ຂປລ. ໃນວັນທີ 8 ສິງຫາ 2024 ນີ້, ທ່ານ ບົວຄົງ ນາມມະວົງ ລັດຖະມົນຕີ, ຫົວໜ້າຫ້ອງວ່າການສຳນັກ ງານນາຍົກລັດຖະມົນຕີ, ຫົວໜ້າກອງເລຂາຄະນະສະເພາະກິດ 19/ກມສພ ພ້ອມດ້ວຍຄະນະ ໄດ້ເຄື່ອນໄຫວຕິດຕາມ ແລະ ຊຸກຍູ້ວຽກງານ ການແກ້ໄຂບັນຫາເຄັ່ງຮ້ອນ ທາງດ້ານເສດຖະກິດ-ການເງິນ ຢູ່ແຂວງອຸດົມໄຊ ໂດຍມີທ່ານ ບຸນຄົງ ຫລ້າຈຽມພອນ, ເຈົ້າແຂວງໆອຸດົມໄຊ ນຳພາຄະນະນຳຂອງແຂວງ, ບັນດາພະແນກການ ແລະ ພາກສ່ວນກ່ຽວຂ້ອງ ຮ່ວມເຮັດວຽກ.

ໃນ​ໂອກາດ​ນີ້, ທ່ານ ອຸ່ນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ ໄດ້ໃຫ້ຮູ້ວ່າ: ພາຍຫລັງທີ່ລັດ ຖະບານ ໄດ້ອອກຄຳສັ່ງຂອງນາຍົກລັດຖະມົນຕີ ສະບັບເລກທີ 13/ນຍ, ອົງການປົກຄອງແຂວງ ກໍໄດ້ອອກຂໍ້ຕົກລົງ ຂອງ ທ່ານເຈົ້າແຂວງ ວ່າດ້ວຍການແຕ່ງຕັ້ງ ຄະນະສະເພາະກິດ ຂັ້ນແຂວງ ສະບັບເລກທີ 254/ອຊ ໂດຍແມ່ນ ທ່ານຮອງ ເຈົ້າແຂວງ ຜູ້ຊີ້ນຳຂົງເຂດເສດຖະກິດ ເປັນຫົວໜ້າຄະນະ ແລະ ປະກອບມີບັນດາຂະແໜງການທີ່ກ່ຽວຂ້ອງ ເປັນຄະ ນະ. ຈາກນັ້ນ, ຫົວໜ້າຄະນະສະເພາະກິດ ກໍໄດ້ອອກແຈ້ງການແນະນໍາ ເລກທີ 587/ອຊ ຊຶ່ງໄດ້ແບ່ງຄວາມຮັບ ຜິດຊອບໃຫ້ 15 ພະແນກການອ້ອມຂ້າງແຂວງ, ປະກອບມີ 89 ໜ້າວຽກຕົ້ນຕໍ. ຜ່ານການຈັດຕັ້ງຜັນຂະຫຍາຍສູ່ ວຽກງານຕົວຈິງ ໂດຍສະເພາະ ໄລຍະ 6 ເດືອນຕົ້ນປີ 2024 ການພັດທະນາເສດຖະກິດ-ສັງຄົມ ຂອງແຂວງ ເຫັນວ່າເສດຖະກິດຂະຫຍາຍຕົວ ໃນລະດັບ 3,18%, ລວມມູນຄ່າ GDP ບັນລຸ 9,048.44 ຕື້ກີບ, ການ ຈັດເກັບລາຍຮັບມາຮອດວັນທີ 31 ກໍລະກົດ 2024 ປະຕິບັດໄດ້ 117,9 ຕື້ກີບ ເທົ່າກັບ 60,92% ຂອງແຜນການ ແລະ ແຜນລາຍຈ່າຍປະຕິບັດໄດ້ 237,6 ຕື້ກີບ ເທົ່າກັບ 49,9% ຂອງແຜນການ.

