ຂປລ. ວັນທີ 14 ພະຈິກ 2024 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ, ພ້ອມດ້ວຍທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ແລະ ຄະນະ ເຄື່ອນໄຫວຢ້ຽມຢາມ ແລະ ພົບປະໂອ້ລົມປະຊາຊົນຈຸດ ສຸມກຸ່ມບ້ານໜອງມ້າ ເມືອງບົວລະພາ ແຂວງຄຳມ່ວນ ໂດຍມີ ທ່ານ ບຸນກວ້າງ ແກ້ວບຸນຍົງ ເຈົ້າເມືອງບົວລະພາ ໃຫ້ການຕ້ອນຮັບ ແລະ ນຳພາປະຊາຊົນ ຈຸດສຸມກຸ່ມບ້ານໜອງມ້າ ເຂົ້າຮ່ວມຮັບຟັງການພົບປະໂອ້ລົມ ຂອງທ່ານ ນາຍົກລັດຖະມົນຕີ.

ໃນໂອກາດນີ້, ທ່ານນາຍົກລັດຖະມົນຕີ ພ້ອມຄະນະ ໄດ້ໄປຢ້ຽມຢາມ ສຸກສາລາ ແລະ ໂຮງຮຽນປະຖົມ-ມັດທະຍົມຕົ້ນ ບ້ານໜອງມ້າ ແລະ ໄດ້ຮັບຟັງການລາຍງານ ກ່ຽວກັບສະພາບການພັດທະນາຈຸດສຸມກຸ່ມບ້ານໜອງ ມ້າ ເຊິ່ງຈຸດສຸມກຸ່ມບ້ານດັ່ງກ່າວ ຕັ້ງຢູ່ລຽບຕາມເສັ້ນທາງໂຮ່ຈີ່ມິງ, ເປັນເຂດພື້ນຖານການປະຕິວັດ, ມີ 5 ບ້ານ,  237 ຄອບຄົວ, ພົນລະເມືອງ 1.215 ຄົນ, ຍັງມີຄອບຄົວທຸກຍາກ 200 ຄອບຄົວ, ປະຊາຊົນ ມີມູນເຊື້ອຕໍ່ສູ້ກູ້ຊາດ ແລະ ມູນເຊື້ອສາມັກຄີຊ່ວຍເຫລືອເຊິ່ງກັນ ແລະ ກັນ; ເປັນກຸ່ມບ້ານທີ່ຍັງທຸກຍາກ, ເສັ້ນທາງໄປມາ ຍັງບໍ່ທັນສະ ດວກ ທຽວໄດ້ລະດູດຽວ, ເຄືອຂ່າຍດ້ານໂທລະຄົມມະນາຄົມ ຍັງບໍ່ທັນເຂົ້າເຖິງ; ອາຊີບຕົ້ນຕໍ ຂອງປະຊາຊົນ ແມ່ນປູກເຂົ້າເນີນສູງ ແລະ ມັນຕົ້ນ, ສະເລ່ຍຜົນຜະລິດເຂົ້າ ໄດ້ 2,8 ໂຕນ/ເຮັກຕາ; ທົ່ວກຸ່ມບ້ານ ມີຄວາຍ 41 ໂຕ, ງົວ 305 ໂຕ, ໝູ 167 ໂຕ, ແບ້ 512 ໂຕ, ສັດປີກ 1.400 ກວ່າໂຕ; ມີໂຮງຮຽນປະຖົມ 5 ແຫ່ງ, ມີນັກຮຽນທັງ ໝົດ 217 ຄົນ; ມີໂຮງຮຽນມັດທະຍົມຕົ້ນ 1 ແຫ່ງ, ມີນັກຮຽນ 46 ຄົນ; ມີສຸກສາລາ 1 ແຫ່ງ, ມີແພດປະຈໍາ 4 ທ່ານ; ເນື້ອທີ່ການຜະລິດ ມີຈໍານວນຈຳກັດ ເນື່ອງຈາກພື້ນທີ່ສ່ວນໃຫຍ່ ແມ່ນມີຄວາມສ່ຽງຈາກລະເບີດບໍ່ທັນແຕກ. ນອກນັ້ນ, ຍັງມີຄວາມຫຍຸ້ງຍາກ ດ້ານນໍ້າໃຊ້ ໂດຍສະເພາະໃນລະດູແລ້ງ, ເນື່ອງຈາກທີ່ຕັ້ງຂອງບ້ານ ເປັນເຂດພູດອຍ ແລະ ມີຄວາມຄ້ອຍຊັນ ເປັນສ່ວນໃຫຍ່, ທັງຫ່າງໄກຈາກນໍ້າສາຍໃຫຍ່.

