ຂປລ. ແຫລ່ງຂ່າວຈາກ ແຂວງ ວຽງຈັນ ໃຫ້ຮູ້ວ່າ: ຫ້ອງການສາທາລະນະສຸກ ເມືອງທຸລະຄົມແຂວງວຽງຈັນ ຈະສຸມໃສ່ 4 ແຜນວຽກສໍາຄັນ ສໍາລັບ 6 ເດືອນທ້າຍປີ 2024 ເປັນຕົ້ນຍົກສູງຄຸນນະພາບທາງດ້ານວຽກງານການເມືອງ- ແນວຄິດ, ຄຸນສົມບັດຈັນຍາທຳແພດປະຊາຊົນ, ວຽກງານວິຊາການທາງ ດ້ານການແພດ ແລະ ເພີ່ມທະວີການ ຄຸ້ມຄອງພະນັກງານສາທາລະນະສຸກທຸກຂັ້ນ; ບູລະນະລະບົບເບິ່ງແຍງ ສຸຂະພາບແກ່ປະຊາຊົນ ຕາມທິດຖືເອົາວຽກງານການປ້ອງກັນພະຍາດເປັນຕົ້ນຕໍ, ການປິ່ນປົວເປັນສຳຄັນ ສົມທົບຢາຫລວງ ແລະ ຢາພື້ນເມືອງ; ຍົກສູງຄວາມສາມາດໃນ ການຄວບຄຸມກວດການເຝົ້າລະວັງ ບັນດາປັດໄຈສ່ຽງຕໍ່ສຸຂະພາບປະຊາຊົນ ແລະ ສະກັດກັ້ນໂລກລະບາດຕ່າງໆ ທັງອັນເກົ່າ ແລະ ໃໝ່, ບັນດາພະຍາດທີ່ສາມາດປ້ອງກັນໄດ້ ແລະ ເປັນສາເຫດໃຫຍ່ຕ່ໍການຕາຍຂອງເດັກ, ຫລຸດຜ່ອນອັດຕາການຕາຍຂອງແມ່, ເຮັດໃຫ້ປະຊາຊົນບັນດາ ເຜົ່າມີອາຍຸຍືນສະເລ່ຍສູງຂຶ້ນ; ຂະ ຫຍາຍຕາໜ່າງການບໍລິການສຸຂະພາບ ທ່ີມີຄຸນນະພາບເໝາະສົມກັບທ້ອງຖ່ິນຮາກຖານ ໃຫ້ຄົບຕາມເຂດຈຸດສຸມພັດທະນາ.

