ຂປລ
ຂປລ. ໂດຍຕອບສະໜອງ ຕາມການເຊື້ອເຊີນຂອງ ທ່ານ ເຊີຣເກ ລາວະຣົບ ລັດຖະມົນຕີກະ ຊວງການ ຕ່າງປະເທດ ແຫ່ງ ສ ຣັດເຊຍ, ທ່ານ ທອງສະຫວັນ ພົມວິຫານ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງຢ້ຽມຢາມ ສ ຣັດເຊຍ ຢ່າງເປັນທາງການ
ຂປລ. ໂດຍຕອບສະໜອງ ຕາມການເຊື້ອເຊີນຂອງ ທ່ານ ເຊີຣເກ ລາວະຣົບ ລັດຖະມົນຕີກະ ຊວງການ ຕ່າງປະເທດ ແຫ່ງ ສ ຣັດເຊຍ, ທ່ານ ທອງສະຫວັນ ພົມວິຫານ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງຢ້ຽມຢາມ ສ ຣັດເຊຍ ຢ່າງເປັນທາງການ ໃນລະຫວ່າງວັນທີ 24-27 ມິຖຸນາ 2025 ເພື່ອສືບຕໍ່ຮັດແໜ້ນສາຍພົວພັນມິດຕະ ພາບ ແລະ ການຮ່ວມມື ລະຫວ່າງ ສອງປະເທດ ໃຫ້ໄດ້ ຮັບການພັດທະນາຍິ່ງໆຂຶ້ນ.
ໃນວັນທີ 26 ມິຖຸນາ 2025 ຜ່ານມານີ້, ທ່ານ ທອງສະຫວັນ ພົມວິຫານ ພ້ອມດ້ວຍຄະນະ ໄດ້ພົບປະສອງຝ່າຍກັບ ທ່ານ ເຊີຣເກ ລາວະຣົບ ລັດຖະມົນຕີກະຊວງການຕ່າງປະເທດ ແຫ່ງ ສ ຣັດເຊຍ ຊຶ່ງເປັນການຢ້ຽມຢາມ ສ ຣັດເຊຍ ຄັ້ງທໍາອິດ ພາຍຫລັງ ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນ ລັດຖະມົນຕີຕ່າງປະເທດ ແຫ່ງ ສປປ ລາວ. ການພົບປະຄັ້ງນີ້, ຖືເປັນນິມິດໝາຍອັນດີ ໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມ ລະຫວ່າງ ລາວ ແລະ ຣັດເຊຍ ໃຫ້ສືບຕໍ່ແໜ້ນແຟ້ນຍິ່ງຂຶ້ນ ບົນພື້ນຖານການ ເປັນຄູ່ຮ່ວມມືຍຸດທະສາດດ້ານຄວາມໝັ້ນຄົງ ໃນຂົງເຂດອາຊີ-ປາຊີຟິກ.
ສອງຝ່າຍ ໄດ້ທົບທວນຄືນ ແລະ ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ທັງໃນຂອບການ ຮ່ວມມືສອງຝ່າຍ ແລະ ຫລາຍຝ່າຍ ໃນໄລຍະຜ່ານມາ ເຊິ່ງໄດ້ເພີ່ມທະວີ ຮັດແໜ້ນຢ່າງຕໍ່ເນື່ອງ ບົນພື້ນຖານຄວາມເຂົ້າອົກເຂົ້າໃຈ ແລະ ການຊ່ວຍເຫລືອເຊິ່ງກັນ ແລະ ກັນ, ການພົວພັນມິດຕະພາບ ແລະ ການຮ່ວມມືອັນ ເປັນມູນເຊື້ອມາແຕ່ດົນນານ. ບົນຈິດໃຈດັ່ງກ່າວ, ສອງຝ່າຍ ໄດ້ເຫັນດີໃຫ້ເພີ່ມທະວີ ການພົວພັນສອງຝ່າຍ ໃນຫລາຍຂົງເຂດໃນອະນາຄົດ ເຊັ່ນ: ການຮ່ວມມືດ້ານເສດຖະກິດ-ການຄ້າ, ການລົງທຶນ, ພະລັງງານ, ການສຶກສາ, ການທະຫານ, ວັດທະນະທຳ, ການທ່ອງທ່ຽວ ແລະ ອື່ນໆ ທີ່ສອງຝ່າຍມີທ່າແຮງ ເພື່ອຜົນປະໂຫຍດຮ່ວມກັນ.
ໃນຂອບການພົວພັນຫລາຍຝ່າຍ, ສປປ ລາວ ແລະ ສ ຣັດເຊຍ ໄດ້ຕີລາຄາສູງ ແລະ ສືບຕໍ່ຮ່ວມມືກັນ, ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ເພື່ອຮັບປະກັນ ການສົ່ງເສີມສັນຕິພາບ, ສະຖຽນລະພາບ ໃນທົ່ວໂລກ.
ໃນຕອນທ້າຍ, ທ່ານລັດຖະມົນຕີໄດ້ຕາງໜ້າໃຫ້ລັດຖະບານລາວ ສະແດງຄວາມຊົມເຊີຍ ຕໍ່ລັດຖະບານ ແລະ ປະຊາຊົນ ຣັດເຊຍ ທີ່ປະສົບຜົນສໍາເລັດຢ່າງຈົບງາມ ໃນການເຫລີມ ສະຫລອງ ວັນມະຫາສົງຄາມ ຄົບຮອບ 80 ປີ ແຫ່ງ ໄຊຊະນະປົກປ້ອງປິຕຸພູມ ຂອງສະຫະພາບໂຊວຽດ ໃນວັນທີ 9 ພຶດສະພາ 2025 ຜ່ານມາ. ພ້ອມນັ້ນ, ທ່ານ ຍັງໄດ້ຢືນຢັນວ່າ ໃນໄລຍະທ້າຍປີ 2025 ນີ້, ສປປ ລາວ ແລະ ສ ຣັດເຊຍ ຈະໄດ້ສືບຕໍ່ຈັດກິດຈະກຳຮ່ວມກັນເພື່ອສະເຫລີມສະຫລອງ ຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດ ລາວ-ຣັດເຊຍ ແລະ ຄົບຮອບ 60 ປີ ແຫ່ງການສ້າງຕັ້ງສະມາຄົມມິດຕະພາບ ລາວ-ຣັດເຊຍ.
ຂ່າວ-ພາບ: ກຕທ
KPL
