ້ປະກົດຜົນເປັນຈິງ ໂດຍສະເພາະ ວຽກງານຊາຍແດນ, ການຕ້ານການຄ້າມະນຸດ ແລະ ວຽກງານການປົກປ້ອງພົນລະເມືອງ.

ໃນຂະນະດຽວກັນ, ສະຫາຍ ທອງສະຫວັນ ພົມວິຫານ ກໍໄດ້ສະແດງຄວາມຍິນດີ ແລະ ຂອບ ໃຈຕໍ່ຄໍາອວຍພອນອັນປະເສີດ ແລະ ຈົບງາມ, ພ້ອມທັງໄດ້ຕາງໜ້າໃຫ້ ພັກ, ລັດ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈ ແລະ ຮູ້ບຸນຄຸນຕໍ່ການຊ່ວຍເຫລືອອັນລໍ້າຄ່າ, ມີປະສິດທິພາບ ແລະ ທັນການຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ ໃນເມື່ອກ່ອນ ກໍຄື ໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະການຊ່ວຍເຫລືອ ແລະ ສະໜັບສະໜູນດ້ານຕ່າງໆ ໃຫ້ແກ່ການເປັນປະທານອາຊຽນຂອງ ສປປ ລາວ ໃນປີ 2024 ຊຶ່ງມີຜົນສໍາເລັດຢ່າງຈົບ ງາມ. ໃນໂອກາດນີ້, ກໍໄດ້ຖືໂອກາດອວຍພອນໃຫ້ ສະຫາຍ ບຸຍ ແທັງ ເຊີນ ພ້ອມດ້ວຍການນໍາ ແລະ ພະນັກງານກະຊວງການຕ່າງປະເທດ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານອັນສູງສົ່ງ ແລະ ມີກຽດ ແລະ ຫວັງວ່າ ຈະໄດ້ຕ້ອນຮັບ ສະຫາຍ ບຸຍ ແທັງ ເຊີນ ໃນໂອກາດເດີນທາງມາເຂົ້າຮ່ວມ ກອງປະຊຸມປຶກສາຫາລືດ້ານການເມືອງ ລາວ-ຫວຽດນາມ ທີ່ນະຄອນ ຫລວງວຽງຈັນ ໃນອະນາຄົດອັນໃກ້ນີ້.

KPL