*ນັບຕັ້ງແຕ່ການສະຖາປະນາ ສປ ຈີນ 75 ປີມານີ້, ພາຍໃຕ້ການຊີ້ນຳ-ນຳພາຂອງພັກກອມມູນິດຈີນ, ສປ ຈີນໄດ້ຍຶດໝັ້ນນະໂຍບາຍການຕ່າງປະເທດທີ່ມີສັນຕິພາບ, ເອກະລາດ ແລະ ເປັນເຈົ້າຕົນເອງ, ປົກປັກຮັກສາອະທິປະໄຕ ແລະ ຄວາມໝັ້ນຄົງຂອງຊາດຢ່າງໜັກແໜ້ນ, ປົກປັກຮັກສາຄວາມຍຸຕິທຳຂອງໂລກ, ຈີນນັບມື້ນັບກ້າວເຂົ້າໃກ້ຈຸດໃຈກາງຂອງເວທີສາກົນ, ສືບຕໍ່ປະກອບສ່ວນອັນໃໝ່ ແລະ ໃຫຍ່ຫລວງກວ່າເກົ່າເຂົ້າໃນພາລະກິດອັນສູງສົ່ງຂອງສັນຕິພາບ ແລະ ການພັດທະນາຂອງມະນຸດ.

            ຊຸກຍູ້ການກໍ່ສ້າງປະຊາຄົມຮ່ວມຊະຕາກຳຂອງມວນມະນຸດ ແລະ ປະກອບສ່ວນເຂົ້າໃນຄວາມກ້າວໜ້າຂອງໂລກດ້ວຍການຕອບສະໜອງແບບແຜນທີ່ສອດຄ່ອງເຫມາະສົມຂອງຈີນ. ເມື່ອ 70 ປີກ່ອນ, 5 ຫລັກການຢູ່ຮ່ວມກັນໂດຍສັນຕິໄດ້ຖືກປະ ກາດໃຊ້ຢ່າງເປັນທາງການ, ກາຍເປັນຂໍ້ລິເລີ່ມອັນໃຫຍ່ຫລວງໃນປະຫວັດສາດຂອງການພົວພັນສາກົນກ້າວເຂົ້າສູ່ຍຸກໃໝ່, ຈີນໄດ້ ສະເໜີແບບແຜນຂອງຈີນ ໃນການສ້າງປະຊາຄົມ​​ຮ່ວມຊະຕາກຳຂອງ​​ມວນມະນຸດ, ໄດ້ຊຸກຍູ້ໃຫ້ໂລກກ້າວໄປສູ່ອະນາຄົດທີ່ສົດໃສແຫ່ງສັນຕິພາບ ແລະ ຄວາມຈະເລີນຮຸ່ງເຮືອງ, ແລະ ໄດ້ຮັບການຍອມຮັບ ແລະ ການສະໜັບສະໜູນຈາກປະຊາຄົມໂລກຢ່າງ ກວ້າງຂວາງ. ສືບຕໍ່ຊູກຍູ້ການກໍ່ ສ້າງປະຊາຄົມຮ່ວມຊະຕາກຳຈີນ-ອາຊຽນ​​, ທ່າທີລວມຂອງການພົວພັນລະຫວ່າງຈີນ-ອາຟຣິກ ກາ ໄດ້ຮັບການຍົກລະດັບເປັນປະຊາຄົມຮ່ວມຊະຕາກຳຈີນ-ອາຟຣິກກາໃນຍຸກໃໝ່.