ໃນໂອກາດດຽວກັນ, ທ່ານນາຍົກລັດຖະມົນຕີ ກໍໄດ້ສະແດງຄວາມຊົມເຊີຍ ຕໍ່ອົງການປົກຄອງທ້ອງຖິ່ນ ແລະ ປະຊາຊົນ ທີ່ໄດ້ມີຄວາມພະຍາຍາມ ໃນການພັດທະນາກຸ່ມບ້ານ ກໍຄື ບ້ານຊ່ອງຂອງຕົນ ເຮັດໃຫ້ຊີວິດການເປັນ ຢູ່ນັບມື້ດີຂຶ້ນຫລາຍກວ່າເມື່ອກ່ອນ, ພ້ອມທັງແຈ້ງໃຫ້ຊາບ ກ່ຽວກັບສະພາບການພັດທະນາ ເສດຖະກິດ-ສັງຄົມແຫ່ງ ຊາດທີ່ພົ້ນເດັ່ນ ໂດຍສະເພາະ ຜົນສຳເລັດ, ຂໍ້ຄົງຄ້າງ ແລະ ສິ່ງທ້າທາຍຕ່າງໆ ຕໍ່ການພັດທະນາ, ລວມທັງ ຜົນສຳ ເລັດໃນການເປັນເຈົ້າພາບ ຈັດກອງປະຊຸມສຸດຍອດອາຊຽນ ຄັ້ງທີ 44, 45 ແລະ ກອງປະຊຸມສຸດຍອດທີ່ກ່ຽວຂ້ອງ. ອັນສຳຄັນ, ທ່ານ ນາຍົກລັດຖະມົນຕີ ໄດ້ມີຄຳເຫັນເນັ້ນໃຫ້ ພາກສ່ວນກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນ ສືບຕໍ່ປຸກລະດົມປະຊາຊົນ ສົ່ງເສີມລູກຫລານຂອງຕົນ ໃຫ້ໄດ້ເຂົ້າຮຽນຕາມເກນອາຍຸ; ສືບຕໍ່ປັບປຸງອົງການປົກຄອງ ກຸ່ມບ້ານ ແລະ ບ້ານ ໃຫ້ມີຄວາມໜັກແໜ້ນເຂັ້ມແຂງ; ສືບຕໍ່ຄົ້ນຄວ້າສ້າງແຜນການ ພັດທະນາກຸ່ມບ້ານ ໃຫ້ສອດ ຄ່ອງກັບທ່າແຮງ ແລະ ຄວາມສາມາດຕົວຈິງ ຂອງທ້ອງຖິ່ນ; ບັນດາຂະແໜງການຂອງເມືອງ ປະສານສົມທົບກັບ ພາກສ່ວນກ່ຽວຂ້ອງ ຈັດສັນການນຳໃຊ້ທີ່ດິນຂອງກຸ່ມບ້ານ, ລວມທັງ ການຈັດສັນໂຄງລ່າງພື້ນຖານ ໃຫ້ເປັນລະບົບ, ມີຄວາມເປັນລະບຽບຮຽບຮ້ອຍ ແລະ ສອດຄ່ອງກັບທິດທາງ ການພັດທະນາແບບຍືນຍົງ; ໃຫ້ແຂວງຄຳມ່ວນ ສະເໜີຫາກະຊວງເຕັກໂນໂລຊີ ແລະ ການສື່ສານ ເພື່ອພິຈາລະນາ ຕິດຕັ້ງເຄືອຂ່າຍໂທລະຄົມມະນາຄົມ ຢູ່ເຂດກຸ່ມ ບ້ານ ໃຫ້ປະຊາຊົນສາມາດຕິດຕໍ່ສື່ສານ ໄດ້ຢ່າງສະດວກສະບາຍ; ສືບຕໍ່ແກ້ໄຂບັນດາຂໍ້ຄົງຄ້າງຕ່າງໆ ໂດຍສະເພາະ ບັນດາປັດໄຈ ທີ່ຍັງກົດໜ່ວງຖ່ວງດຶງ ການພັດທະນາຊີວິດການເປັນຢູ່, ພ້ອມທັງຊຸກຍູ້ສົ່ງເສີມການຜະລິດ ທີ່ປະຊາ ຊົນ ແລະ ທ້ອງຖິ່ນມີທ່າແຮງ ເພື່ອຮັບໃຊ້ພາຍໃນ ແລະ ເປັນສິນຄ້າ ໃຫ້ຫລາຍຂຶ້ນ ເປັນກ້າວໆ.

ໃນຕອນທ້າຍ, ທ່ານ ນາຍົກລັດຖະມົນຕີ ຍັງໄດ້ມອບອຸປະກອນການຮຽນ ແລະ ອຸປະກອນກິລາ ໃຫ້ບັນ ດາໂຮງຮຽນ ແລະ ນັກຮຽນ ຢູ່ເຂດຈຸດສຸມດັ່ງກ່າວ, ພ້ອມທັງມອບເຄື່ອງນຸ່ງຫົ່ມໃຫ້ປະຊາຊົນ ແລະ ເງິນຈຳນວນໜຶ່ງ ເພື່ອເປັນທຶນພັດທະນາເຂດຈຸດສຸມ ຕື່ມອີກ.

ຂ່າວ-ພາບ: ກົມປະຊາສຳພັນ ຫສນຍ.

KPL