ຂປລ
ການຫຍິບປັກຖັກແແຊ່ວເປັນມູນເຊື້ອ ແລະ ສິລະປະວັດທະນະທໍາ ຂອງ ແມ່ຍິງລາວເຮົາທີ່ສືບກັນມາແຕ່ດົນນານ ເພື່ອຜະລິດເຄື່ອງຫົ່ມ ແລະ ເຄື່ອງໃຊ້ພາຍໃນຄອບຄົວ ແຕ່ປັດຈຸບັນນີ້.
ການຫຍິບປັກຖັກແແຊ່ວເປັນມູນເຊື້ອ ແລະ ສິລະປະວັດທະນະທໍາ ຂອງ ແມ່ຍິງລາວເຮົາທີ່ສືບກັນມາແຕ່ດົນນານ ເພື່ອຜະລິດເຄື່ອງຫົ່ມ ແລະ ເຄື່ອງໃຊ້ພາຍໃນຄອບຄົວ ແຕ່ປັດຈຸບັນນີ້ ສິ່ງເຫລົ່ານີ້ ໄດ້ສ້າງມູນຄ່າເພີ່ມ, ສ້າງລາຍຮັບສ້າງເສດຖະກິດເຂົ້າຄອບຄົວ ເໝືອນດັ່ງ ຄອບຄົວຂອງ ນາງ ພີນ ປັນຍາທອງ ຜະລິດ ຫັດຖະກໍາປັກແຊ່ວ ຂາຍສາມາດສ້າງລາຍຮັບເຂົ້າຄອບຄົວ ເຊິ່ງມັນໄດ້ສ້າງຄວາມພາກພູມໃຈໃຫ້ຜູ້ ປະກອນການຫລາຍຄົນທີ່ໄດ້ພູມປັນຍາຂອງແມ່ຍິງລາວເພື່ອສ້າງເສດຖະກິດໃຫ້ຄອບຄົວ.
ນາງ ພີນ ປັນຍາທອງ ອາຍຸ 40 ປີ ປະຈຸບັນຢູ່ບ້ານໃໝ່ໜອງຊາງ ເມືອງຊຽງຮ່ອນ ແຂວງໄຊຍະບູລີ ເພິ່ນໄດ້ເລົ່າສູ່ທີມຂ່າວ ແຂວງໄຊຍະບູລີ ຟັງວ່າ: ຄອບຄົວຂອງເພິ່ນມີນໍາກັນ 4 ຄົນ ມີແຮງງານຕົ້ນຕໍ 1 ຄົນ ກ່ອນຈະມາເຖິງຈຸດນີ້ໄດ້ນັ້ນ ໃນເມື່ອກ່ອນຄອບຄົວຂອງເພິ່ນກໍ່ໄດ້ເຮັດໄຮ່ໄຖນາ ປົກກະຕິຕາມຄົນທົ່ວໆໄປ ຊີວິດການເປັນຢູ່ໃນໄລຍະນັ້ນ ກໍ່ພໍກຸ້ມຢູ່ກຸ້ມກິນໄປແຕ່ລະວັນ ເພື່ອເປັນການຊອກຫາລາຍໄດ້ຊ່ວຍຜູ້ເປັນສາມີ ສາມີເປັນຄູສອນຢູ່ເມືອງຊຽງຮ່ອນ ຕົນເອງກໍ່ເລີຍປຶກສາກັບຄອບຄົວ ແລະ ຜູ້ເປັນແມ່ເຖົ້າ ໃນເວລານັ້ນແມ່ເຖົ້າເພິ່ນຕໍ່າຫູກທໍໄໝຫາລາຍໄດ້ເຂົ້າຄອບຄົວໄດ້ດີ. ຮອດປີ 2018 ຕົນເອງກໍ່ເລີຍເລີ່ມຕົ້ນຕໍ່າຫູກທໍໄໝ ສືບທອດຂອງຜູ້ເປັນແມ່ຕໍ່ສິ້ນ, ຕໍ່າແຜ່ນແພເສື້ອ, ຜ້າບ່ຽງ, ຖົງ, ຍ້ອມສີເປືອກດູ່ລາຍລື້ ເຮັດເປັນແບບຄອບຄົວ ເຫັນວ່າມີລາຍໄດ້ເຂົ້າໃນຄອບຄົວດີ ແລະ ເປັນສິ່ງຕ້ອງການຂອງສັງຄົມຫລາຍຂຶ້ນ ບາງຊ່ວງກໍ່ບໍ່ພຽງພໍກັບຄວາມຕ້ອງການຂອງລູກຄ້າ ເມື່ອເປັນເຊັ່ນນັ້ນຕົນເອງເລີຍເພີ່ມກີ່ຕໍ່ຫູກຂຶ້ນໃນແຕ່ລະປີ ໂດຍສ້າງໃຫ້ເປັນສາຂາ ເຮົາເປັນຜູ້ສະ ໜອງກີ່, ເຄືອຫູກ, ຝ້າຍ ແລະ ລວດລາຍຕ່າງໆ ເປັນຜູ້ກໍານົດໃນຄາລາຕໍ່າຜືນໜຶ່ງ ຈະຕົກຢູ່ 2 ແສນ ຫາ 2 ແສນ 50 ພັນກີບ ຂຶ້ນກັບຢູ່ວ່າລວດລາຍຍາກ ຫລື ງ່າຍ, ຂະໜາດຜືນຜ້າ 180 ແລະ 110 ເຊັນ. ມາຮອດປັດຈຸບັນນີ້ ມີກີ່ຕໍ່າຫູກທັງໝົດ 100 ກີ່ ຢູ່ພາຍໃນເມືອງ ແລະ ແຂວງອຸດົມໄຊ ແຕ່ລະເດືອນແມ່ນຈະໄດ້ຜ້າທີ່ສັ່ງມາ 50 ຜືນ ຖ້າວ່າການຂາຍຜະລິດຕະພັນຂອງເຮົາແມ່ນຂຶ້ນກັບ ລວດລາຍ ຖ້າລວດລາຍທີ່ຍາກ ແມ່ນລາຄາຈະຢູ່ໃນ 5 ແສນກີບ ຖ້າລວດລາຍທໍາມະດາຈະຢູ່ໃນລະດັບ 4 ແສນກີບຕໍ່ຜືນ. ການຂາຍແມ່ນລູກຄ້າຈະມາເລືອກຊື້ຢູ່ກັບທີ່ຮ້ານບາງຄັ້ງລູກຄ້າເອົາຫລາຍຢູ່ຕ່າງເມືອງຕ່າງແຂວງ ແມ່ນພວກເຮົາຈະໄປສົ່ງໃຫ້ລູກຄ້າກັບທີ່, ບາງຄັ້ງກໍ່ຂາຍທາງອອນລາຍໄລສົດ ແຕ່ລະເດືອນສົ່ງອອກ 30 ຜືນ ສັງລວມແລ້ວການຂາຍເຄື່ອງບໍ່ຫລຸດ 30 ຜືນ ເມື່ອສັງລວມລາຍຮັບປີໜຶ່ງຈະໄດ້ 150 ລ້ານກີບ. ສິ່ງດັ່ງກ່າວໄດ້ຢັ້ງຢືນວ່າປັດຈຸບັນຄອບຄົວຂອງຂ້າພະເຈົ້າດີຂຶ້ນກວ່າແຕ່ກ່ອນ ມີເງິນຊື້ພາຫະນະຮັບໃຊ້ຄອບຄົວ, ມີເງິນແຮ່ໄວ້ໃຊ້ຍາມຈໍາເປັນ ແຕ່ສິ່ງສໍາຄັນ ແລະ ພາກພູມໃຈທີ່ສຸດຄື ໄດ້ຖືກຮັບຮອງໃຊ້ກາໝາຍໜຶ່ງເມືອງໜຶ່ງຜະລິດຕະພັນແຫ່ງຊາດ ກຸ່ມຫັດຖະກໍາຕໍ່າແຜ່ນແພຜ້າຝ້າຍທໍາມະຊາດຍ້ອມສີເປືອກດູ່ລາຍລື້ ບ້ານໃໝ່ໜອງຊາງ ເມືອງຊຽງຮ່ອນ.
ໂດຍ: ມາລີດາ; ກວດແກ້ໂດຍ: ເກີດຂວັນໃຈ
KPL
