ຂປລ. ໃນໄລຍະຜ່ານມາ, ອົງການກວດກາແຫ່ງລັດ ໄດ້ດຳເນີນການກວດກາບັນດາໜ້າວຽກ ຕາມພາລະບົດບາດ ແລະ ສະພາບການແກ້ໄຂຜົນ ຂອງການກວດກາຕົວຈິງ ໃນຫລາຍ ຂົງເຂດ ເປັນຕົ້ນ ໄດ້ ກວດກາການຄຸ້ມຄອງນຳໃຊ້ເງິນກອງທຶນທາງ ເລີ່ມແຕ່ປີ 2020-2023,   ກວດກາການນໍາເຂົ້ານໍ້າມັນຍົກເວັ້ນ ພາສີ-ອາກອນ ຮັບໃຊ້ໂຄງການ, ສະຖານທູດ ແລະ ອົງການຈັດຕັ້ງສາກົນ, ກວດການນໍາເຂົ້າ ແລະ ການເສຍພາສີ ພາຫະນະ ທີ່ບໍ່ຖືກຕ້ອງ ຕາມກົດໝາຍ ແລະ ລະບຽບການ, ສືບຕໍ່ກວດກາ 17 ບໍລິສັດທີ່ ຂຸດຄົ້ນ ແລະ ສົ່ງອອກແຮ່ທາດ (ແບບທົດລອງ), ສືບຕໍ່ກວດກາໂຄງການລົງທຶນຂອງລັດ ຕາມຜົນການກວດສອບ ແລະ ໂຄງການລົງທຶນຂອງລັດ ທີ່ມີມູນຄ່າ 10 ຕື້ກີບຂຶ້ນໄປ ແລະ 10 ຕື້ກີບລົງມາ ທີ່ຍັງຄ້າງ, ກວດກາລັດວິສາຫະກິດ ນໍ້າປະປານະຄອນຫລວງວຽງຈັນ. ຜ່ານການຕິດຕາມກວດ ກາຕົວຈິງ ຍັງມີບາງບັນຫາໃນຫລາຍຂົງເຂດ ທີ່ບໍ່ສອດຄ່ອງ, ບໍ່ຖືກຕ້ອງຕາມລະບຽບຫລັກການ ເທົ່າທີ່ຄວນ ​ເຊິ່ງຈະຕ້ອງໄດ້ສືບຕໍ່ປັບປຸງແກ້ໄຂ ໃນຕໍ່ໜ້າ.

ທ່ານ ຄຳພັນ ພົມມະທັດ ປະທານອົງການກວດກາແຫ່ງລັດ ລາຍງານໃນກອງປະຊຸມສະໄໝສາ ມັນເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 27 ພະຈິກ 2024 ໂດຍທ່ານໄດ້ຍົກໃຫ້ເຫັນ ຜົນການກວດກາຕາມມະຕິສະພາແຫ່ງຊາດ ສະບັບເລກທີ 113/ສພຊ ເປັນຕົ້ນ ໄດ້ການກວດກາການຄຸ້ມຄອງ ນຳໃຊ້ເງິນກອງທຶນທາງ ເລີ່ມແຕ່ປີ 2020-2023, ຜ່ານການກວດກາ ການນຳໃຊ້ເງິນກອງທຶນທາງ ເຫັນວ່າ: ມີຈຳນວນ 16 ໂຄງການ ມູນຄ່າຕາມສັນຍາ 599,89 ຕື້ກີບ (ຕາມການຕົກລົງຂອງລັດຖະ ມົນຕີ) ໄປຊຳລະໂຄງການກໍ່ສ້າງ ແລະ 3 ໂຄງການ ມູນຄ່າຕາມສັນຍາ 215,76 ຕື້ກີບ ໄປສົມທົບວຽກແກ້ໄຂສິ່ງກີດຂວາງ ເຊິ່ງບໍ່ສອດຄ່ອງກັບດໍາລັດ ວ່າດ້ວຍກອງທຶນທາງ. ສ່ວນການນຳໃຊ້ເງິນກອງທຶນທາງ ເຂົ້າໃນການກໍ່ສ້າງ, ສ້ອມແປງທາງຫລວງແຫ່ງຊາດ ໃນໂຄງການຈຳນວນໜຶ່ງ ເຫັນວ່າ ການກໍ່ສ້າງບໍ່ສຳເລັດຕາມສັນຍາ ແຕ່ຄະນະຮັບຜິດຊອບ (ເຈົ້າຂອງໂຄງການ) ໄດ້ສະຫລຸບຢັ້ງຢືນ ກວດວຽກສຳເລັດ 100%. ນອກຈາກນີ້, ຍັງບໍ່ປະຕິບັດຕາມເງື່ອນໄຂ ທີ່ໄດ້ກຳນົດໃນກົດໝາຍ ວ່າດ້ວຍການລົງທຶນ ແລະ ກົດໝາຍວ່າດ້ວຍທະບຽນສານ ເຊັ່ນ: ບໍ່ວາງເງິນຄ້ຳປະກັນ, ບໍ່ຈົດທະບຽນສານ ແລະ ອື່ນໆ. ສຳລັບ ການນໍາເຂົ້ານໍ້າມັນ ຍົກເວັ້ນພາສີ-ອາກອນ ບ້ວງ 700 ລ້ານລິດ ທີ່ລັດຖະບານ ໄດ້ຍົກຂຶ້ນຕໍ່ກອງປະຊຸມສະພາ ແຫ່ງຊາດ ໃນປີ 2022, ຜ່ານການກວດກາຕົວຈິງ ນຳພາກສ່ວນຂະແໜງ ການທີ່ກ່ຽວຂ້ອງ ໂດຍສະເພາະແມ່ນດ່ານພາສີ ແລະ ຜູ້ປະກອບການ ເຫັນວ່າບໍ່ສາມາດ ສະໜອງຂໍ້ມູນເອກສານຢັ້ງຢືນ ໃນການນຳເຂົ້າ ນໍ້າມັນ ຕາມຕົວເລກທີ່ລະບຸໄວ້, ແຕ່ໃນຕົວຈິງ ອາດຈະມີການລັກລອບ ນຳເຂົ້ານ້ຳມັນ ເພື່ອຫລົບຫລີກພາສີ-ອາກອນ, ແຕ່ກໍພົບຄວາມຫຍຸ້ງຍາກ ໃນການກວດກາ ເອົາຂໍ້ມູນຫລັກຖານ ໃນການນຳເຂົ້າກັບເຈົ້າໜ້າທີ່ກ່ຽວຂ້ອງ ກໍຄື ຈາກຜູ້ປະກອບການ ເຊິ່ງເຮັດໃຫ້ບໍ່ສາມາດກວດກາ ແລະ ຢັ້ງຢືນໄດ້.