ໃນໂອກາດດຽວກັນ, ທ່ານ ລັດຖະມົນຕີ, ຫົວໜ້າ ຫສນຍ ກໍໄດ້ມີຄຳເຫັນແລກປ່ຽນຄວາມຄິດເຫັນ ຕໍ່ ຜູ້ເຂົ້າຮ່ວມ, ພ້ອມທັງ ສະເໜີໃຫ້ແຂວງ ແລະ ພາກສ່ວນກ່ຽວຂ້ອງຂອງແຂວງ ສືບຕໍ່ເອົາໃຈໃສ່ຕື່ມບາງດ້ານ ເປັນຕົ້ນ ສຸມ​ໃສ່​ການ​ຜະລິດ​ກະສິກຳ ທີ່ແຂວງມີທ່າແຮງ ແລະ ເປັນເສດຖະກິດ ເພື່ອຮັບໃຊ້ພາຍໃນ ແລະ ສົ່ງອອກເປັນສິນຄ້າ ເພື່ອທົດແທນການນຳເຂົ້າສິນຄ້າ; ພັດທະນາລະບົບການບໍລິການ ການທ່ອງທ່ຽວ ໂດຍສະເພາະ ຂອດຂັ້ນການບໍລິ ການ ຢູ່ໂຮງແຮມ, ຮ້ານອາຫານ ແລະ ແຫລ່ງທ່ອງທ່ຽວ, ທັງຮັບປະກັນຄວາມປອດໄພ ແລະ ສ້າງຄວາມປະທັບໃຈ ໃຫ້ແກ່ນັກທ່ອງທ່ຽວ; ພັດທະນາອຸດສາຫະກຳການປຸງແຕ່ງ ເພື່ອສ້າງເພີ່ມມູນຄ່າໃຫ້ຫລາຍຂຶ້ນ; ສືບຕໍ່ພັດທະນາ ຊັບພະຍາກອນມະນຸດ ໃຫ້ສາມາດຕອບສະໜອງ ຄວາມຮຽກຮ້ອງຕ້ອງການຂອງວຽກງານ ໃນປັດຈຸບັນ ແລະ ອະນາຄົດ; ພັດທະນາວຽກງານ ຄົມມະນາຄົມຂົນສົ່ງ ເພື່ອເຊື່ອມຕໍ່ກັບ ບັນດາແຂວງພາກເໜືອ ໃຫ້ມີຄວາມໂລ່ງລ່ຽນ ແລະ ສະດວກຫລາຍຂຶ້ນ; ພ້ອມກັນຈັດຕັ້ງຜັນຂະຫຍາຍ ມະຕິກອງປະຊຸມລັດຖະບານເປີດກວ້າງ ຄັ້ງທີ I ປີ 2024 ຄຽງຄູ່ກັບການຈັດຕັ້ງປະຕິບັດທິດຊີ້ນໍາຂອງ ສະຫາຍ ເລຂາທິການໃຫຍ່, ປະທານປະເທດ ທີ່ໄດ້ຊີ້ນນໍຳ ໃນໂອກາດດຳເນີນກອງປະຊຸມເປີດກວ້າງດັ່ງກ່າວ ໃຫ້ປະກົດຜົນເປັນຈິງ; ສືບຕໍ່ຈັດຕັ້ງປະຕິບັດ ບັນດາໜ້າວຽກຈຸດສຸມ ແລະ ບັນດານິຕິກຳ ທີ່ຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນ ທາງດ້ານເສດຖະກິດ-ການເງິນ ກໍຄື ລັດຖະ ບານ ວາງອອກ ໃຫ້ມີການຫັນປ່ຽນດີ ຂຶ້ນຢ່າງຈະແຈ້ງ ແລະ ມີຄວາມຄືບໜ້າໄວ.

ຈາກນັ້ນ, ທ່ານ ລັດຖະມົນຕີ, ຫົວໜ້າ ຫສນຍ ພ້ອມຄະນະ ກໍໄດ້ເຮັດວຽກຮ່ວມກັບ ຫ້ອງວ່າການແຂວງ ໂດຍໄດ້ລົງເລິກແລກປ່ຽນບົດຮຽນວຽກງານ ການເປັນເສນາທິການຮັບໃຊ້ການນໍາ ແລະ ວຽກງານຕິດຕາມຊຸກຍູ້ ແລະ ປະເມີນຜົນ ການຈັດຕັ້ງປະຕິບັດ ບັນດາທິດຊີ້ນໍາ ຂອງລັດຖະບານ ເພື່ອຍູ້ແຮງທຸກຂົງເຂດວຽກງານ ໂດຍສະເພາະ ເພື່ອເຮັດໃຫ້ການຄຸ້ມຄອງ-ບໍລິຫານລັດ ເປັນລະບົບດີຂຶ້ນກວ່າເກົ່າ. ພ້ອມກັນນັ້ນ, ຄະນະດັ່ງກ່າວ ຍັງໄດ້ສືບຕໍ່ໄປ ຕິດຕາມເບິ່ງສະພາບການເຄື່ອນໄຫວ ແລະ ພັດທະນາວຽກງານຕົວຈິງ ຢູ່ພາຍໃນແຂວງອຸດົມໄຊ ຕື່ມອີກ ເປັນຕົ້ນ ໂຄງການກໍ່ສ້າງປ້ອງກັນຕາຝັ່ງເຈື່ອນ, ໂຮງງານຜະລິດຫົວອາຫານສັດ ແລະ ສາງຄ່ຽນຖ່າຍສິນຄ້າ ຜ່ານທາງລົດໄຟ ລາວ-ຈີນ.

ຂ່າວ-ພາບ: ກົມປະຊາສຳພັນ ຫສນຍ

KPL