ຂປລ
ປະຫວັດສາດຈາລຶກ “ວັນຄົບຮອບ 56 ປີ ແຫ່ງໂສກຄະນາຕະກຳຖ້ຳປິວ” (24 ພະຈິກ 1968- 2024).
*ປະຫວັດສາດຈາລຶກ “ວັນຄົບຮອບ 56 ປີ ແຫ່ງໂສກຄະນາຕະກຳຖ້ຳປິວ” (24 ພະຈິກ 1968- 2024) ໄວ້ອາໄລເຖິງດວງວິນຍານຂອງພໍ່ແມ່ປະຊາຊົນຜູ້ບໍລິສຸດ ທີ່ໄດ້ເສຍຊີວິດໃນເຫດການຂອງເຄື່ອງບິນອາເມລິກາ ໄດ້ຍິງລູກສອນໄຟເຂົ້າໃນຖ້ຳປິວ ອັນເຮັດໃຫ້ປະຊາຊົນທີ່ລີ້ໄພໃນຖ້ຳເສຍຊີວິດທັງໝົດ 374 ຄົນ”.ຖ້ຳປິວເປັນອະນຸສອນສະຖານ ແລະ ແຫລ່ງທ່ອງທ່ຽວປະຫວັດສາດ, ອັນເປັນສັນຍະລັກແຫ່ງຄວາມໂຫດຮ້າຍຂອງສົງຄາມໃນອະດີດ ໂດຍຕັ້ງຢູ່ເທິງຜາຫີນສູງຊັນ ໃນເຂດບ້ານບວມລອງ ເມືອງຄຳ ແຂວງຊຽງຂວາງ. ປະເທດລາວຂອງພວກເຮົາເປັນປະເທດໜຶ່ງທີ່ຖືກພວກສັກດີນາຕ່າງດ້າວ ພວກຈັກກະພັດລ່າເມືອງຂຶ້ນທັງເກົ່າ ແລະ ໃໝ່ ເຂົ້າມາຮຸກຮານເປັນເວລາຫລາຍສິບປີແຕ່ປະຊາຊົນລາວ ບັນດາເຜົ່າກໍ່ໄດ້ຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນ.
ການຕໍ່ສູ້ຕ້ານການຮຸກຮານ ຂອງຈັກກະພັດລ່າເມືອງຂຶ້ນແບບໃໝ່ ເຊິ່ງເປັນຈັກກະພັດໂຕຮ້າຍກາດທີ່ພວກມັນມີອາວຸດຍຸດໂທປະກອນທີ່ທັນສະໄໝ ຕະຫລອດໄລຍະດັ່ງກ່າວປະເທດລາວໄດ້ລຸກ ເປັນໄຟໄປທຸກຫຍອມຫຍ້າໂດຍສະເພາະແມ່ນພູພຽງຊຽງຂວາງ ກໍຄືທ່ົງໄຫຫີນໄດ້ກາຍເປັນສະໜາມຮົບທີ່ດຸເດືອດ ແລະ ຂ້ຽວຂາດລະຫວ່າງຈັກກະພັດຜູ້ຮຸກຮານພ້ອມລູກແຫລ່ງຕີນມື ແລະ ກຳລັງປະຕິວັດຮັກຊາດຂອງພວກເຮົາ. ທົ່ງໄຫຫີນ ແຂວງຊຽງຂວາງ ແຫ່ງນີ້ເປັນຈຸດຍຸດ ທະສາດທີ່ສຳຄັນໂດຍສະເພາະທາງດ້ານການທະຫານຈິ່ງເຮັດໃຫ້ທົ່ງໄຫຫີນ ແຂວງຊຽງຂວາງ ເປັນສະໜາມຮົບສູ້ຢັ້ນຢ່າງແຂງແຮງລະຫວ່າງສອງຝາຍ ແລະ ໂດຍນໍ້າໃຈຮັກຊາດອັນສູງສົ່ງຂອງກຳລັງປະຕິວັດ ແລະ ປະຊາຊົນບັນດາເຜົ່າ ພາຍໃນແຂວງຊຽງຂວາງ ແລະ ພາຍໃຕ້ການນຳພາຂອງພັກໄດ້ຕໍ່ສູ້ຢ່າງພິລະອາດຫານໃນທີ່ສຸດກໍ່ສາມາດຂັບໄລ່ພວກຈັກກະພັດ ແລະ ລູກແຫລ່ງຕີນມືຂອງພວກເຂົາອອກຈາກບັນດາເມືອງ ແຂວງຊຽງຂວາງ ສາມາດປົດປ່ອຍບັນດາເມືອງພາຍໃນແຂວງ ແລະ ທົ່ງໄຫ ຫີນໄດ້ໃນວັນທີ 1 ມັງກອນ 1961.
KPL
