*ບັນຫານ້ຳຖ້ວມຂັງຖະໜົນຫົນທາງ ບໍ່ແມ່ນຫາກໍ່ເກີດຂຶ້ນມື້ນີ້ ມື້ວານ, ແຕ່ມັນແມ່ນບັນຫາທີ່ເກີດຂຶ້ນມາຍາວນາມທີ່ຍັງແກ້ໄຂບໍ່ທັນຕົກ. ພໍແຕ່ຝົນຕົກລົງມາຫລາຍຊົ່ວໂມງຕິດຕໍ່ກັນ, ເຮືອນຊານໃຜທີ່ຢູ່ພື້ນທີ່ຕ່ຳແຄມຖະໜົນຫລວງ ຫລື ສີ່ແຍກໍທຳໃຈໄດ້ເລີຍວ່າ ນ້ຳຕ້ອງຍຶ່ງຖ້ວມເຂົ້າມາໃນເຮືອນ, ໃນຫ້ອງ,​ ຮ້ານຄ້າຢ່າງແນ່ນອນ. ນອກຈາກນີ້, ຍັງສ້າງຄວາມຫຍຸ້ງຍາກໃຫ້ແກ່ການສັນຈອນໄປມາ ແລະ ກາຍເປັນອຳມະພາດໄປໃນຕົວ ອັນໄດ້ເກີດຄຳຖາມເຖິງສາເຫດ ແລະ ວິທີແກ້ໄຂຈາກທຸກພາກສ່ວນ.

          ປັດຈຸບັນນີ້, ເຫັນວ່າຝົນຍັງສືບຕໍ່ຕົກຢ່າງຕໍ່ເນື່ອງໃນຂອບເຂດທົ່ວປະເທດ. ໃນນັ້ນ, ບາງທ້ອງຖິ່ນກໍ່ໄດ້ຮັບຜົນກະທົບຈາກໄພນ້ຳຖ້ວມຢ່າງໜັກໜ່ວງ ໂດຍສະເພາະແມ່ນບັນດາແຂວງພາກເໜືອຂອງລາວເຮົາ ອັນໄດ້ສ້າງຄວາມເສຍຫາຍບໍ່ໜ້ອຍຕໍ່ຊັບສິນ, ເຮືອນຊານບ້ານຊ່ອງຂອງປະຊາຊົນບັນດາເຜົ່າ. ແນວໃດກໍ່ຕາມ ກັບມາເວົ້າເຖິງບັນຫານ້ຳຖ້ວມຂັງຖະໜົນຫົນທາງນັ້ນ, ຖ້າເວົ້າຕາມເປັນຈິງແລ້ວ ບັນຫາຂອງມັນທຸກໆຄົນຕ່າງກໍ່ຮູ້ ແລະ ມັນບໍ່ໄດ້ເກີດມື້ໜຶ່ງມື້ດຽວ ແຕ່ມັນໄດ້ສະສົມເທື່ອລະໜ້ອຍ ແລະ ຈາກບັນຫາໜ້ອຍກໍ່ກາຍເປັນບັນຫາໃຫຍ່ ເຊິ່ງສ່ວນຫລາຍ ພວກເຮົາທຸກຄົນມີສ່ວນ ເຮັດໃຫ້ບັນຫານັ້ນເກີດຂຶ້ນ ໂດຍສະເພາະແມ່ນການຖິ້ມເສດຂີ້ເຫຍື້ອລົງສູ່ຖະໜົນຫົນທາງ, ປັດກວາດຝຸ່ນ ດິນ ອັດຕັນຮ່ອງລະບາຍນ້ຳ, ທາງຮ່ອມໃນແຕ່ລະບ້ານຍັງເປັນທາງດິນແດງ, ລົດລາງພາຫະນະແກ່ດິນ, ຖົມດິນ ທຽວເຂົ້າ-ອອກ ມີຕົມຕິດເປື້ອນທາງ ຫລື ອາດເກີດຂຶ້ນຈາກຄົນບາງຄົນແກ່ດິນ, ຖົມດິນບໍ່ຜ່ານການກວດກາ ຫລື ຄິິດເຖິງສະ ພາບພື້ນທີ່ ທີ່ເປັນໜອງ, ບຶງທີ່ເປັນອັນຮອງຮັບນ້ຳໃນຍາມຝົນ ຖືກຖົມເປັນພື້ນທີ່ປູກສ້າງ, ບາງບ່ອນບໍ່ໄດ້ເຮັດຮ່ອງລະບາຍນ້ຳ ຈຶ່ງພາໃຫ້ເກີດຜົນກະທົບໂດຍສ່ວນລວມ. ແຕ່ການແກ້ໄຂໃນປັດຈຸບັນກໍ່ຄືຜ່ານມາເປັນພຽງການແກ້ໄຂໃນສະເພາະໜ້າ, ເປັນການແກ້ໄຂປາຍເຫດເທົ່ານັ້ນ, ຍັງບໍ່ທັນໄດ້ລົງເລິກເຖິງຕົ້ນເຫດ ເມື່ອຝົນເຊົາ ນ້ຳກໍ່ລົດລົງ, ມື້ໜ້າຝົນຕົກມາ ກໍ່ຍຶ່ງຖ້ວມໃໝ່ໝູນວຽນກັນໄປຢູ່ແນວນັ້ນ. 