ພ້ອມນີ້, ອົງການກວດກາແຫ່ງລັດ ຍັງໄດ້ສືບຕໍ່ກວດກາ 17 ບໍລິສັດ ທີ່ໄດ້ຮັບອະນຸຍາດຂຸດຄົ້ນ ແລະ ສົ່ງອອກແຮ່ທາດ(ແບບທົດລອງ), ມີເນື້ອທີ່ທັງໝົດ 15.684 ເຮັກຕາ. ໃນນີ້, ແຮ່ເຫລັກ ມີ 3 ບໍລິສັດ, ແຮ່ຄຳເຄົ້າ 4 ບໍລິສັດ, ຄຳຕົກຂ້ອນ 4 ບໍລິສັດ, ແຮ່ຫາຍາກ 6 ບໍລິສັດ ແລະ ໄດ້ມອບພັນທະໃຫ້ລັດຖະບານ ທັງໝົດ 60,70 ລ້ານໂດລາສະຫະລັດ ແລະ 67,46 ຕື້ກີບ. ໃນຈຳນວນ 17 ບໍລິສັດ ມີ 2 ບໍລິສັດ ທີ່ຫັນເປັນໂຄງການຂຸດຄົ້ນ ແບບປົກກະຕິແລ້ວ (ແຮ່ເຫລັກ 1 ບໍລິສັດ, ແຮ່ຄຳເຄົ້າ 1 ບໍລິສັດ) ແລະ ໄດ້ເປີດບັນຊີສະເພາະ ໂຄງການແລ້ວ 13 ບໍລິສັດ, ຍັງບໍ່ໄດ້ເປີດ 4 ບໍລິສັດ. ສຳລັບ ການຂຸດຄົ້ນ ແລະ ສົ່ງອອກແຮ່ຫາຍາກ ໃນຈຳນວນ 6 ບໍລິສັດ ຍັງບໍ່ມີບໍລິສັດໃດ ປະຕິບັດເງື່ອນໄຂທີ່ໄດ້ກຳ ນົດໄວ້ໃນຂໍ້ຕົກລົງ ກ່ຽວກັບການຊອກແຫລ່ງເງິນກູ້ໄລຍະຍາວ ດ້ວຍດອກເບ້ຍຕ່ຳ ອັດຕາ 2% ຕໍ່ປີ ໃຫ້ລັດຖະບານໄດ້. ພ້ອມນັ້ນ, ຍັງໄດ້ສືບຕໍ່ ກວດກາໂຄງການລົງທຶນຂອງລັດ ທີ່ບໍ່ຜ່ານການປະເມີນ, ບໍ່ໄດ້ຄໍ້າປະກັນມູນຄ່າສັນຍາໂຄງການ ແລະ ປະກອບເອກະສານ ບໍ່ຄົບຖ້ວນຕາມລະບຽບການ ຕາມຜົນການກວດສອບ ທີ່ຍັງຄ້າງກວດກາ 43 ໂຄງການ, ມູນຄ່າ 1.142,06 ຕື້ກີບ; ມາຮອດປັດຈຸບັນ, ກວດ ກາສໍາເລັດແລ້ວ 29 ໂຄງການ ມູນຄ່າສະພາຮັບຮອງ ຈໍານວນ 424,56 ຕື້ກີບ, ຍັງຄ້າງ 14 ໂຄງການ ມູນຄ່າ 697,5 ຕື້ກີບ. ຜ່ານການກວດກາ ໃນ 29 ໂຄງການນີ້ ໄດ້ແນະນຳ ແລະ ສະເໜີ ໃຫ້ເຈົ້າຂອງໂຄງການ ແລະ ບໍລິສັດປະກອບເອກະສານຄືນ ໃຫ້ຄົບຖ້ວນຕາມ ທີ່ໄດ້ກຳນົດໄວ້ໃນກົດໝາຍ ແລະ ເອົາໃຈໃສ່ຕິດຕາມກວດກາ ການກໍ່ສ້າງຕົງຈິງຢູ່ພາກສະໜາມ ໃຫ້ເປັນປົກກະຕິ.

