ຂປລ
ຂປລ. ຕອນເຊົ້າຂອງວັນທີ 15 ພະຈິກ 2024 ກົງກັບມື້ຂຶ້ນ 15 ຄ່ຳເດືອນ 12 ລາວ, ທ່ານ ທອງລຸນ ສີສຸລິດ ປະທານປະເທດ, ພ້ອມດ້ວຍຮອງປະທານປະເທດ, ການນຳພັກ-ລັດ, ຄະນະຜູ້ແທນ ພີ່ນ້ອງເຊື້ອຊາດລາວທີ່ດຳລົງຊີວິດຢູ່ຕ່າງປະເທດ ພຸດທະສາສະນິກະຊົນລາວ ໃນນະຄອນຫລວງວຽງຈັນ ແລະ ແຂວງຕ່າງໆ ໄດ້ຮ່ວມພິທີທໍາບຸນໃສ່ບາດ ໃນມື້ສຸດທ້າຍຂອງບຸນນະມັດສະການ ພະທາດຫລວງວຽງຈັນ ດ້ວຍບັນຍາກາດຟົດຟື້ນ ຕາມຮີດຄອງປະເພນີ ແລະ ວັດທະນາທໍາອັນດີງາມຂອງຊາດ.
ຂປລ. ຕອນເຊົ້າຂອງວັນທີ 15 ພະຈິກ 2024 ກົງກັບມື້ຂຶ້ນ 15 ຄ່ຳເດືອນ 12 ລາວ, ທ່ານ ທອງລຸນ ສີສຸລິດ ປະທານປະເທດ, ພ້ອມດ້ວຍຮອງປະທານປະເທດ, ການນຳພັກ-ລັດ, ຄະນະຜູ້ແທນ ພີ່ນ້ອງເຊື້ອຊາດລາວທີ່ດຳລົງຊີວິດຢູ່ຕ່າງປະເທດ ພຸດທະສາສະນິກະຊົນລາວ ໃນນະຄອນຫລວງວຽງຈັນ ແລະ ແຂວງຕ່າງໆ ໄດ້ຮ່ວມພິທີທໍາບຸນໃສ່ບາດ ໃນມື້ສຸດທ້າຍຂອງບຸນນະມັດສະການ ພະທາດຫລວງວຽງຈັນ ດ້ວຍບັນຍາກາດຟົດຟື້ນ ຕາມຮີດຄອງປະເພນີ ແລະ ວັດທະນາທໍາອັນດີງາມຂອງຊາດ.
ພິທີດັ່ງກ່າວ, ຈັດຂຶ້ນຢູ່ໃນກົມມະລຽນອ້ອມຮອບ ພະທາດຫລວງວຽງຈັນ ລວມເຖິງບໍລິເວນເດີ່ນ ດ້ານນອກຂອງພະທາດ ມວນຊົນຫລາຍໝື່ນຄົນໄດ້ມາໃສ່ບາດ ຖວາຍສັງຄະທານແດ່ພະສົງ ທີ່ມາຈາກເຂດແຂວງຕ່າງໆ ໃນທົ່ວປະເທດຫລາຍພັນອົງ ທີ່ມາຮ່ວມນະມັດສະການ ແລະ ກາບໄຫວ້ພະທາດຫລວງ ທີ່ສັກສິດເປັນ ມິ່ງຂວັນຂອງຊາດລາວ ເຊິ່ງໜຶ່ງປີມີໜຶ່ງຄັ້ງ ເພື່ອອຸທິດເຖິງດວງວິນຍານເຖິງບັນພະບູລຸດ, ອຸທິດສ່ວນບຸນສ່ວນກຸສົນ ໃຫ້ສຳພະເວສີ(ຜີເຜດ) ຫລື ໃຫ້ຍາດຕິພີ່ນ້ອງ, ເຈົ້າກຳນາຍເວນ, ຜີບໍ່ມີຍາດ, ເພື່ອນມິດສະຫາຍ ທີ່ໄດ້ລ່ວງລັບໄປແລ້ວ ເພື່ອເປັນບຸນ, ເປັນກຸສົນ ແລະ ອື່ນໆ.
ໃນຕອນບ່າຍຂອງວັນດຽວກັນ, ຍັງໄດ້ຈັດຕັ້ງການແຂ່ງຂັນຕີຄີ ອັນເປັນປະເພນີທີ່ເຄີຍເຮັດມາ ພາຍຫລັງມື້ສຸດທ້າຍຂອງງານດັ່ງກ່າວ ລະຫວ່າງຝ່າຍປະຊາຊົນ ແລະ ຝ່າຍລັດຖະບານ ຢູ່ທີ່ເດີ່ນດ້ານໜ້າພະທາດຫລວງ ເພື່ອຮັດແໜ້ນຄວາມສາມັກຄີ ແລະ ທັງເປັນການປະຕິບັດຕາມຮີດ 12 ຄອງ 14 ທີ່ບັນພະບູລຸດລາວ ໄດ້ກໍານົດໄວ້ໃຫ້ຕິດພັນ ກັບບຸນນະມັດສະການ ພະທາດຫລວງວຽງຈັນ ແລະ ໃນຕອນຄໍ່າຂອງມື້ດຽວກັນ, ກໍມີພິທີສູດປະລິຕະມຸງ ຄຸນ, ວຽນທຽນ ແລະ ຈູດບັ້ງໄຟດອກ ເພື່ອສັກກາລະບູຊາພະທາດຫລວງ ໃຫ້ມີຄວາມຮຸ່ງເຮືອງສວຍງາມ ຢູ່ຄູ່ປະຊາຊົນ ແລະ ຊາດລາວຕະຫລອດຊົ່ວກາລະນານ.
ຂ່າວ: ກິດຕາ
KPL
