ຂປລ
ຂປລ. ກອງປະຊຸມຄົ້ນຄວ້າ, ວິໄຈ ແລະ ປັບປຸງເນື້ອໃນລັດຖະທໍາມະນູນ ສະບັບປີ 2015 ຈັດຂຶ້ນໃນວັນທີ 25-26 ກັນຍາ 2024 ຢູ່ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຜູ້ປະຈຳການຄະນະກໍາມະການ ລະດັບຊາດປັບປຸງລັດຖະທໍາມະນູນ ແຫ່ງ ສປປ ລາວ ສະບັບປີ 2015 (ຄລຊ), ມີຄະນະກຳມະການ, ກອງເລຂາ, ອະນຸກຳມະການຕ່າງໆ ຂອງ ຄລຊ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ຂປລ. ກອງປະຊຸມຄົ້ນຄວ້າ, ວິໄຈ ແລະ ປັບປຸງເນື້ອໃນລັດຖະທໍາມະນູນ ສະບັບປີ 2015 ຈັດຂຶ້ນໃນວັນທີ 25-26 ກັນຍາ 2024 ຢູ່ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຜູ້ປະຈຳການຄະນະກໍາມະການ ລະດັບຊາດປັບປຸງລັດຖະທໍາມະນູນ ແຫ່ງ ສປປ ລາວ ສະບັບປີ 2015 (ຄລຊ), ມີຄະນະກຳມະການ, ກອງເລຂາ, ອະນຸກຳມະການຕ່າງໆ ຂອງ ຄລຊ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທັງນີ້, ກໍເພື່ອຄົ້ນຄວ້າ, ວິໄຈ ແລະ ເລືອກເຟັ້ນ ຄຳສະເໜີ ຂອງການຈັດຕັ້ງ ແລະ ບຸກຄົນ ຈາກຜົນການປະເມີນ ການປະຕິບັດລັດຖະທຳມະນູນ ສະບັບປີ 2015 ປັບປຸງເຂົ້າເນື້ອໃນໝວດ ແລະ ມາດຕາ ຂອງລັດຖະທຳມະນູນສະບັບປັບປຸງໃໝ່ ໃຫ້ຖືກຕ້ອງ, ສອດຄ່ອງກັບກົດໝາຍ ວ່າດ້ວຍການສ້າງນິຕິກຳ ແລະ ສາມາດນໍາໄປສູ່ ການພິຈາລະນາຮັບຮອງ, ທັງເປັນການຄົ້ນຄວ້າ, ວິໄຈເນື້ອໃນ ແລະ ສະເໜີເພີ່ມເນື້ອໃນທີ່ສັງລວມ ໄດ້ຈາກການປະເມີນ ເຂົ້າໃສ່ມາດຕາ ຫລື ວັກໃດໜຶ່ງຂອງມາດຕາ ທີ່ເຫັນວ່າມີຄວາມຈຳເປັນຕ້ອງປັບປຸງ ເພື່ອໃຫ້ສອດຄ່ອງ ແລະ ຕອບສະໜອງກັບສະພາບ ການພັດທະນາໃນໄລຍະ ໃໝ່ ໃຫ້ເປັນຮ່າງສະບັບປັບປຸງເບື້ອງຕົ້ນ, ແລ້ວສະຫລຸບສັງຮວມຜົນ ຂອງການຄົ້ນຄວ້າເນື້ອໃນ ຂອງແຕ່ລະໝວດ ແລະ ມາດຕາ ຢ່າງລະອຽດ ເພື່ອລາຍງານຂໍທິດຊີ້ນໍາ.
ໃນກອງປະຊຸມ, ຜູ້ເຂົ້າຮ່ວມໄດ້ສຸມໃສ່ຄົ້ນຄວ້າ, ອະທິບາຍ, ປະກອບຄວາມເຫັນຢ່າງກົງໄປກົງມາ, ມີເນື້ອໃນເລິກເຊິ່ງ ແລະ ຫລາຍເທື່ອຄົນ ລ້ວນແຕ່ເປັນບັນຫາທີ່ມີຄວາມສໍາຄັນ ແລະ ເປັນບ່ອນອີງໃຫ້ແກ່ການ ປັບປຸງເນື້ອໃນລັດຖະທໍາມະນູນ ໃຫ້ແທດເໝາະກັບ ສະພາບຄວາມເປັນຈິງ ໃນປັດຈຸບັນ ແລະ ສາມາດນໍາໄປຈັດຕັ້ງ ປະຕິບັດໃຫ້ມີຄວາມເຂັ້ມງວດ, ສັກສິດ ແນໃສ່ປົກປ້ອງສິດ ແລະ ຜົນປະ ໂຫຍດຂອງປະຊາຊົນລາວບັນດາເຜົ່າຢ່າງແທ້ຈິງ.
ທ່ານ ຈະເລີນ ເຍຍປາວເຮີ ໄດ້ມີຄໍາເຫັນວ່າ: ຜ່ານການຄົ້ນຄວ້າ, ປະກອບຄວາມເຫັນຢ່າງລະອຽດ, ຖີ່ຖ້ວນ, ຖົກຖຽງກັນຢ່າງມີເຫດມີຜົນ ຈຶ່ງເຮັດໃຫ້ກອງປະຊຸມປະສົບຜົນສຳເລັດ ຕາມຄາດໝາຍທີ່ວາງໄວ້ ໂດຍພື້ນຖານ, ກອງປະຊຸມເຫັນດີເປັນເອກະພາບ ຕໍ່ບັນດາເນື້ອໃນທີ່ໄດ້ປັບປຸງຄັ້ງນີ້, ແຕ່ເຫັນວ່າຍັງມີບາງມາດຕາ, ບາງເນື້ອໃນ ແລະ ບາງຄໍາສັບ ທີ່ຈະຕ້ອງໄດ້ສືບຕໍ່ນໍາໄປຄົ້ນຄວ້າ ແລະ ຂໍທິດຊີ້ນໍາຈາກຂັ້ນເທິງ ເພື່ອສືບຕໍ່ຄົ້ນຄວ້າ, ປັບປຸງໃຫ້ສ່ອດຄ່ອງ, ຮັດກຸມ, ພ້ອມທັງຮ່າງລາຍງານຜົນການຄົ້ນຄວ້າ, ປັບປຸງ (ຮ່າງລັດຖະທໍາມູນ) ຄັ້ງນີ້ ຕໍ່ຄະນະປະຈໍາການ ຄະນະກຳມະການລະດັບຊາດ ປັບປຸງລັດຖະທໍາມະນູນ ເພື່ອພິຈາລະນາ ກ່ອນຈະລາຍງານ ຕໍ່ກອງປະຊຸມ ກົມການເມືອງຮ່ວມກັບຄະນະເລຂາ ທິການສູນກາງພັກ, ແລ້ວຈຶ່ງປັບປຸງ ເພື່ອຂໍການປະກອບຄວາມເຫັນ ຕໍ່ກອງປະຊຸມຄົບຄະນະຂອງຄະນະ ບໍລິຫານງານສູນກາງພັກ ເທື່ອທີ 9 ສະໄໝທີ XI ໃນທ້າຍເດືອນຕຸລານີ້.
ຂ່າວ: ອາລິນ ສຸພິມມະປະດິດ ສພຊ
KPL