ສ່ວນ ການກວດກາໂຄງການລົງທຶນ ຂອງລັດທີ່ມີມູນຄ່າ 10 ຕື້ຂຶຶ້ນໄປ ທີ່ຍັງຄ້າງ ຈຳນວນ 94 ໂຄງການ ມູນຄ່າ 8.084,86 ຕື້ກີບ, ມາຮອດປັດຈຸບັນ ກວດກາສຳເລັດແລ້ວ 50 ໂຄງການ ມູນຄ່າ 3.604,38 ຕື້ກີບ ແລະ ຍັງຄ້າງກວດກາ 44 ໂຄງການ ມູນຄ່າ 4.480,47 ຕື້ກີບ ແລະ 437,67 ລ້ານໂດລາສະຫະລັດ. ສ່ວນໂຄງການລົງທຶນຂອງລັດທີ່ມີມູນຄ່າ 10 ຕື້ກີບລົງມາ ທີ່ຍັງຄ້າງ ຈຳນວນ 1.702 ໂຄງການ, ມູນຄ່າ 4.462,36 ຕື້ກີບ, ມາຮອດປັດຈຸບັນ ກວດກາສຳເລັດແລ້ວ 401 ໂຄງການ ມູນຄ່າ 1.047,97 ຕື້ກີບ, ຍັງຄ້າງກວດກາ 1.301 ໂຄງການ, ມູນຄ່າ 3.414,39 ຕື້ກີບ. ລວມໂຄງ ການລົງທຶນຂອງລັດ ທີ່ມີມູນຄ່າ 10 ຕື້ກີບຂຶ້ນໄປ ແລະ 10 ຕື້ກີບລົງມາ ທີ່ຍັງຄ້າງ ທັງໝົດ 336 ໂຄງການ, ມູນຄ່າ 5.846,28 ຕື້ກີບ ແລະ 437,67 ລ້ານໂດລາສະຫະລັດ. ຜ່ານການກວດກາໂຄງການມີມູນຄ່າ 10 ຕື້ກີບຂຶ້ນໄປ ແລະ 10 ຕື້ກີບລົງມາ ສໍາເລັດ 401 ໂຄງການ, ເຫັນມູນຄ່າທີ່ຈະຕ້ອງ ຫັກລົບອອກ ຈາກມູນຄ່າລວມຂອງໂຄງການ ແລະ ມູນຄ່າທີ່ຍັງຄ້າງມອບພັນທະອາກອນ ໃຫ້ລັດ 98,71 ຕື້ກີບ ແລະ 562.316,61 ໂດລາສະຫະລັດ.

ຢ່າງໃດກໍຕາມ, ອົງການກວດກາແຫ່ງລັດ ຍັງໄດ້ສະເໜີໃຫ້ຂະແໜງການ ແລະ ພາກສ່ວນກ່ຽວ ຂ້ອງ ສືບຕໍ່ປັບປຸງແກ້ໄຂ, ກວດກາຄືນ ບັນຫາທີ່ຍັງເປັນຂໍ້ຄົງຄ້າງ, ແກ້ໄຂບໍ່ທັນໄດ້ ໃຫ້ສຳເລັດຕາມເປົ້າໝາຍ ແລະ ສອດຄ່ອງກັບສະພາບການ ຂະຫຍາຍຕົວຂອງເສດຖະກິດໃນປັດຈຸບັນ.

ຂ່າວ: ທະນູທອງ

ພາບ: ຂັນ​ໄຊ

KPL