            ບັນດາຄູ່ຮ່ວມຊະຕາກຳ ຈີນ-ອາຟການິສຖານ, ຈີນ-ປະເທດໝູ່ເກາະປາຊີຟິກ ແລະ ອື່ນໆໄດ້ ມີການກ້າວໜ້າຢ່າງວ່ອງໄວ. ປັດຈຸບັນ, ການສ້າງປະຊາຄົມຮ່ວມຊະຕາກຳຂອງມວນມະນຸດນັບມື້ນັບມີຄວາມສຳຄັນຫລາຍຂຶ້ນ ດ້ວຍການປະຕິບັດຮ່ວມກັນຂອງຫລາຍປະເທດ ແລະ ພາກພື້ນ, ກຳລັງແຮງການປະຕິບັດຂໍ້ລິເລີ່ມຂອງຈີນ ໃນຂອບເຂດທົ່ວໂລກນັບມື້ນັບປະກົດຜົນຢ່າງຕັ້ງໜ້າພ້ອມດຽວກັນນີ້ ຊຸກຍູ້ການກໍ່ສ້າງສາຍພົວພັນສາກົນແບບໃໝ່ ແລະ ຂະຫຍາຍການພົວພັນຄູ່ຮ່ວມມືທີ່ສະເໝີພາບໃນທົ່ວໂລກ. ການກ້າວເຂົ້າສູ່ຍຸກໃໝ່, ຈີນພວມຊຸກຍູ້ການສ້າງການພົວພັນລະຫວ່າງປະເທດແບບໃໝ່ທີ່ມີຄວາມເຄົາລົບເຊິ່ງກັນ ແລະ ກັນ, ຄວາມຍຸຕິທຳ, ແລະ ໄດ້ຜົນປະໂຫຍດຮ່ວມກັນ. ໃນໄລຍະໃໝ່, ຈີນສືບຕໍ່ປັບປຸງຮູບແບບການທູດໂດຍລວມ, ຊຸກຍູ້ການປະສານງານ ແລະ ການພົວພັນທາງບວກລະຫວ່າງບັນດາປະເທດມະຫາອຳນາດ, ເພີ່ມທະວີການພົວພັນມິດຕະພາບທີ່ເປັນມູນເຊື້ອແລະມີຄວາມໄວ້ເນື້ອເຊື່ອໃຈເຊິ່ງກັນ ແລະ ກັນກັບບັນດາປະເທດອ້ອມຂ້າງ, ປົກປັກຮັກສາຜົນປະໂຫຍດຮ່ວມກັນຂອງປະເທດທີ່ກຳລັງພັດທະນາ, ອິດທິພົນ ແລະ ຂອບເຂດປະເທດເພື່ອນມິດກໍນັບມື້ນັບກວ້າງອອກ.

            ຕະຫລອດ 75 ປີທີ່ຜ່ານມາ, ນັບແຕ່ກອງປະຊຸມເຈນີວາ ແລະ ກອງປະຊຸມບັນດຸງໄດ້ກ້າວຂື້ນສູ່ເວທີສາກົນ, ຈົນເຖິງການໄດ້ ຮັບບ່ອນນັ່ງ ທີ່ຖືກຕ້ອງຕາມກົດໝາຍຂອງສະຫະປະຊາຊາດ; ນັບແຕ່ການຊຸກຍູ້ການສ້າງຕັ້ງອົງການຮ່ວມມືຊຽງໄຮ, ຈົນເປັນເຈົ້າພາບທາງການທູດທີ່ ສຳຄັນເຊັ່ນ: ກອງປະຊຸມສຸດຍອດຂອງກຸ່ມຈີ 20 (G20) ທີ່ນະຄອນຫາງໂຈ່ວ ແລະ ເວທີປຶກສາຫາລືສຸດຍອດການຮ່ວມມືສາກົນ “ໜຶ່ງແລວໜຶ່ງເສັ້ນທາງ”, ສິດທິການສົນທະນາສາກົນຂອງຈີນ ໄດ້ຮັບການຍົກລະດັບຢ່າງ ຮອບດ້ານ, ການທູດຂອງຈີນໄດ້ສ້າງຜົນງານໃໝ່ໃຫ້ແກ່ຍຸກສະໄໝຢ່າງບໍ່ຢຸດຢັ້ງ.

