ຂປລ. ກອງປະຊຸມຄົບຄະນະກໍາມາທິການບັນດາເຜົ່າ (ກບຜ) ປະຈໍາປີ 2024 ຈັດ​ຂຶ້ນ​ໃນ​ວັນ​ທີ 6 ພະຈິກ 2024 ໂດຍການເປັນປະທານຂອງ ທ່ານ ຄໍາຈັນ ໂສຕາປະເສີດ ຄະນະປະຈໍາສະພາແຫ່ງຊາດ, ປະທານກຳມາທິການບັນດາເຜົ່າ, ມີບັນດາປະທາ-ຮອງປະທານກໍາມາທິການ ແລະ ສະມາຊິກສະພາແຫ່ງຊາດ ທີ່ເປັນກໍາມະການຂອງ ກບຜ ຈາກ 18 ເຂດເລືອກຕັ້ງທົ່ວປະເທດ, ບັນດາການນໍາຈາກກະ ຊວງພາຍໃນ, ກະຊວງກະສິກໍາ ແລະ ປ່າໄມ້, ສູນກາງແນວລາວສ້າງຊາດ, 3 ອົງການຈັດຕັ້ງມະຫາຊົນຂັ້ນສູນກາງ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ແລະ ພາກສ່ວນ​ກ່ຽວຂ້ອງ ​ເຂົ້າ​ຮ່ວມ.

ກອງປະຊຸມໄດ້ຮັບຟັງຮ່າງສະຫລຸບຕີລາຄາ ການເຄື່ອນໄຫວວຽກງານປະຈໍາປີ 2024 ແລະ ວາງທິດທາງແຜນການເຄື່ອນ ໄຫວປະຈໍາປີ 2025 ຂອງກໍາມາທິການບັນດາເຜົ່າ; ບົດລາຍງານຜົນການຈັດຕັ້ງປະຕິບັດ ເບື້ອງຕົ້ນວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມມະຕິສະບັບເລກທີ 134/ສພຊ, ລົງວັນທີ 01/7/2024; ການສ່ອງແສງລາຍງານ ສະພາບພົ້ນເດັ່ນຂອງປະຊາຊົນ-ຊັ້ນຄົນຕ່າງໆ ຕາມການຕິດຕາມກວດກາ ຂອງອົງການແນວລາວສ້າງຊາດ ແລະ ອົງການຈັດຕັ້ງມະຫາຊົນ; ບົດລາຍງານຜົນການຕິດຕາມ ກວດກາຂອງຄະນະປະຈໍາສະພາແຫ່ງຊາດ ປະຈໍາປີ 2024 ໃນການຈັດຕັ້ງປະຕິບັດວຽກງານ 3 ສ້າງ ຕາມມະຕິ 02/ສພຊ, ລົງວັນທີ 28/01/2016. ພ້ອມນັ້ນ, ຍັງໄດ້ຮັບຟັງການປະກອບ ຄໍາຄິດຄໍາເຫັນສັງລວມຜົນ ການຕິດຕາມກວດກາ ການຈັດຕັ້ງປະຕິບັດວຽກງານ 3 ສ້າງຈາກເຂດເລືອກຕັ້ງທີ 2, 7, 8, 9, 12, 16, 17. ຈາກນັ້ນ, ບັນດາຜູ້ແທນຈາກສູນກາງ ແລະ ທ້ອງຖິ່ນ ໄດ້ປະກອບຄໍາເຫັນເພີ່ມຕື່ມ ເພື່ອແລກປ່ຽນ ແລະ ຖອດຖອນບົດຮຽນກ່ຽວກັບ ການເຄື່ອນໄຫວວຽກງານ ໃນຂອບເຂດຄວາມ ຮັບຜິດຊອບຂອງແຕ່ລະພາກສ່ວນ, ພ້ອມທັງແລກປ່ຽນຄໍາຄິດຄໍາເຫັນ ກ່ຽວກັບການພົວພັນຮ່ວມມືກັນ ໃນໄລຍະ 1 ປີຜ່ານມາ ລະຫວ່າງ ກໍາມາທິການບັນດາເຜົ່າ ກັບກໍາມະການຂອງ ກບຜ ທຸກເຂດເລືອກຕັ້ງ ແລະ ບັນດາກະຊວງທີ່ກ່ຽວຂ້ອງ, ອົງການຈັດຕັ້ງມະຫາຊົນຂັ້ນສູນກາງ ເພື່ອມີຄວາມເປັນເອກະພາບ ໃນການຈັດຕັ້ງປະຕິບັດວຽກງານຕໍ່ໜ້າ ໃຫ້ມີຄວາມຄ່ອງຕົວກວ່າເກົ່າ.

ທ່ານ ຄຳຈັນ ໂສຕາປະເສີດ ໄດ້ມີ​ຄໍາ​ເຫັນວ່າ: ຜົນສໍາເລັດຂອງກອງປະຊຸມ ຄົບຄະນະກໍາມາທິການບັນດາເຜົ່າ ປະຈໍາປີ 2024 ແມ່ນໝາກຜົນລວມຍອດ ການເຄື່ອນໄຫວໃນໄລຍະ 1 ປີ ຜ່ານມາ ຂອງກໍາມາທິການ ແລະ ບັນດາກໍາມະການ ຂອງກໍາມາທິການບັນດາເຜົ່າ ທີ່ໄດ້ພ້ອມກັນຜ່ານຜ່າທຸກຄວາມຫຍຸ້ງຍາກ ຈັດຕັ້ງປະຕິບັດ ທຸກໜ້າທີ່ ວຽກງານຈົນໄດ້ຮັບຜົນສໍາເລັດ, ຄຽງຄູ່ກັບຜົນງານໃນ 1 ປີ ຜ່ານມາທີ່ຍາດມາໄດ້ນັ້ນ, ກໍຍັງມີບາງດ້ານຄົງຄ້າງທີ່ຈະຕ້ອງໄດ້ສືບຕໍ່ນໍາໄປຄົ້ນຄວ້າ ພິຈາລະນາແກ້ໄຂ ເພື່ອຕອບສະໜອງກັບ ຄວາມຮຽກຮອງຕ້ອງການ ຂອງໜ້າທີ່ການເມືອງ ໃນໄລຍະໃໝ່ ທີ່ພັກ-ລັດ ແລະ ສະພາແຫ່ງຊາດ ໄດ້ມອບໝາຍໃຫ້ ໃຫ້ນັບມື້ນັບ ດີຂຶ້ນຢ່າງບໍ່ຢຸດຢັ້ງ.

ຂ່າວ: ອາລິນ ສຸພິມມະປະດິດ

KPL