ຂປລ
ຂປລ. ວັນທີ 26 ພະຈິກ 2024 ນີ້, ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີ ສູນກາງພັກປະຊາຊົນ ປະຕິວັດລາວ ພ້ອມຄະນະ ໄດ້ພົບປະສອງຝ່າຍ ກັບ ສະຫາຍ ຫງວຽນ ຊວນ ຖັງ ກຳມະການກົມການເມືອງສູນກາງພັກ ກອມມູນິດຫວຽດນາມ, ປະທານສະພາທິດສະດີສູນກາງພັກ, ຫົວໜ້າສະຖາບັນການເມືອງແຫ່ງຊາດ ໂຮ່ຈີ່ມິງ
ຂປລ. ວັນທີ 26 ພະຈິກ 2024 ນີ້, ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີ ສູນກາງພັກປະຊາຊົນ ປະຕິວັດລາວ ພ້ອມຄະນະ ໄດ້ພົບປະສອງຝ່າຍ ກັບ ສະຫາຍ ຫງວຽນ ຊວນ ຖັງ ກຳມະການກົມການເມືອງສູນກາງພັກ ກອມມູນິດຫວຽດນາມ, ປະທານສະພາທິດສະດີສູນກາງພັກ, ຫົວໜ້າສະຖາບັນການເມືອງແຫ່ງຊາດ ໂຮ່ຈີ່ມິງ ພ້ອມດ້ວຍຄະນະ ໃນໂອກາດທີ່ຄະນະຜູ້ແທນຂັ້ນສູງ ພັກກອມມູນິດຫວຽດນາມ ມາຮ່ວມກອງປະຊຸມສໍາມະນາທິດສະດີ ຄັ້ງທີ XI ລະຫວ່າງ ພັກປະຊາຊົນ ປະຕິວັດລາວ ແລະ ພັກກອມມູນິດຫວຽດນາມ ໃນ ລະຫວ່າງ ວັນທີ 26-29 ພະຈິກ 2024.
ໂອກາດນີ້, ສະຫາຍ ຄຳພັນ ເຜີຍຍະວົງ ໄດ້ຕີລາຄາສູງຕໍ່ການພົບປະ ແລະ ຕ້ອນຮັບຄະນະຜູ້ແທນ ການນຳຂັ້ນສູງຈາກຝ່າຍຫວຽດນາມ, ພ້ອມທັງຊົມເຊີຍບັນດາກົນໄກການຮ່ວມມື ທີ່ມີປະສິດທິພາບ ແລະ ປະສິດທິຜົນລະຫວ່າງ ພັກປະຊາຊົນ ປະຕິວັດລາວ ແລະ ພັກກອມມູນິດຫວຽດນາມ ທາງດ້ານທິດສະດີ ແລະ ພຶດຕິກໍາຕົວຈິງ ທີ່ໄດ້ຮ່ວມມືກັນຄົ້ນຄວ້າ ໃນໄລຍະຜ່ານມາ, ເພື່ອເປັນການແລກ ປ່ຽນບົດຮຽນ, ເພີ່ມທະວີຄວາມເຂົ້າອົກເຂົ້າໃຈ, ປະກອບສ່ວນເຂົ້າໃນການຮັດແໜ້ນ ແລະ ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ກ້າວເຂົ້າສູ່ລວງເລິກໃນທຸກຂົງເຂດວຽກງານ.
ການພົບປະຄັ້ງນີ້, ສອງຝ່າຍໄດ້ທົບທວນຄືນການຮ່ວມມື ແລະ ແລກປ່ຽນບົດຮຽນກ່ຽວກັບ ການຮ່ວມມືໃນໄລຍະຜ່ານມາ ກໍຄື ການຈັດຕັ້ງປະຕິບັດບົດບັນທຶກການຮ່ວມມື ລະຫວ່າງ ສອງສະພາທິດສະດີສູນກາງພັກ ຊຶ່ງເຫັນວ່າ ມີຜົນສຳເລັດໃນຫລາຍດ້ານ ໂດຍສະເພາະ ການຜັດປ່ຽນກັນເປັນເຈົ້າພາບ ດຳເນີນກອງປະຊຸມສອງພັກ ລາວ-ຫວຽດນາມ, ການແລກປ່ຽນບົດຮຽນດ້ານທິດສະດີ ແລະ ພຶດຕິກຳກ່ຽວກັບບັນຫາຕ່າງໆ ທີ່ກາຍເປັນການຕອບສະໜອງ ໃຫ້ແກ່ການປັບປຸງ ບູລະນະແນວທາງນະໂຍບາຍ ຂອງສອງພັກ. ນອກຈາກນັ້ນ, ການແລກປ່ຽນດ້ານຂໍ້ມູນ-ຂ່າວສານ ແລະ ການແລກປ່ຽນຄະນະຜູ້ແທນຂັ້ນສູງ ແລະ ຂັ້ນວິຊາການຂອງສອງຝ່າຍ ກໍໄດ້ຮັບການຈັດຕັ້ງປະຕິບັດຕາມແຜນ.
