ຂປລ
ຂປລ. ໃນວາລະດຳເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 20 ພະຈິກ 2024 ພາຍໃຕ້ການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ບັນດາສະມາຊິກສະພາແຫ່ງຊາດ (ສສຊ) ແຕ່ລະເຂດເລືອກຕັ້ງ ໄດ້ສືບຕໍ່ປະກອບຄໍາເຫັນໃສ່ບົດລາຍງານ ຂອງລັດຖະບານ ເຊິ່ງມີຫລາຍທ່ານ ໄດ້ຜັດປ່ຽນກັນປະກອບຄໍາເຫັນ ໃນຫລາຍບັນຫາທີ່ສໍາຄັນ ໂດຍສະເພາະ ບັນຫາ ນັກຮຽນ-ນັກສຶກສາ ທີ່ໄດ້ໃບປະກາສະນີຍະບັດແດງ.
ຂປລ. ໃນວາລະດຳເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 20 ພະຈິກ 2024 ພາຍໃຕ້ການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ບັນດາສະມາຊິກສະພາແຫ່ງຊາດ (ສສຊ) ແຕ່ລະເຂດເລືອກຕັ້ງ ໄດ້ສືບຕໍ່ປະກອບຄໍາເຫັນໃສ່ບົດລາຍງານ ຂອງລັດຖະບານ ເຊິ່ງມີຫລາຍທ່ານ ໄດ້ຜັດປ່ຽນກັນປະກອບຄໍາເຫັນ ໃນຫລາຍບັນຫາທີ່ສໍາຄັນ ໂດຍສະເພາະ ບັນຫາ ນັກຮຽນ-ນັກສຶກສາ ທີ່ໄດ້ໃບປະກາສະນີຍະບັດແດງ.
ທ່ານ ນາງ ເກດມະນີ ບັນດາສັກ ສະມາຊິກສະພາແຫ່ງຊາດ ເຂດເລືອກຕັ້ງທີ 1 ນະຄອນຫລວງວຽງຈັນ ໄດ້ປະກອບຄໍາເຫັນ ແລະ ໄດ້ສະເໜີໃຫ້ລັດຖະບານຄົ້ນຄວ້າ ກ່ຽວກັບນັກຮຽນ-ນັກສຶກສາ ທີ່ໄດ້ໃບປະກາສະນີຍະບັດແດງ ຄວນໃຫ້ບຸລິມະສິດ ໃນການເຂົ້າເຮັດວຽກຕາມຂະແໜງທີ່ໄດ້ຮຽນມາ, ຊຶ່ງຜ່ານມາສາຍສາມັນ ເຮັດໄດ້ແລ້ວ ໂດຍການໃຫ້ທຶນຮຽນຕໍ່ວິຊາຊີບ ເມື່ອຮຽນຈົບສາຍສາມັນ, ແຕ່ເມື່ອຮຽນຈົບໃນລະດັບວິທະຍາໄລ ແລະ ມະຫາວິທະຍາໄລ ຍັງບໍ່ມີບຸລິມະສິດໃຫ້ ໃນການເຂົ້າເຮັດວຽກ. ຕໍ່ບັນຫານີ້, ຖ້າເຮັດໄດ້ ຈະເຮັດໃຫ້ລູກຫລານ, ນັກຮຽນ-ນັກສຶກສາ ສົນໃຈການຮຽນຫລາຍຂຶ້ນ.
ທ່ານ ນາງ ເກດມະນີ ບັນດາສັກ ກ່າວຕື່ມວ່າ: ຄຸນນະພາບການສຶກສາຈະດີ ແມ່ນຂຶ້ນກັບຫລາຍປັດໄຈ ເປັນຕົ້ນ ຄູບໍ່ມີຄຸນນະພາບໃນການສິດສອນທີ່ດີ, ນັກຮຽນ ບໍ່ມີຄວາມກະຕືລືລົ້ນໃນການສຶກສາຮໍ່າຮຽນ, ພໍ່ແມ່ຜູ້ປົກຄອງ ແລະ ສິ່ງແວດລ້ອມສັງຄົມ ກໍເປັນສ່ວນສໍາຄັນ ທີ່ຍັງບໍ່ສົ່ງເສີມໃຫ້ລູກຫລານໄດ້ສຶກສາຮໍ່າຮຽນ, ຊຶ່ງມັນເຮັດໃຫ້ວຽກງານ ການສຶກສາຫລຸດລົງຫລາຍ ເວົ້າສະເພາະ ໃນນະຄອນຫລວງວຽງຈັນ, ການສຶກສາໃນເຂດຕົວເມືອງ ແລະ ຊົນນະບົດ ແມ່ນແຕກຕ່າງກັນຫລາຍ ເນື່ອງຈາກວ່າ ເຂດຊົນນະບົດ ແມ່ນຂາດຄູ, ຄູຄົນດຽວ ສອນຫລາຍວິຊາຈຶ່ງເຮັດໃຫ້ການສຶກສາ ບໍ່ມີຄຸນພາບຂະນະດຽວກັນ, ຈໍານວນນັກຮຽນ ທີ່ເຂົ້າຮຽນກໍຫລຸດລົງຫລາຍ ຕໍ່ກັບບັນຫານີ້ ຮຽກຮ້ອງໃຫ້ກະຊວງສຶກສາທິການ ແລະ ກິລາ ແລະ ພາກສ່ວນກ່ຽວຂ້ອງຕ່າງໆເອົາໃຈໃສ່ຕື່ມ ແລະ ຄວນມີຈຸດສຸມໃສ່ການສຶກສາ ໃນເຂດຫ່າງໄກສອກຫລີກ ເພື່ອເຮັດໃຫ້ນັກຮຽນ ມີຄວາມສົນໃຈໃນການສຶກສາຫລາຍຂຶ້ນ.
ແຕ່ແນວໃດກໍດີ, ຕໍ່ວຽກງານດັ່ງກ່າວນີ້ ມັນຕິດພັນກັບງົບປະມານ ແລະ ບັນຫາອື່ນໆ, ຊຶ່ງປັດຈຸບັນ ຕ້ອງໄດ້ສຸມໃສ່ຢ່າງຈິງຈັງ ເພື່ອສ້າງການປ່ຽນແປງ ໃນລະບົບການສຶກສາຂອງລາວ ໃນໄລຍະຍາວ.
ຂ່າວ: ສົມຫວັງ, ພາບ: ເກດສະໜາ
KPL