      ທ່ານ ດຣ. ດິ້ງ ເລືອງໄຊ ຫົວໜ້າ ຫ້ອງການສາທາລະນະສຸກ ເມືອງທຸລະຄົມ ແຂວງວຽງຈັນ ໃຫ້ຮູ້ເມື່ອບ່ໍດົນມານ້ີວ່າ: ທາງດ້ານຄາດໝາຍສູ້ຊົນຄະນະພັກ, ຄະນະນໍາຫ້ອງການສາທາລະນະສຸກ ເມືອງທຸລະຄົມໄດ້ວາງແຜນການໄວ້ 14 ວຽກຕົ້ນຕໍ ຄື: ຕ້ອງຍົກລະດັບຄວາມເຂົ້າໃຈແນວທາງ, ຄວາມຕື່ນຕົວດ້ານການເມືອງ, ທັດສະນະຫລັກໝັ້ນປະຕິວັດຂອງຖັນແຖວພະນັກງານແພດໝໍ ໃຫ້ສູງ ຢູ່ໃນການເຄື່ອນໄຫວຮັບຜິດຊອບວຽກງານວິຊາການທາງດ້ານ ການແພດ, ການຄຸ້ມຄອງສາທາລະນະສຸກ ຂອງພະນັກງານທຸກຂັ້ນໄປພ້ອມກັບການສຶກສາອົບຮົມ,  ການສະກັດກັ້ນ ແລະ ຈຳກັດບັນດາ ປະກົດການຫຍໍ້ທໍ້ໃນຂົງເຂດສາທາລະນະສຸກ ໃຫ້ມີການຫັນປ່ຽນໃໝ່ຢ່າງຈະແຈ້ງ ເປັນຕົ້ນຄຸນສົມບັດແພດປະຕິວັດ, ແພດປະຊາຊົນຈັນຍາທຳຂອງແພດ ແລະ ເພື່ອຮັກສາມູນເຊື້ອກໍ່ສ້າງໜ່ວຍພັກປອດໃສ, ເຂ້ັມແຂງ, ໜັກແໜ້ນ ໄວ້ຢ່າງໝັ້ນຄົງພ້ອມນີ້,  ໝົດປີ 2024 ບັນລຸໃຫ້ໄດ້ເປົ້າໝາຍສະຫະສະຫວັດ ເພື່ອການພັດທະນາດ້ານສຸຂະພາບ; ສູ້ຊົນປິ່ນປົວຮັກສາການຕິດເຊື້ອ HIV ແລະ ພະຍາດຕິດຕໍ່ທາງເພດສຳພັນ ໃຫ້ຢູ່ລະດັບຕ່ຳກວ່າ 1%, ເລັ່ງໃສ່ການໂຄສະນາສຸຂະສຶກສາໃຫ້ກຸ່ມເປົ້າໝາຍສ່ຽງ, ຂະຫຍາຍຕາໜ່າງການກວດເລືອດ ຢູ່ໂຮງໝໍເມືອງລົງຫາໂຮງໝໍນ້ອຍ ໃຫ້ໄດ້ 95%; ເຊື່ອມສານໃຫ້ໄດ້ວຽກແມ່ ແລະ ເດັກທີ່ເປັນບຸລິມະສິດແຖວໜ້າ ແລະ ວຽກງານຮັກສາສຸຂະພາບຂັ້ນພື້ນຖານ; ຊຸກຍູ້ສົ່ງເສີມການລ້ຽງລູກດ້ວຍນ້ຳແມ່ ຢ່າງດຽວຕັ້ງແຕ່ເກີດຮອດອາຍຸໄດ້ 6 ເດືອນ ແລະ ຕັ້ງໜ້າໃຫ້ຄວາມຮູ້ທາງດ້ານໂພຊະນາການ ເພື່ອລຶບລ້າງຄວາມຕ່ຳ, ເຕ້ຍ, ຈ່ອຍ ແລະ ການຂາດສານອາຫານທີ່ຮ້າຍແຮງ;  ແກ້ໄຂໃຫ້ໄດ້ຢ່າງແຂງແຮງ ວຽກສຸຂະສຶກສາເພື່ອໃຫ້ປະຊາຊົນເປັນ ເຈົ້າການປົກປ້ອງ ແລະ ສົ່ງເສີມສຸຂະພາບຂອງຕົນ ດ້ວຍການປ່ຽນແປງແບບແຜນດຳລົງຊີວິດ; ຄວບຄຸມສົ່ງເສີມໃຫ້ປະຊາຊົນ ໃຫ້ໄດ້ໃຊ້ນ້ຳສະອາດເຖິງ 100% ດຳລົງຊີວິດຖືກຫລັກອະນາໄມຖ່າຍໃສ່ວິດ 100%; ຫັນວຽກງານສາທາລະນະສຸກ ລົງເຮັດຮ່ວມກັບວຽກງານກ່ໍສ້າງຮາກຖານການເມືອງຢ່າງແຂງແຮງ, ສ້າງຂະບວນການອະນາໄມກັນພະຍາດຂອງປະຊາຊົນ ແຕ່ຫົວໜ່ວຍຄອບຄົວ ແລະ ບ້ານ ແນໃສ່ສ້າງເປັນບ້ານສາທາລະນະສຸກແບບຢ່າງໃຫ້ໄດ້ 1 ບ້ານຕໍ່ປີ; ຕ້ອງກັນພະຍາດໃຫ້ໄດ້ຕັ້ງແຕ່ຫົວທີ, ຕັ້ງແຕ່ບໍ່ເກີດຂອງພະຍາດ; ສືບຕໍ່ສູ້ຊົນເຮັດໃຫ້ຂົງເຂດສາທາລະນະສຸກມີຄຸນນະພາບ ແລະ ທັນສະໄໝດີຂ້ຶນ ເທື່ອລະກ້າວ; ຕ້ອງໃຫ້ມີການຮັບ ປະກັນໃນການຊົມໃຊ້ຢາ ແລະ ບໍລິ ໂພກອາຫານທ່ີປອດໄພ, ສ່ົງເສີມ ທ່າແຮງດ້ານຢາພື້ນເມືອງໃຫ້ເຂັ້ມ ແຂງ ໂດຍສົມທົບຢາພື້ນເມືອງ ແລະ ຢາຫລວງເຂົ້າໃນການປິ່ນປົວພະຍາດຢູ່ໂຮງໝໍຂັ້ນຕ່າງໆ; ການສ້າງ ແລະ ບັນຈຸພະນັກງານແພດໝໍ ເນັ້ນດ້ານປະລິມານສ້າງໃຫ້ສອດຄ່ອງກັບອັດຕາ 2,5/1.000 ປະຊາກອນ, ດ້ານໂຄງປະກອບສ້າງຕ້ອງໃຫ້ສອດຄ່ອງກັບວິຊາເພາະ; ລວບລວມບັນດາລະບຽບການ ແລະ ກົດໝາຍທີ່ເປັນກົນໄກ ແລະ ເຄື່ອງມືເພື່ອຄຸ້ມຄອງໃຫ້ເກີດມີປະສິດທິພາບ ແລະ ປະສິດທິຜົນ, ມີຄວາມເຂັ້ມແຂງ ແລະ ຍືນຍົງທັງສາມາດກວດສອບໄດ້ທຸກເວລາ ແລະ ໂປ່ງໃສ; ຍາດແຍ່ງການຊ່ວຍເຫລືອ, ການຮ່ວມມື, ການລົງທຶນຂອງສາກົນຢ່າງມີປະສິດທິຜົນໃນຂົງເຂດສາທາລະນະສຸກ.

ຂ່າວ: ບ່າວທົ່ງ-ລ້ອງງື່ມຂ່າວ: ບ່າວທົ່ງ-ລ້ອງງື່ມ

KPL