ເພື່ອສືບຕໍ່ຈັດຕັ້ງຜັນຂະຫຍາຍ ບົດບັນທຶກການຮ່ວມມື ລະຫວ່າງ ສອງສະພາທິດສະດີສູນກາງພັກ ໄລຍະແຕ່ນີ້ເຖິງປີ 2026, ສະຫາຍປະທານສະພາທິດສະດີ ສູນກາງພັກປະຊາຊົນ ປະຕິວັດລາວ ໄດ້ເນັ້ນໜັກບາງບັນຫາ ເປັນຕົ້ນ ການສືບຕໍ່ປະຕິບັດ ບົດບັນທຶກການຮ່ວມມື ສອງສະພາທິດສະດີສູນກາງພັກ ທີ່ໄດ້ລົງນາມ ໂດຍສະເພາະ ແຜນການຮ່ວມມື ປີ 2025-2026 ແລະ ເຫັນວ່າ ສອງຝ່າຍຄວນມີແຜນການ ອັນລະອຽດເພີ່ມເຕີມ ໃນແຕ່ລະປີ ເພື່ອເຮັດໃຫ້ການຈັດຕັ້ງປະຕິບັດ ເນື້ອໃນບົດບັນທຶກ ການຮ່ວມມືໃນແຕ່ລະວຽກງານ ສຳເລັດຜົນຕາມລະດັບຄາດໝາຍ; ສືບຕໍ່ການພົວພັນຮ່ວມມື, ການແລກປ່ຽນບົດຮຽນ ແລະ ການປະສານສົມທົບ ໃນການ ຈັດຕັ້ງການຄົ້ນຄວ້າ ທາງດ້ານທິດສະດີ ແລະ ພຶດຕິກຳ ໂດຍຕິດພັນເນື້ອໃນ ກອງປະຊຸມໃຫຍ່ຂອງສອງພັກ ໂດຍສະເພາະ ບັນດາຫົວຂໍ້ລົງເລິກທາງ ດ້ານທິດສະດີ-ພຶດຕິກຳ ແຫ່ງການນຳພາ ຂອງສອງພັກ, ພ້ອມນັ້ນ ກໍສືບຕໍ່ແລກປ່ຽນບົດຮຽນກ່ຽວກັບການສ້າງໂຄງການການເມືອງ, ການສະຫລຸບ 40 ປີ ແຫ່ງການປ່ຽນແປງໃໝ່ ຢູ່ ສປປ ລາວ.
ພ້ອມນີ້, ສະຫາຍ ຄຳພັນ ເຜີຍຍະວົງ ກໍສະເໜີວ່າ ຄວນປັບປຸງກົນໄກການປະສານງານ ລະຫວ່າງ ສອງສະພາທິດສະດີສູນກາງພັກ ເພື່ອສືບຕໍ່ເຮັດໃຫ້ການພົບປະ ແລະ ເຮັດວຽກຮ່ວມກັນໄດ້ເຂົ້າສູ່ລະບົບ, ໃນນັ້ນ ຄວນຄົ້ນຄວ້າດ້ານຄວາມເປັນໄປໄດ້ ໃນການພົວພັນປະສານງານໂດຍກົງ ຂອງສອງສະພາທິດສະດີສູນກາງພັກ ໃຫ້ກາຍເປັນກົນໄກໜຶ່ງ ໃນການເຮັດໃຫ້ການເຮັດວຽກ ຂອງສອງສະພາທິດສະດີ ສູນກາງພັກໄດ້ວ່ອງໄວ ແລະ ທັນສະພາບການ, ສຳລັບບັນຫາທີ່ມີລັກສະນະເປັນຫລັກການ ເປັນບັນຫາໃຫຍ່ ແມ່ນປະສານງານຜ່ານຄະນະ ພົວພັນຕ່າງປະເທດຂອງສອງພັກ; ສືບຕໍ່ເສີມຂະຫຍາຍການພົວພັນແລກປ່ຽນ ແລະ ການຕອບສະໜອງຂໍ້ມູນ-ຂ່າວສານ ທາງດ້ານວິທະຍາສາດ, ທາງດ້ານທິດສະດີ ແລະ ພຶດຕິກຳ ຂອງສອງພັກ, ສອງລັດ ໃຫ້ເປັນປົກກະຕິ ໂດຍສະເພາະ ບັນດາບັນຫາໃໝ່ທີ່ພົ້ນເດັ່ນ ໃນປັດຈຸບັນ ເພື່ອສະໜອງ ຂໍ້ມູນໃຫ້ແກ່ການປັບປຸງບູລະນະແນວທາງ ຂອງສອງພັກ, ສອງລັດຖະບານ ແລະ ສືບຕໍ່ເສີມຂະຫຍາຍການ ຮ່ວມມືດ້ານວຽກງານ ກໍ່ສ້າງພະນັກງານ-ນັກຄົ້ນຄວ້າ ຂອງສອງສະພາທິດສະດີສູນກາງພັກ, ການສ້າງນັກຊ່ຽວຊານ ໂດຍສະເໜີໃຫ້ ສະພາທິດສະດີສູນກາງພັກ ກອມມູນິດຫວຽດນາມ ຊ່ວຍເຫລືອໃນການສ້າງພະນັກງານ, ການຕອບສະໜອງ ນັກຊ່ຽວຊານຂອງຝ່າຍຫວຽດນາມ ເພື່ອມາແລກປ່ຽນ, ຖ່າຍທອດ ບົດຮຽນໃຫ້ແກ່ພະນັກງານຝ່າຍລາວ.
ຂ່າວ-ພາບ: ຂ່າວສານຫວຽດນາມປະຈໍາລາວ
KPL