            ການປະຕິບັດຫລາຍຂໍ້ລິເລີ່ມໃນທົ່ວໂລກ ແລະ ປະກອບສ່ວນ ກຳລັງແຮງຂອງຈີນເຂົ້າໃນການພັດທະນາສັນຕິພາບຂອງມວນມະນຸດ. ນັບແຕ່ທ່ານ ສີ ຈິ້ນຜິງ ປະທານປະເທດແຫ່ງ ສປ ຈີນ ໄດ້ສະເໜີຂໍ້ລິເລີ່ມໃຫຍ່ກ່ຽວກັບການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ໃນປີ 2013 ເປັນຕົ້ນມາ, ມີ 150 ກວ່າປະເທດ ແລະ ຫລາຍກວ່າ 30 ອົງການຈັດຕັ້ງສາກົນໄດ້ລົງນາມຮ່ວມກັນ ກັບ ສປ ຈີນ ໃນເອກະສານການຮ່ວມມືໃນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” 230 ກວ່າເອກະສານ ເຊິ່ງໄດ້ນຳ​​ມາເຊິ່ງຜົນປະໂຫຍດລວມອັນໃຫຍ່ຫລວງທີ່ສຸດໃນການພັດທະນາຂອງບັນດາປະເທດໃນໂລກ. ການພັດທະນາແມ່ນຫົວຂໍ້ອັນຖາວອນຂອງສັງຄົມມະນຸດ, ຄວາມປອດໄພແມ່ນພື້ນຖານ ແລະ ເງື່ອນໄຂເບື້ອງຕົ້ນສໍາລັບການພັດທະນາ.

            ເປັນເວລາ 70 ກວ່າປີມານີ້ ຈີນໄດ້ເປັນຜູ້ປົກປ້ອງສັນຕິພາບ ແລະ ຄວາມໝັ້ນຄົງຂອງໂລກຕະຫລອດມາ, ໃນປີ 2022, ຈີນໄດ້ສະເໜີຂໍ້ລິເລີ່ມຄວາມໝັ້ນຄົງທົ່ວໂລກ ເພື່ອຕອບໂຕ້ສິ່ງທ້າ ທາຍດ້ານຄວາມໝັ້ນຄົງສາກົນທີ່ເກີດຂື້ນ. “ການໄກເກ່ຍການຈັບມືກັນເພື່ອສັນຕິພາບ” ລະຫວ່າງປະເທດຊາອູດິອາຣະເບີຍ ແລະ ອີຣ່ານ, ຊຸກຍູ້ການປອງດອງກັນດ້ານປະຫວັດສາຂອງກຸ່ມຕ່າງໆພາຍໃນປະແລັດສະຕີນ, ແລະ ສົ່ງເສີມການແກ້ໄຂວິກິດທາງດ້ານການເມືອງຂອງອູແກຣນ ແລະ ອື່ນໆ, ໄດ້ສະແດງ ໃຫ້ເຫັນເຖິງຄວາມຮັບຜິດຊອບຂອງຈີນທີ່ເປັນປະເທດຮ່ວມມືໃນວົງຄະນະຍາດກົນໂດຍມີຄວາມຮັບຜິດຊອບຕໍ່ການຟື້ນຟູປະເທດຊາດ ແລະ ການພັດທະນາຂອງມວນມະນຸດ. ພາຍໃຕ້ການຊີ້ນຳ-ນຳພາຂອງແນວຄິດການທູດຂອງ ທ່ານ ສີ ຈິ້ນຜິງ ປະທານປະເທດ ສປ ຈີນ ແລະ ໂລກຈະເຊື່ອມຈອດເຊື່ອມໂຍງເຂົ້າກັນ ແລະ ບັນລຸຜົນສຳເລັດຂອງກັນ ແລະ ກັນ, ແລະ ຈະມີການປະກອບສ່ວນອັນໃໝ່ ແລະ ໃຫຍ່ຫລວງກວ່າເກົ່າເຂົ້າໃນການຊຸກຍູ້​​ພາລະກິດການພັດທະນາສັນຕິພາບຂອງມວນມະນຸດ ແລະ ຊຸກຍູ້ການສ້າງປະຊາຄົມຮ່ວມຊະຕາກຳຂອງມວນມະນຸດ.

KPL