          ແນວໃດກໍ່ດີ ສິ່ງສຳຄັນຄືສ້າງຈິດສຳນຶກຕໍ່ການປົກປັກຮັກສາສະພາບແວດລ້ອມໃນຊຸມຊົນ, ຢຸດຕິການກະທຳທີ່ມັກງ່າຍໃນການຖິ້ມຂີ້ເຫຍື້ອຊະຊາຍ ຫັນມາຖິ້ມຂີ້ເຫຍື້ອໃຫ້ຖືກທີ່ ຖືກບ່ອນ ເພື່ອຫລຸດຜ່ອນການອັດຕັນຮ່ອງລະບາຍນ້ຳ ແລະ ກ່ອນຈະຖົມ, ຈະສ້າງຫຍັງໃນຕົວເມືອງ ກໍ່ຕ້ອງໄດ້ຮັບອະນຸຍາດຈາກພາກສ່ວນກ່ຽວຂ້ອງກ່ອນ ວ່າຈະບໍ່ມີຜົນກະທົບແນວໃດຕາມມາ. ຂະນະທີ່ພາກສ່ວນທີ່ມີໜ້າທີ່ຮັບຜິດຊອບວຽກງານບໍລິການຕົວເມືອງ ຕ້ອງເອົາໃຈໃສ່ເກັບກຳສະພາບບັນຫາ, ສະຖິຕິແຕ່ລະຈຸດນ້ຳຖ້ວມຂັງໃນໄລຍະຜ່ານມາ ແລ້ວລົງມືກະກຽມລ່ວງໜ້າ ຕັ້ງແຕ່ຕອນບໍ່ທັນຮອດລະດູຝົນ, ບໍ່ແມ່ນຝົນຕົກລົງມາ ນ້ຳອ່າງຂັງແລ້ວ ຈຶ່ງງົນໆທາວເທົາ ພໍເປັນພິທີເທົ່ານັ້ນ. ຫວັງວ່າແຕ່ນີ້ຕໍ່ໄປ ທຸກໆຄົນ ທຸກໆພາກສ່ວນໃນສັງຄົມ ແລະ ພາກສ່ວນກ່ຽວຂ້ອງຈະເປັນເຈົ້າການໃນການປັບປຸງ ປ່ຽນແປງ ເພື່ອການແກ້ໄຂທີ່ດີຂຶ້ນ ແລະ ຫວັງຢ່າງຍິ່ງວ່າ ນ້ຳຖ້ວມກະທັນຫັນເຫລົ່ານັ້ນ ຈະໝົດໄປໃນສັງຄົມພວກເຮົາ.

          ໂດຍ: ຢ່າຕົ່ງ.  

KPL